Wɔrɔmi ye 1 - Cebaara Bible 2010

Fòów kéele

¹ Mii Pɔli, wi lè Kirisi Zyezu púlo, Kolocɔlɔɔ n mii yeri mii í pye woro pìituɔn àmɛɛ wi mii nyɛ́nɛ n wòlo lè mii í da woro Syɛɛnjóocǎnri nyuu.

² Syɛɛnjóocǎnri bee di nyɛ dee Kolocɔlɔɔ da joo n kaan lè booma ni wi kanyaajoobèle ma níì jo paa di nyuu syɛ́ɛnbèle ma, àmɛɛ di sɛ́bɛ lè wi syɛɛnsɛbɛcǎnri ni.

³ Syɛɛnjóocǎnri bee i wi Jáaw kéele nyuu, woro wee wi nyɛ lè Zyezu Kirisi, wi lè wolo Kàfɔw, pe n baa wi see Davidi yòdaʔayi ni céri kàbaan na,

⁴ kàjáa a Kolocɔlɔɔ gi tɛ̀ɛn ní fàngbɔʔɔ ní wi i nyɛ woro Jáa Pìicǎnni kàbaan na, lee li nyɛ lè tɛɛlɛ fun, àmɛɛ wi wi nyán n yirige lè kúbèle nínge ni.

⁵ Woro bárigaw ni Kolocɔlɔɔ kpɔ́ʔɔri kaan wolo ma, ní wɔ́ɔ̀ wolo kpéʔele pìitunbéle wi mɛ́ɛgi kéele na, koro ga pye syɛ́ɛnbèle pèle í da tági syɛɛnfeleyi myɛ ni sáā lúro wi ma,

⁶ yele si wɔ́ɔ i nyɛ bele bee pèle, yele bele Kolocɔlɔɔ yeri lè n kpéʔele Zyezu Kirisi wòolo.

⁷ Mii i sɛ́bɛw naa sɛ́bɛ bi tórigo yele myɛ ma, yele bele ye nyɛ lè Wɔrɔmi ni, Kolocɔlɔɔ syɛɛn-nidaanmabèle, yele bele wi yeri lè n kpéʔele woro tiimaa syɛ̀ɛnnɛ. Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma!

Pɔli i caa bi kári sa Wɔrɔmi tágafɔbèle nyaa

⁸ Mii i bariga kaangi mii Kolocɔlɔw ma gbɛnʔɛnɛ yele myɛ kéeli na Zyezu Kirisi bárigaw ni, àmɛɛ pe yele tágali kéele nyuu lè dulunyanw tɛ́ɛyɛ myɛ ni.

⁹ Kolocɔlɔwee fáli mii kpéʔele lè ní mii fúngi myɛ ní ní i Syɛɛnjóocǎnri nyuu lè wi Jáaw kéele na, wi i nyɛ mii séera ncan mii i yele kéeli nyuu mii nyɛ́ɛriyi ni làla o làla.

¹⁰ Mii i wi nyɛ́ɛri làrigèle myɛ ni níì jo, ki ga pye wi nyɛnɛ kéele ki n yɛlɛ mii sigemɔnni naa kàdoʔo í ba pye mii í gbǎn kanmaa taa bi kári yaà yele ma.

¹¹ Níì cán ki láagi tɔ̀nɔ́ i nyɛ mii na gbanʔama bi yele nyaa koro ga pye mii í sa Pìicǎnni yakaangaa kaan yele ma, jàngó yele í nìri tágali ni,

¹² wàlá mii í joo mii ga pye yele níngi ni lǎlee ni lè, wo myɛ í pínɛ fànʔa taa tágali báriga ni, lee li wo pínɛ lè, yele í gi taa mii wóli báriga ni, mii si wɔ́ɔ gi taa yele wóli báriga ni.

¹³ Ni senyɛ̀nnɛ, mii i caa yele í gi cán mii maa tée ni sɔ̀ngí gi na tɔlɔyɔ saʔa bi kári yaà yele ma koro ga pye mii í yasanra taa yele ni, àmɛɛ mii wɔ́ɔ̄ di taagi lè syɛɛnfeleyaa nínge ni. Kàjáa kérigèle kèle i mii sígi ni yéregi fwɔɔ n baa nan níjanʔa na.

