Oze sɛ́bɛw 6 - Cebaara Bible 2010

¹ «Yaa maa, wo lúru wo pan Yawe ma! Wi n suluguli kpéʔele, kàjáa wi a wolo pɔʔɔ. Wi n kpúmɔnri kpéʔele, kàjáa wi a wolo námiyi pwɔɔ.

² Wi a sìíw kaan wolo ma nɛɛ ní canya siin fúngo ni. Candaanri wógi na wi a wolo yìrige, wolo a kòro sìi na wi yɛʔɛ̀ ma.

³ Wo wi cán, wo kanmaa caa wo Yawe cán. Amɛɛ nyǐnjerigi panna nyɛ lè kakabalaga fun ni, ànbée wi panni wɔ́ɔ i nyɛ. Wi a pan wolo ma àmɛɛ zàʔá nyɛ lè, àmɛɛ nyìnbegéle nyɔ́ɔ zàʔá nyɛ, gee gi tári fɔɔnri lè.»

⁴ «Nyàʔá mii yɛlɛ bi pye mɔ na Efirayimi? Nyàʔá mii yɛlɛ bi pye mɔ na Zyuda? Yele tàmagi i nyɛ àmɛɛ nyɛ̀ʔɛ nyɔ́ɔ fàfanʔa nyɛ lè, ní àmɛɛ nyɛ̀ʔɛ nyɔ́ɔ kásaga nyɛ, gee gi kwóo lè.

⁵ Koro na mii kanyaajoobèle tɛ́ʔɛ n be sála n wo, mii n be kpóo ní mii nyɔ́ɔgi syɛ́ɛnrɛ ní. Mii kútiiw kèlē i yirigi àmɛɛ gbɛ̀ɛnmɛ nyɛ lè.

⁶ Níì cán funjǎngi mii caa, sáriga ban mii caa í, Kolocɔlɔɔ cánni mii caa n sɔ̀lɔ sáriga-sórigow na.»

Kapeeyi kéele Isirayɛli ni

⁷ «N yɛlɛ ní syɔɔn ye kánmi ní, pe n joogaanni kálagi. Nɛɛ bee pe mii jànváa.

⁸ Galaadi i nyɛ kapeebyebèlē kaʔa, ki n nyìn sìsyaanw túluyo na.

⁹ Amɛɛ kàyuu-fànʔafɔɔlɔ làrá ni syɔɔn sige lè, ànbée sáriga-wòlobèle kabiga syɛ́ɛnbèle sige ni kúu Sisyɛmi kólogi na. Gee bee i nyɛ kapeekpɔʔɔ!

¹⁰ Mii n yanɔnʔɔyɔ nyaa Isirayɛli kpáagi ni, nɛɛ bee Efirayimi nyɛ ni kanɔnʔɔri kpéʔele, Isirayɛli i wiyɛɛ nɔ́ɔnri.

¹¹ Yaliilaara kéele n sámaga n yaʔa mɔ ma wɔ́ɔgēle Zyuda, lǎli ni mii ga mii syɛ́ɛnbèle yirige yaà púlori ni n lúrugo n pan lè.»