Oze sɛ́bɛw 8 - Cebaara Bible 2010

Wee wi káfalagi lúru lè, káfalakpɔɔgi wi a ba láa

¹ Tòmaagi taʔa nyɔ́ɔgi na. Nigoò i maa Yawe kpáagi kánma na àmɛɛ nyɔɔ̀ nyɛ lè. «Níì cán pe n mii joogaanni kálagi, pe n mii làlwaw cée.

² Pe a ra yákpogèle wáa mii kurugo si jo: ‹Mii Kolocɔlɔɔ, wolo n mɔ cán, wolo wo nyɛ lè Isirayɛli ye.›

³ Isirayɛli n kacǎnni cée. Nigoò a taʔa wi na da nɛnɛ.

⁴ Pe n fànʔafɔɔlɔ télege mii nyɔɔ fun ni, pe n kùndigibéle télege n gi yaʔa mii ga kàa cán gi ni í. Pe n be wálifiiw, ní be tɛ́ɛw tɛ́ʔɛ n yasunyo sámaga jàngó bi kálagi yiri yaà.

⁵ Mii o mɔ náapiigi caa í, Samarii! Mii fúngi n tanʔa yele kurugo. Làlìí ni yele a láʔa nya kolomɔ funmi céele na?

⁶ Isirayɛli má gi yìri, fáliw kacanwaa wi gi sámaga, náapiigi bee o nyɛ Kolocɔlɔɔ í. Koro na Samarii náapiigi a tɔ̀nɔ́ ba tɔ́nʔɔnɔ.

⁷ Amɛɛ pe káfalagi lúru lè, káfalakpɔɔgi pe a ba láa. Pe a bilekanga taa í. Gee ki a fìin lè, ki a pye míimɛ wóʔo í, àlí ti ga maa san nibɔnbéle pe a dée di jɔ́ɔ.

⁸ Pe n Isirayɛli ye jɔ́ɔ! Pe n pye tɔ́ɔliw ni syɛɛnfeleyi nínge ni àmɛɛ kanyɔɔnɔ fun yalege nyɛ lè.

⁹ Níì cán pe n lúgu n kári Asirii ma àmɛɛ seʔe jofani nyɛ, wee wi canʔana ni yèré lè wi nibin. Efirayimi n wi tàmagi levɔɔlɔ syɔɔ lɔrɔ na.

¹⁰ Alí yakaanri myɛ pe wírē kaangi syɛɛnfeleyi ma lè, mii a be kpóʔoro peyɛɛ na tɔ́ɔliw ni. Cɛɛri ga pye pe a ra wɔʔɔ fànʔafɔbiigèle fànʔafɔlɔ túgoro láara ni.

¹¹ Efirayimi n sáriga-wòlo-yafaanyi nɛʔɛ kapeebyeri mɛ́ʔɛ na, yi ga yafyɛn nyɔɔ wi na kapye n wi lége kapeebyeri ni ban í.

¹² Alí mii ga mii làlwaw kajoogéle myɛ fílige n sɛ́bɛ wi ma, ke n córo yanibɔngɔ.

¹³ Sárigaw yaweegéle be kaangi mii ma lè, pe i ge kúu ní i ge káari káa, mii Yawe si ga fɔ̀lɔ ge na í. Tɔ́ɔliw ni Yawe i sɔ̀ngí ni taagi be kolomi na, wi a be wɔʔɔ be kapeegèle kéele na, pe a lúru kári Ezyipiti ma.

¹⁴ Isirayɛli n fɛ̀ʔɛ wi Faanfɔw na, níì fànʔafɔ-gbaaya faan, Zyuda si na, woro n kèniriyi nɛʔɛ. Kàjáa mii a náagi tórigo ki sa jée be kěyi ni, ki a yi kpaakpoloyi sórigo.»