Oze sɛ́bɛw 5 - Cebaara Bible 2010

Isirayɛli tamafɔbeebèle kéele

¹ «Yele sáriga-wòlobèle, ye gee naa lóʔo! Isirayɛli kpáagi wòolo, ye sámaga ye lóʔo! Fànʔafɔw kpáʔa wòolo, ye líiyi cáan! Níì cán yele má kútiiw nyuu ni wáa, ncan yele n pye karinyanga Misipa ni, ní cɔ̀ɔ, wee be cáan Tabɔɔri nyanbelegi na lè.

² Syɛɛnnaa-sìnzinbéle n kàa fàra kpóogbɔɔli na, mii si a pe myɛ kpúmɔn.

³ Mii n Efirayimi cán, Isirayɛli ga làra mii na í. Níì cán tɔ́ɔliw ni, Efirayimi, mɔ n kanɔnʔɔrɔ kpéʔele, Isirayɛli n wiyɛɛ nɔ́nʔɔ.»

⁴ Pe kapyegèle i be yéregi pe lúrubanni na pe Kolocɔlɔw ma, níì can kanɔnʔɔri sɔ̀ngurɔ i nyɛ pe níngi ni. Ncan pe ga Yawe cán í.

⁵ Isirayɛli nɛ̀ɛnyɛnɛgi i séeraw kpéʔele wi kánmi na. Isirayɛli ní Efirayimi a kpírige too pe sìnzinmi kéele na. Zyuda a wɔ́ɔ kpírige too ní be ní.

⁶ Pe a kári ní be yaweeyiligèle, ní be yaweekpologèle ní bi sa ra Yawe caa, kàjáa pe a wi nyaa í, wi n wàli n láʔa be na.

⁷ Pe n Yawe jànváa, níì cán pe n kanɔnʔɔrɔ piibéle see, tɔ́ɔliw ni, pe ní be kɔlɔ̀ yáriri a káa bi kwɔ́ɔ yeʔe nibin fúngo ni.

Kapɛɛnni Efirayimi ní Zyuda níngi ni

⁸ «Ye tòmaagi wìi Gibeya ni, ye búruw wìi Arama ni! Yaa sùpiigèle wáa Bɛti-Avɛn ni! Wéle mɔ kadoʔo ma, Bɛnzyamɛ!

⁹ Efirayimi a ba kálagi kpúmɔnri canʔa na. Kéelee pyele li lè li a sàa í loro mii nyuu lee Isirayɛli syɛɛnfeleyi nínge ni.

¹⁰ Zyuda kùndigibèle i nyɛ àmɛɛ pèle nyɛ, bele be láʔagoloyi kàragí lè. Mii a mii fundanʔagbɔɔri yàli be na àmɛɛ lɔ̀ʔɔ nyɛ lè.

¹¹ Fǎngi n gbàn Efirayimi na, kútiiw n wi tɔ́nʔɔnɔ, níì cán ki n wi dɛ́nɛ bi taʔa wi tiimaa katimanani na.

¹² Mii si na, mii a pye àmɛɛ káfyaan nyɛ lè Efirayimi ma, ní àmɛɛ yafɔnʔɔgɔ nyɛ lè Zyuda kpáagi wòolo ma.

¹³ «Efirayimi nyɛ́nɛ i nyɛ wi yáami na, a Zyuda nyɛ́nɛ i nyɛ wi námigi na. Efirayimi n kári Asirii ma, níì tundunbéle tun fànʔafɔgbɔɔw ma. Kàjáa fànʔafɔw bee a gbǎn yele pɔʔɔ í, wàlá bi tiinmɛ kpéʔele yele námigi na í.

¹⁴ Níì cán mii tiimaa, mii a pye àmɛɛ càaraɔ nyɛ lè Efirayimi kánmi na, ní àmɛɛ càarabɔ-yɛlɛɔ nyɛ lè Zyuda kpáagi wòolo kánma na. Mii mɔ nyaa lè, mii a tɔ̀nɔ́ sulugulo kpéʔele, koro kàdoʔo ma mii a kári. Yárigi mii cò lè, mii a kári ní gi ní, syɔɔn faala a gi syɔɔ mii na í.»

Bi lúru pan lé Kolocɔlɔɔ ma?

¹⁵ «Mii a kári, mii a lúru kári mii tɛɛkòrogi ma fwɔɔ bi taa pe ba be kolomi nyaa si lúru bàā mii yɛ́ɛgi caa. Pe ga pye wɔʔɔli ni, pe a ra mii caa kányɛʔɛ na.»