¹⁴ Syɛ́ɛnbèle myɛ fwɔ́ɔlɔ i nyɛ mii na, Girɛkibèle ní syɛɛnsanbèle myɛ wólo i nyɛ mii na, kacánbèle yoo, kanaa-sìnjánbèle yoo, pe myɛ fwɔ́ɔlɔ i nyɛ mii na.

¹⁵ Gee bee na, yele bele ye nyɛ lè Wɔrɔmi ni, ki láagi tɔ̀nɔ́ i nyɛ mii na mii í sa Syɛɛnjóocǎnri joo yaà yele ma wɔ́ɔgēle.

Syɛɛnjóocǎnri fànʔa kéele

¹⁶ Níì cán Syɛɛnjóocǎnri mii nyuu lè, fɛ̀ɛrɛ o mii taagi di kéeli na í, ti i nyɛ Kolocɔlɔɔ fǎngi bàā syɛ́ɛnbèle syoo, bele myɛ be tági lè di na, wozelibèle be nyɛ Zyefubèle n náà fàra syɛɛnfeleyi wozanya na.

¹⁷ Níì cán Syɛɛnjóocǎnri di sínni tèé, lee li taagi lè Kolocɔlɔɔ ma, ní i taagi tágali yagana báriga ni, àmɛɛ Kolocɔlɔɔ syɛɛnsɛbɛri gi joo lè níì jo: «Syɛɛnsinw a sìi taa tágali báriga ni.»

Syɛ́ɛnbèle kolomɔ kéele

¹⁸ Kolocɔlɔɔ i wi fundanʔari tèé, dee di yìrigí lè nyɛ̀ʔɛni na n ba ni tuun syɛ́ɛnbèle na, bele be lè pe o fɛ̀ɛgí Kolocɔlɔɔ na í, ní i kakolobyeri féleye myɛ kpéʔele, pe kakolobyeri báriga ni pe kányɛɛgi yéregi, ki o syée yɛʔɛ̀ ma í.

¹⁹ Níì cán gee pe a gbǎn cán lè Kolocɔlɔɔ kéeli na, ki n fílige be ma. Ncan Kolocɔlɔɔ n gi fílige n tɛ̀ɛn be na.

²⁰ Níì cán nlaa wi dulunyanw faan lè, wi kánmi bi lè syɔɔn o bi nyaagi í, syɛ́ɛnbèle i bee bee nyaagi gbanʔama wi yafaanri báriga ni, ki kɔ́rɔw wi nyɛ wi bàngwɔɔ fǎngi, ní wi kolocɔlɔmi, kérigèle bee i cángi wi yafaanri báriga ni. Gee bee na tànʔa ní o nyɛ be ma í,

²¹ níì cán pe n Kolocɔlɔɔ cán, koro ní ki myɛ ní pe ga fɔ̀lɔ bàā wi kpɔ̀ʔɔrɔ́ àmɛɛ gi yɛlɛ paa wi kpɔ̀ʔɔrɔ́ lè í, pe ga wɔ́ɔ̀ fɔ̀lɔ ni bariga kaangi wi ma í. Fwɔɔ a be be sɔ̀nguri taʔa nyùngo fun kérigèle na, a be sícilimɛ fun fúnyi wɔ́ɔ baa nyìn yébilimi na.

²² Pe maa ni peyɛɛ yiri kacanbèlē, kàjáa pe n baa pye nilabalabéle.

²³ Nìjangbɔɔri di nyɛ lè bànguu Kolocɔlɔw ma, pe ga fɔ̀lɔ ni dee bee córo í, ní i syɛ́ɛnbèle kɔ́yɔ yasamagara kpɔ̀ʔɔrɔ́ ti sìndɛɛgi ni, yasamagari bee i nyɛ syɔɔn niwirige wi lè yakuugo, ní féjɛɛnri, ní tɔlɔyɔ sicɛrɛ-jɛrɛ yaweeri niwiriye n fàra dee na di fulolo lè.

