Wɔrɔmi ye 10 - Cebaara Bible 2010

¹ Ni senyɛ̀nnɛ, gee mii caa lè mii fúngi ni gbanʔama, ní gee mii nyɛ́ɛri Kolocɔlɔɔ ma Isirayɛli ye kéeli na lè, koro gi nyɛ be taa syɔɔ.

² Níì cán mii i nyɛ be séera ncan Kolocɔlɔɔ kéeli i nyɛ be fúnyi ni, kàjáa pe ga gi sícilimi cán í.

³ Pe ga Kolocɔlɔɔ sínni cán í, ní i ŋàʔaná bi peyɛɛ gbéʔele syɛɛnsinbéle, gee bee na pe ga fɔ̀lɔ n peyɛɛ gaan Kolocɔlɔɔ ma wi poro sín í.

⁴ Níì cán Kirisi n baa pye Mowizi làlwaw kwɔ́ɔfɔlɔ, koro ga pye bele myɛ be tága woro na lè, poro í sínni taa.

Syɔɔli i nyɛ bele myɛ wólo be tága Kàfɔw na lè

⁵ Mowizi maa gi sɛ́bɛ níì jo: «Syɔ́ɔnwee wi làlwaw kasingéle myɛ kpéʔele lè, wi a sìi taa ke bárigaw ni.»

⁶ Sínlee si li taagi tágali báriga ni lè, loro syɛ́ɛnri di nyɛ dee naa, ti n jo: «Mɔ a kɔ́ gi joo mɔ fúngi ni si jo, wìí wi a lúgu bi kári nyɛ̀ʔɛni na í?» Syɛ́ɛnri bee kɔ́rɔ wi nyɛ bi sa Kirisi tìrige naa.

⁷ Koro ga jáa bi jo: «Wìí wi a tìgi jée weecurugi ni?» Gee bee n jo bi Kirisi nyán yirige kúbèle nínge ni.

⁸ Nyàʔá si sínni syɛ́ɛnrɛ níì joo? Ti n jo: «Syɛ́ɛnri bee n nùuni mɔ na, ti i nyɛ mɔ nyɔ́ɔgi ni, ní mɔ fúngi ni.» Syɛ́ɛnri bee di nyɛ tágali syɛ́ɛnrɛ dee wolo nyuu lè.

⁹ Ní mɔ ga ni gi fíligi ni nyuu mɔ nyɔ́ɔgi ni níì jo «Zyezu wi nyɛ Kàfɔw,» ní wɔ́ɔ̀ tága gi na mɔ fúngi ni ncan Kolocɔlɔɔ n wi nyán n yirige kúbèle nínge ni, mɔ a syɔɔ.

¹⁰ Níì cán syɔɔn ga tága wi fúngi ni, wi n sínni taa, wi ga ni gi fíligi ni nyuu wi nyɔ́ɔgi ni, wi n syɔɔli taa,

¹¹ àmɛɛ syɛɛnsɛbɛri gi joo lè níì jo: «Syɔɔn o syɔɔn wi tága lè wi na, fɛ̀ɛrɛ a tée wee bee taa bi nyaa í.»

¹² Wàlima o nyɛ Zyefubèle ní syɛɛnfeleyi wozanya nínge ni í, níì cán Kàfɔlɔ nibin wi nyɛ pe myɛ nyúngo na, bele be wi mɛ́ɛgi yiri lè, wi i nyɛ yarigaa fɔ́lɔ bele bee myɛ kàbaan na.

¹³ Níì cán «Syɔ́ɔnwee faala ga ni Kàfɔw mɛ́ʔɛ yiri lè, wee bee a syɔɔ.»

¹⁴ Ki si ga pye pe ga tága wee na lè í, mɛ̀ɛ́ pe a ba ra wee bee mɛ́ʔɛ yiri bi sɛ́ɛ? Wee kéele li lè pe ga kɔ́ɔ̀ li lóʔo í, mɛ̀ɛ́ pe a ba tága wi na bi sɛ́ɛ? Kapye kanyaajooo ga wi kéeli joo be ma í, mɛ̀ɛ́ pe a li lóʔo bi sɛ́ɛ?

¹⁵ Kapye wàa ga kanyaajoobèle tun í, mɛ̀ɛ́ pe a sa ra wi kéeli nyuu bi sɛ́ɛ? Amɛɛ gi sɛ́bɛ lè níì jo: «Bele be Syɛɛnjóocǎnri nyuu lè, bele bee nyɔ̌ndanʔana n tɔ̀nɔ n nyɔɔ.»

¹⁶ Kàjáa syɛ́ɛnbèle myɛ ga fɔ̀lɔ Syɛɛnjóocǎnri na í. Gee bee na Ezayi da gi sɛ́bɛ níì jo: «Kàfɔw, dee wolo joo lè, wìí wi di lóʔo wolo ma níì tága di na?»

¹⁷ Kánmi bee na tágali i taagi syɛ́ɛnri lóʔolo báriga ni, lóʔoli si i taagi Kirisi syɛ́ɛnri joolo báriga ni.

¹⁸ Kàjáa mii n jo, a gi i nyɛ lé pe ga di lóʔo wii í láà? Eʔe, koro ban í! «Níì cán kanyaajoobèle joomɔ n yiri n nan tári tɛ́ɛyɛ myɛ na. Pe syɛ́ɛnri n nan fwɔɔ dulunyanw láʔagéle na.»

¹⁹ Mii si a ní gi joo si jo, a gi i nyɛ lé Isirayɛli ye ga gi cán wii í láà? Eʔe, Mowizi wi sélì gi joo níì jo: «Syɛ́ɛnbèle bele yele córo lè pe o nyɛ syɛ̀ɛnnɛ í, mii a be kayaagi lége yele ni. Bele yele córo lè sícilimɛ fun syɛ̀ɛnnɛ, mii a bele bee pye sábabu si yele fúnyi tanʔa.»

²⁰ Ezayi maa tɔ̀nɔ n soro n gi joo níì jo: «Bele be lè pe da ni mii caa í, bele bee n mii nyaa, bele be lè pe da ni mii kéeli yíbe í, mii n niyɛɛ dɛ̀ɛn bele bee na.»

²¹ Kàjáa wi n gi joo Isirayɛli ye kéeli na níì jo: «Mii n mii kɔ́yi sánʔa niceebèle ma n cángi myɛ kwɔ́ɔ, be nyɛ lè kàkabalayi fɔ̀ɔlɔ.»