Wɔrɔmi ye 12 - Cebaara Bible 2010

Sìifɔnw wi nyɛ Kolocɔlɔɔ fáliw pyele ni lè

¹ Ni senyɛ̀nnɛ, mii i yele nyɛ́ɛri Kolocɔlɔɔ nyínimi báriga ni, ye yele céri kaan Kolocɔlɔɔ ma ti pye sárigaweeo, wee wi nyɛ lè wojaɔn ní, níì Kolocɔlɔɔ dɛ́nɛ, koro ki a pye yele ma Kolocɔlɔɔ kpɔ̀ʔɔrɔli wodeele.

² Ki ga yɛlɛ yele í ní da dulunyanw naa syɛ̀ɛnnɛ tɛ́ɛlɛ í, kàjáa ki n yɛlɛ yele í yele fúnyi kàriga si fàli, koro ga pye yele í Kolocɔlɔɔ nyɛ́nɛ kéeli sámaga cán, lee li nyɔɔ n foro lè, níì Kolocɔlɔɔ dɛ́nɛ.

³ Mii a gi joo yele myɛ nibin nibin ma kpɔ́ʔɔri báriga ni, dee Kolocɔlɔɔ kaan mii ma lè, si jo ki ga yɛlɛ yele wàa faala í da wiyɛɛ gbɔ́ʔɔgi bi sɔ̀lɔ ki dǎnw na í, kàjáa àmɛɛ Kolocɔlɔɔ tágali tíla tíla yele myɛ nibin nibin na kánmee na lè, ki n yɛlɛ ye yele fúnyi sɔ̀ngurɔ yaʔa di tɛ́ɛn bi yɛlɛ ní tágali bee ní.

⁴ Níì cán àmɛɛ wolo céri nyɛ lè nibin á di tɛ́ɛyi nɛʔɛ, tɛ́ɛyi bee myɛ si o falinijaɔn kpéʔele í,

⁵ kánmi bee na wolo nɛʔɛ, ní si i nyɛ cere nibin Kirisi ni, wolo myɛ nibin nibin i nyɛ woyɛɛ céri tɛ́ɛyaa.

⁶ Kolocɔlɔɔ n fundoori kaan wolo ma feleye feleye n yɛlɛ ní kpɔ́ʔɔri ní wi kaan wolo ma lè, kapye kanyaajoori fundooro di kaan wàa ma, ki n yɛlɛ waa nyuu waa yɛlɛgi ní tágali ní li nyɛ wi ma lè.

⁷ Kapye dyakiri fáliw fundooro i nyɛ wàa ma, ki n yɛlɛ waa wi kpéʔele. Kapye syɛ́ɛnbèle tamana fundooro i nyɛ wàa ma, ki n yɛlɛ waa be tama.

⁸ Wee má syɛ́ɛnbèle kɛɛlɛlɛ fundooro nyɛ lè, ki n yɛlɛ waa be kɛɛlɛ. Wee wi wi kɔlɔ̀ yáriri kaangi lè, ki n yɛlɛ wi wi kɔ́gi sánʔa kányɛʔɛ ni. Kapye yɛɛ̀kinidi fundooro i nyɛ wàa ma, ki n yɛlɛ waa gi kpéʔele ní lòmaana ní. Wee wi nyinimɛ taagi lè, ki n yɛlɛ waa gi kpéʔele ní fundaanra ní.

⁹ Tàmagi ga yɛlɛ kaa kpéʔele ní syɛɛnjóotɛɛyɛ siin joolo ní í. Ki n yɛlɛ ye kapeegèle yaʔa ke yele bɛɛn yé tan kacǎngèle na.

¹⁰ Ye tàmaga le ní yeyɛɛ ní àmɛɛ yele nyɛ lè senyɛ̀nnɛ. Yaa yeyɛɛ jèʔelé màámi pyele na yeyɛɛ ma.

¹¹ Ye lòmaana le, yele a kɔ́ pye sàlagafɔɔlɔ í. Ki n yɛlɛ yaa báara Kàfɔw ma ní fun-yaʔa ní.

¹² Yaa fundaanra kpéʔele sɔ̀ngumi tɛɛtaʔaga kéele na, yáā kpàracogo kpéʔele wɔʔɔyi fúngo ni, yé kòro yaa nyɛ́ɛri làla o làla.

¹³ Yaa Kolocɔlɔɔ syɛɛncanbèle màko nyɔɔgi, yé pye nibɔndirigebéle.

¹⁴ Yaa dùbaw kpéʔele yele wɔʔɔfɔbèle ma. Dùbaw yele yɛlɛ bàā kpéʔele, ye a kɔ́ ra dánga kpéʔele í!

¹⁵ Yaa fundaanra kpéʔele ní fundaanri fɔ̀ɔlɔ ní, yáā nyaan ní nyɛnifɔbèle ní.

¹⁶ Ye pye fungo nibin na ní yeyɛɛ ní. Yele a kɔ́ kpɔ́ɔmi sɔ̀ngurɔ yaʔa di jée yele ni í, fwɔɔ yaa sɔ̀ngí màámi fɔ̀ɔlɔ kéele na. Yele a kɔ́ ra yeyɛɛ jóro sícilimɛ fɔ̀ɔlɔ í.

¹⁷ Yele a kɔ́ kapeelaa tɛ́ʔɛ bi làa fwɔ́ɔlɔ tɔ́n wàa ma í. Kérigèle ge sín lè syɛ́ɛnbèle myɛ nyɛ́nɛ na, yaa ŋàʔaná yaa gele bee kpéʔele.

¹⁸ Gee myɛ yele a gbǎn kpéʔele lè si pye bɛ̀ɛlɛ na ní syɛ́ɛnbèle myɛ ní, yaa gee bee kpéʔele.

¹⁹ Mii syɛɛn-nidaanmabèle, ki ga yɛlɛ yele tiimaa í da yele kapeegèle fwɔ́ɔgéle tɔ́ngi í, fwɔɔ ye Kolocɔlɔɔ fundanʔari yaʔa taa ge tɔ́ngi, níì cán ki n sɛ́bɛ níì jo: «Mii má kapeebyeri fwɔ́ɔtɔnrɔ nyɛ, mii a di fwɔ́ɔli tɔ́n,» Kàfɔw wi gi joo nya.

²⁰ «Gee gi pɔ́rɔ lè kateʔe ga pye mɔ nígoo na, mi wi kaan wi lìi. Lògbaʔa ga wi jáa, mi wi kaan wi gbaa. Níì cán mɔ ga ni gee bee kpéʔele, ki a pye mɔ a jo mɔ i naàniganra tɔ́ngi wi nyúngi na.»

²¹ Mɔ a kɔ́ gi yaʔa kapeegèle í fànʔa taa mɔ na í, kàjáa ki n yɛlɛ mɔ í fànʔa taa kapeegèle na kacànbyeri báriga ni.