Oze sɛ́bɛw 4 - Cebaara Bible 2010

Kolocɔlɔɔ kútiiw, wi syɛ́ɛnbèle kánma na

¹ Ye Yawe syɛ́ɛnri lóʔo, yele Isirayɛli pìíbèle! Níì cán kútii i nyɛ Yawe ma tári syɛ̀ɛnnɛ kánma na. Níì cán wi n jo: «Kányɛʔɛ o beè í, funvii o beè í, Kolocɔlɔɔ cánna o nyɛ tári ni í.

² Yafyɛn o beè kapye jànvaa kàliyi, ní námaraw, ní syɛɛnkpoori, ní kàyuugi, ní kanɔnʔɔri ban í. Kapeeyi be kpéʔele, syɛ́ɛnbèle na be kòro ni kúu.

³ Koro na tári a pye kùu káyaʔa na, bele myɛ be nyɛ di ni lè pe a fána, poro ní sìnbirigi yaweere, ní nyɛ̀ʔɛni féjɛɛnrɛ. Alí sólomi lɔ́ʔɔ fàala a wɔ́ɔ kwɔ́ɔ yiri yaà.»

Sáriga-wòlobèle n jànvaa kpéʔele

⁴ «Kàjáa wàa faala a kɔ́ ra kàkabaga kpéʔele í, wàa faala a kɔ́ ra fúlo wàa na í. Níì cán mɔ syɛ́ɛnbèle i nyɛ àmɛɛ syɛ́ɛnbèle pèle nyɛ, bele be nyɛ kútii na ní sáriga-wòloo ní lè.

⁵ Mɔ a kpírige too cángi làla ni, kanyaajoow ní mɔ a kpírige too yébiligi ni, mii si mɔ nɔ́ɔw kpóo.

⁶ Mii syɛ́ɛnbèle i kúu cánni fɔ̀ngɔ kéele na. Níì cán mɔ n cánni cée, mii a wɔ́ɔ mɔ cée, si mɔ yirige sáriga-wòlori fáli ni. Amɛɛ mɔ fɛ̀ʔɛ mɔ Kolocɔlɔw làlwa na lè, mii a wɔ́ɔ fɛ̀ʔɛ mɔ piibèle na.

⁷ Kánmee na be nɛʔɛ lè, kánmi bee na be kapeegèle kpéʔele mii na, mii a be nìjanri kàriga di pye faʔara kéele.

⁸ Mii syɛ́ɛnbèle kapeele na be líi ní i be sɔ́ɔn paa poro kolomi wonijanma kpéʔele.

⁹ Gee ki a pye syɛɛnsanbèle na lè, koro ki a pye sáriga-wòloo na. Mii a keele tɛ́ʔɛ be na be tánʔaganmi kéele na, mii a be sàra bi yɛlɛ ní be kapyegèle ní.

¹⁰ Pe a ra líi pe si a ra tíngi í, pe a ra kanɔnʔɔri kpéʔele, pe si a ra nɛʔɛgi í, níì cán pe n Yawe yaʔa.

¹¹ Kanɔnʔɔri, ní dùvɛɛnw, ní dùvɛɛnfɔnw i fungo kálagi.

¹² Mii syɛ́ɛnbèle i be tiige yasungi yíbe, pe kàgbeeli li nyuu be ma. Níì cán kanɔnʔɔrɔ pile i be pùuní, pe i kanɔnʔɔri kpéʔele n wàli n léeli be Kolocɔlɔw na.

¹³ Pe i sárigaw wóo nyanbeleyi ǹjoyo ni, pe i nùndaanni yáriga sórogi dǎndamayi na, ní syɛni tíiyi, ní pupiliye tíiyi, ní terebɛnti tíiyi láara ni, yoro yee nyínmɛ bi tɛ́nɛ lè! Koro na yele calipiigèle keyɛɛ gbéʔele nànjaacabala, á yele pìíbèle càbala si i kanɔnʔɔri kpéʔele.

¹⁴ Yele calipiigèle ge nànjaari kpéʔele lè mii a kéele tɛ́ʔɛ ge na í, wàlá yele pìíbèle càbala na àmɛɛ be kanɔnʔɔri kpéʔele lè í, níì cán poro tiimaw i wɛ̀ɛ́ ni syée kanɔnʔɔbyecebèle kurugo, pe ní cêkalagiyi i sárigaw pínɛ ni wóo. Sícilimɛfun-syɛɛnfelegi i fé ni syée gi kálagili ma.

¹⁵ Isirayɛli, àlí mɔ ga miyɛɛ gaan nànjaari ma, Zyuda ga yɛlɛ wi kolomɔ yaʔa bi nan woro na í. Yele a kɔ́ kári Giiligali ma í, yele a kɔ́ lúgu kári Bɛti-Avɛn ma í, yele a kɔ́ ra kɛ̀ɛ́ bàā gi nyuu si jo: ‹Yawe woweew mɛ́ʔɛ na í.› »

¹⁶ Níì cán Isirayɛli n jáma àmɛɛ nìnɔ́ɔjamaga nyɛ lè, tɔ́ɔliw ni Yawe a gi yaʔa paa náari tɛɛfiikpɔʔɔ na àmɛɛ bàpile nyɛ lè.

¹⁷ Efirayimi n wiyɛɛ bwɔɔ yasunyi na. Wi yaʔa yaà!

¹⁸ Pe i láari gbaali na terire, níì fala ni jǐn kanɔnʔɔri ni. Faʔari kèlē n be kùndigibèle dɛ́nɛ.

¹⁹ Káfalagi a be láa gi fókaanyi ni bi kári, fɛ̀ɛrɛ a be taa be sárigaw kéele na.