Filemɔn 1 - Cebaara Bible 2010

Fòów kéele

¹ Mii Pɔli, wi lè kàsow ni n yɛlɛ ní Kirisi Zyezu kínidɛnɛgi ní, mii ní wolo senyɛnw Timɔte ní, wolo a sɛ́bɛw naa tórigo mɔ ma, Filemɔn, mɔ wi lè wolo syɛɛn-nidaanmaw ní wolo falipyenyɛnw,

² wolo a wi tórigo yele ma, mɔ, ní wolo senyɛnjew Apya, ní wolo kapɛɛnkpumɔnnyɛnw Arisyipi ní, n fàra Egiliziw na wi nyɛ lè mɔ kpáagi ni.

³ Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma.

Filemɔn tàmagi ní wi tágali kéele

⁴ Mii i bariga kaangi mii Kolocɔlɔw ma làla o làla, ní i mɔ mɛ́ɛgi yiri mii nyɛ́ɛriyi ni.

⁵ Níì cán àmɛɛ mɔ tàmaga le lè ní Kolocɔlɔɔ syɛɛncanbèle myɛ ní, ní àmɛɛ mɔ tága Kàfɔw Zyezu na lè, mii i gee bee lúro.

⁶ Mii i wi nyɛ́ɛri koro ga pye pínɛnyɛnnɛgi ni wo nyɛ lè tágali báriga ni, gee bee í gi kaan mɔ í dùbaw myɛ cán, wee wolo taa lè Kirisi ma.

⁷ Ni senyɛnnɛ, mɔ tamagi kéele n fundaanra saʔa kaan mii ma níì mii kɛɛlɛ, níì cán mɔ n ŋɔ́ndaala kaan Kolocɔlɔɔ syɛɛncanbèle ma be fúnyi ni.

Pɔli n Onɛziimi kùsulugi kpéʔele

⁸ Gee bee na, àlí n gi yaʔa fànʔa i nyɛ mii ma Kirisi bárigaw ni bi dée gi joo gbàn mɔ ma gee mɔ yɛlɛ bi kpéʔele lè, mɔ í gee bee kpéʔele,

⁹ koro ní ki myɛ ní tàmagi kéele na mii mɔ nyɛ́ɛri. Mii Pɔli wi lè nànlɛɛɔ, ní wɔ́ɔ i nyɛ kàsow ni tɔ́ɔliw ni n yɛlɛ ní Kirisi Zyezu kínidɛnɛgi ní,

¹⁰ mii i mɔ nyɛ́ɛri mii pìíw kéele na, wee mii see naa lè kàsow ni, woro wi nyɛ Onɛziimi,

¹¹ wee wi da sélì pye lè mɔ ma tɔ̀nɔ fun, wi si i nyɛ ní tɔ̀nɔ ní tɔ́ɔliw ni wo myɛ siinw ma, mɔ ní mii ní.

¹² Mii n wi lúrugo n tórigo mɔ ma, ki i nyɛ mɔ a jo mii tiimaa fúngi mii tórigo mɔ ma.

¹³ Mii maa séli ni sɔ̀ngí bi wi yaʔa naa niyɛɛ daana, koro ga pye lǎlee myɛ mii a kwɔ́ɔ naa lè kàsow ni Syɛɛnjóocǎnri kéele na, waa mii màkow nyɔɔgi mɔ sindɛɛgi ni.

¹⁴ Mii si ga fɔ̀lɔ bi yafyɛn kpéʔele mɔ sɔnguri sìnján ni í, jàngó kacǎnni mɔ a kpéʔele lè, ki a kɔ́ pye mɔ a jo ŋàʔanaga kéele í, fwɔɔ gi yiri mɔ tiimaa fúngi ni.

¹⁵ Dɔ̀ʔɔ́ kéelee na wi da láʔa mɔ na bi làla cɛɛri kwɔ́ɔ lè, loro li nyɛ jàngó mɔ í ní wi taa wi pye mɔ wóo làla o làla,

¹⁶ kàjáa wi a ní pye àmɛɛ puloo nyɛ lè í, wi n sɔ̀lɔ puloo na, tɔ́ɔliw ni wi i nyɛ wo senyɛn-nidaanmaɔ, wi kéeli n mii dɛ́nɛ gbanʔama, ki si ga pye wi kéeli n mii dɛ́nɛ nya, wi kéeli a sèʔé mɔ dɛ́nɛ bi sɔ̀lɔ mii na, céri kàbaan na ní Kàfɔw kàbaan na.

¹⁷ Gee bee na, kapye mɔ n mii córo mɔ pínɛnyɛnnɛ, mi wi láa mɔ a jo mii tiimaa wii.

¹⁸ Kapye wi maa kolo mɔ ma keelaa ni, wàlá mɔ fwɔ́ɔlɔ i nyɛ wi na, maa gee bee córo mii na.

¹⁹ Mii Pɔli wi dee naa sɛ́bɛ ní mii tiimaa kɔ́gi ní, mii a gi sàra mɔ ma, ki náa o nyɛ mii í gi joo mɔ ma, si jo mii fwɔ́ɔlɔ i nyɛ mɔ na í, mɔ tiimaa wi nyɛ fwɔ́ɔli bee.

²⁰ Kányɛʔɛ na, ni senyɛnnɛ, mii pɔʔɔ mí gee naa kpéʔele mii ma Kàfɔw mɛ́ʔɛ na. Mii fúngi nyíngi Kirisi ni.

²¹ Amɛɛ mii gee naa sɛ́bɛ bi tórigo mɔ ma lè, mii n tága gi na mɔ a gi lóʔo mii ma, àlí mii n gi cán mɔ a gi kpéʔele bi sɔ̀lɔ mii wojoori na.

²² Ki n yɛlɛ mɔ í wɔ́ɔ tɛɛ̀syɔnʔɔ sámaga mii ma yaà làrinijanni ni, níì cán mii sɔ̀nguri i nyɛ gi na n jo Kolocɔlɔɔ a nyɔɔ mii na si ní mii kaan yele ma yele nyɛ́ɛriyi báriga ni.

Fòosanw kéele

²³ Epafirasi wi lè mii kàsolenyɛnw Kirisi Zyezu kéeli na, wi n mɔ syáanri,

²⁴ n fàra mii falipyenyɛnbèle na be lè Mariki, ní Arisitaki, ní Demasi, ní Luki ní!

²⁵ Ki n yɛlɛ Kàfɔw Zyezu Kirisi í wi kpɔ́ʔɔri le yele pìígèle ni.