Oze sɛ́bɛw 7 - Cebaara Bible 2010

Kanyaʔamiri féleye myɛ ní kálagigbɔɔli li maa lè

¹ «Lǎli ni mii da ni caa bi Isirayɛli pɔʔɔ lè, a Efirayimi kolomi, ní Samarii kanaa-sìnbyeri tiyɛɛ dɛ̀ɛn, níì cán pe n námara kpéʔele. Kàyuuw i jǐn kpáagi ni, kàyuu-fànʔafɔbèle i yáriri nɛnɛ ni syoo kàfugi na.

² Pe si o gi nyuu peyɛɛ ma be fúnyi ni n jo mii i sɔ̀ngí ni taagi poro péemi myɛ na í. Tɔ́ɔliw ni pe kapyegèle si n be màʔa n kpàra, mii nyɛ́nɛ i nyɛ ge na.

³ Pe i fundaanra kaangi fànʔafɔw ma ní be péemi ní, ni fundaanra kaangi be fànʔafɔbiigèle ma ní be námara kérigèle ní.

⁴ Pe myɛ i nyɛ kanɔnʔɔbyebèlē, pe i nyɛ àmɛɛ fúru nyɛ, wee búrukpumɔɔn wáriga lè. Wi ga míibirigegi waari n kwɔ́ɔ lǎli ni lè, wi n kàjenyunyi kpèʔelele yaʔa, fwɔɔ bi taa míibirigegi í ba yìri.

⁵ Wolo fànʔafɔw fɛ́tii canʔa na, syɛɛnkpolobèle i yaama cáan peyɛɛ na ní dùvɛɛnw ní. Fànʔafɔw i kɔ́gi sáanri nɛ̀ɛnyɛnɛgi fɔ̀ɔlɔ ma.

⁶ Bele be peyɛɛ gaan làra-mí-sigeli ma lè, pe i be fúnyi wáragi àmɛɛ fúru nyɛ, wee búrukpumɔɔn wi ŋúnɔ ni syɔ̀ɔ́n lè, nyǐngi nyɔ́ɔ na, fúruw si n wári àmɛɛ naanyìnge nyɛ lè.

⁷ Pe myɛ n wári àmɛɛ fúru nyɛ lè, pe i be kútiijoobèle káa. Pe fànʔafɔbèle myɛ i tuun, pe wàa faala o mii mɛ́ɛgi yiri í.

⁸ Efirayimi i wiyɛɛ nyáʔami syɛɛnfeleyi ni, Efirayimi n baa pye àmɛɛ kàgbalanaa-sìngarigaga nyɛ lè.

⁹ Nibɔɔnnɔ i wi fǎngi káa, wi si ga koro cán í, lɛ́ɛri i wi có, wi si ga gee bee cán í.

¹⁰ Isirayɛli ye nɛ̀ɛnyɛnɛgi i séeraw kpéʔele be kánmi na. Pe o lúrugu ni maa Yawe be Kolocɔlɔw ma í, àlí koro ní ki myɛ ní, pe o wi caa í.

¹¹ Efirayimi ye i nyɛ àmɛɛ nidolimɔ ní sícilimɛ fun kàtolo nyɛ lè. Pe n Ezyipiti yeri, pe i syée Asirii ma.

¹² Lǎli ni be syée yaà lè, a mii i mii cɔ̀ɔ́w cáan be na, mii i be kíle ni cáan àmɛɛ nyɛ̀ʔɛni féjɛɛngèlē nyɛ lè. Gee ki da joo be ma be syɛɛnkpoʔolomi ni lè, mii i be kpúmɔn ni yɛlɛgi ní koro ní.

¹³ Wɔʔɔlɔ i nyɛ be na, níì cán pe n fàn n léeli mii na! Kálagila i be na, níì cán pe n peyɛɛ bye niceebéle mii kánmi na! Mii maa ni caa bi be nyúnyi syɔɔ, a be si jànvaa joo mii kánmi na.

¹⁴ Pe o yákpogèle wáa mii kurugo ní be fúnyi myɛ ní í. Kàjáa a pe i nyaan ni peele n be yaʔa be yasinɛyi na, pe i peyɛɛ gbóʔoro bilew ní dùvɛɛnfɔnw kéele na, kàjáa ní i céemi kpéʔele mii kánmi na.

¹⁵ Mii wi be tama, mii n fànʔa le be kɔ́yi ni. Kàjáa pe i kapeʔe tímana mii kánmi na.

¹⁶ Pe i lúrugu ni maa, kàjáa wee wi nyɛ Pe Myɛ Nyúngo na lè, woro ma ban í. Pe i nyɛ àmɛɛ námara sedege nyɛ lè, Ŋɔsée a be kùndigibèle kpóo cáan pe nyíngèle péemɛ kéele na. Koro na pe a pye kataanra yárigéle Ezyipiti tári ni.»