Oze sɛ́bɛw 9 - Cebaara Bible 2010

Kolocɔlɔɔ syɛ́ɛnbèle a bɔ̀nɔ ki myɛ ni

¹ Isirayɛli, mɔ a kɔ́ ra fundaanra kpéʔele bàā muguri àmɛɛ syɛɛnfeleyi nyɛ lè í, níì cán mɔ n mɔ Kolocɔlɔw yaʔa níì miyɛɛ gbéʔele nànjaacɔɔ̀, ki n mɔ dɛ́nɛ bàā sàranɔnʔɔw syoo bilew kàsyɔɔyɔ myɛ na.

² Kàsyɔɔgi ní ɛrɛzɛn lógi tɛɛnùgugo a ní da be kaangi paa líi í, dùvɛɛnfɔnw a be jànváa.

³ Pe a ní kòro Yawe tári ni í. Efirayimi a lúru kári Ezyipiti ma, pe a sa ra yaliinɔnʔɔri líi Asirii ni.

⁴ Pe a ní da dùvɛɛnw sáriga wóo Yawe ma í. Pe sárigaw kéele a wi dɛ́nɛ í. Ki a pye be ma àmɛɛ kùu káyaʔa búru nyɛ lè, wi lìifɔbèle myɛ a peyɛɛ nɔ́nʔɔ. Níì cán pe búruw a pye pe gɔ̀ɔ́ngèle wóo. Wi a jée Yawe kpáagi ni í.

⁵ Nyàʔá yele a kpéʔele kpóʔorojànna canʔa, ní Yawe séri canʔa na?

⁶ Níì cán wéle, pe i yirigi ni syée kálagili kéele na. Ezyipiti a be syɔɔ lége, Mɔfi a nyanya kaan be ma. Nyàápeegi a be wálifiiw wojaɔn syɔɔ taa, wúuro a fìin be fànikpaayi ni.

⁷ Kpúmɔnri canya yi maa yee, sàraw canya yi maa yee, Isirayɛli a koro cán! Kanyaajoow n cúro, a cánni pìlefɔlɔ nyúngo nyáʔami mɔ sinzinmi nɛʔɛnɛ, ní mɔ céenɛʔɛmi kéele na.

⁸ Efirayimi i nyɛ kɔ̀rɔsiifɔlɔ mii Kolocɔlɔw kánma na. Kanyaajoow wii, féjɛɛnjo-pára n le wi na wi kóloyi myɛ ni, paragi i nyɛ wi Kolocɔlɔw kpaʔa ni.

⁹ Pe n jée n cùru kálagimi ni, mɔ a jo àmɛɛ gi pye lè Gibeya cányi na. Yawe a sɔ̀ngí taa be kolomi na, wi a keele tɛ́ʔɛ be na kapeegèle kéele na.

Yawe fúnbɛɛnri kéele

¹⁰ «Mii n Isirayɛli caa n nyaa fìími tára ni àmɛɛ ɛrɛzɛn nyɛ lè, mii n yele tóobèle nyaa àmɛɛ děsyaantiige yasanzelire nyɛ lè. Kàjáa pe n kári Baali-Peyɔɔri ma, pe n peyɛɛ gaan yasun-nɔ́nʔɔgi ma, ní baa pye yanɔnʔɔyɔ àmɛɛ be tàmagi yáriga nyɛ lè.

¹¹ Efirayimi nìjanri a yìri bi kári àmɛɛ féjɛɛnnɛ nyɛ lè, pyà a ní see yaà í, fícɛnnɛfɔlɔ a ní pye yaà í, fícɛnnɛ a ní taa yaà í.

¹² Alí pe ga ni be pìíbèle gbóo, mii a be bɔ̀nɔ be ni sáni pe lɛɛ bi nìri lè, mii ga kàdoʔo wáa be ma lǎli ni lè, wɔʔɔli a pye be na.

¹³ Mii maa ni Efirayimi nyaagi wojɔ́rɔɔ ní yaweenaʔa-tɛ́ɛcànga ni àmɛɛ Tiiri nyɛ lè. Kàjáa Efirayimi n baa nyɛ́nɛ n wòlo bi tórigo ní wi pìíbèle ní wee má wi a be kpóo lè.»

¹⁴ Pe kaan, ee Yawe! Nyàʔá mɔ a kaan be ma? Ficarikalagi-láaya kaan be ma, ní yiremɛ fun yiregéle.

¹⁵ «Pe péemi myɛ i tèé Giiligali ni. Nɛɛ bee be kéeli mii bɛɛn. Mii a be nɛnɛ mii kpáagi na be péemi kapyere kéele na. Pe kéeli a ní mii dɛ́nɛ í. Pe kùndigibèle myɛ i nyɛ niceebéle.

¹⁶ Efirayimi n kpúmɔn, wi nǐnri n waʔa, pe a ní yasanra san í. Alí pe ga pìibēle taa mii a be láayi pìinidaanmabéle kpóo.»

¹⁷ Mii Kolocɔlɔw a be cée, níì cán pe ga lóʔo wi ma í, pe a ra curugu da máari syɛɛnfeleyi nínge ni.