²⁴ Gee bee na Kolocɔlɔɔ be yaʔa paa kanɔnʔɔri kèlē kpéʔele bi yɛlɛ ní be tiimaa fundaayi ní, páā fɛ̀ɛrɛ fun kérigèle kpéʔele ní peyɛɛ ní pe céri kánma na,

²⁵ poro bele be Kolocɔlɔɔ kányɛɛgi fàli lè jànvaaw na. Yáriree Kolocɔlɔɔ faan lè, pe n ba ni dee bee kpɔ̀ʔɔrɔ́ ní i di fáliw kpéʔele. Pe si ga fɔ̀lɔ ni di Faanfɔw kpɔ̀ʔɔrɔ́ í, woro wee wi yɛlɛ lè ní kpɔ̀ʔɔrɔli ní làla o làla. Amiina!

²⁶ Gee bee si na Kolocɔlɔɔ be yaʔa pe fundaayi fɛ̀ɛfɔnmɔ kèlē ni, níì cán àmɛɛ cébèle yɛlɛ bàā sìnɛ́ ní pe nǎnbèle ní lè, a be gee bee yaʔa níì gi kàriga kanmaa na ni kpéʔele pe céri na, gee gi nyɛ lè ki ga yɛlɛ gi kpéʔele í.

²⁷ Kánmi bee wonijanma na, àmɛɛ nǎnbèle wɔ́ɔ̀ yɛlɛ bàā sìnɛ́ ní pe cébèle ní lè, a be gee bee yaʔa, á be céri láanitaʔa wári be na, a be i peyɛɛ jaa, ní i fɛ̀ɛfɔnmi kèlē kpéʔele ní peyɛɛ ní. Wɔʔɔgee pe yɛlɛ bi taa lè pe kolomi kéele na, pe i gee bee taagi peyɛɛ ni.

²⁸ Pe ga fɔ̀lɔ n Kolocɔlɔɔ kéeli yaʔa peyɛɛ fúnyi ni í, gee bee na Kolocɔlɔɔ be yaʔa be fɛ̀ɛfɔnmi sɔ̀ngurɔ kɔ́yɔ ni, koro ga pye paa kanaa-sìnbyeri kpéʔele.

²⁹ Kakolobyeri, ní kapeebyeri, ní fungboloyi, ní funbeeyi, n fàra nyabɛɛnni, ní syɛɛnkpoori, ní kàsiiw, ní fáanagi, ní zɔ̀nbeew na, kérigèle bee féleye myɛ be kpéʔele lè, gele bee ge be fúnyi nyìn. Pe wɔ́ɔ i nyɛ lóʔonjoobéle,

³⁰ ní mɛ́ɛkalagibéle, ní Kolocɔlɔɔ nígoobéle, ní syɛɛn-tɛʔɛlɛbéle, ní ní i nyɛ nɛ̀ɛnyɛnɛgɛ fɔɔlɔ, ní joogbɔɔmɔ fɔɔlɔ, ní i kanmaa caa wovɔnmɔ bàā kérigèle kpéʔele, gele ge pee n sɔ̀lɔ lè, pe wɔ́ɔ o lúro pe seefɔbèle ma í,

³¹ ní ní i nyɛ sɔ̀ngumɔ-fùnvɔɔlɔ, ní nyɔɔfaliyi kálagifɔɔlɔ, ní tàmaga-fùnvɔɔlɔ, ní nyinimɛ-fùnvɔɔlɔ.

³² Bi gi taa gee Kolocɔlɔɔ joo lè kérigèle bee na wi nyɔɔsyɛɛnri ni, pe n gee bee fílige n cán, níì cán wi n jo: Bele be kérigèle bee félege kpéʔele lè, pe n yɛlɛ ní kùu ní, a be sèʔê fala kérigèle bee kurugo ni kpéʔele, àlí bele be kérigèle bee wonijangéle kpéʔele lè, pe i bele bee sòoló ke kpéʔeleli na.