Oze sɛ́bɛw 3 - Cebaara Bible 2010

Sɛʔɛweleli kéele

¹ A Yawe mii pye: «Ní maa syée mí sa tàmaga le ní céw ní, wee kéele li nànwaa dɛ́nɛ lè, wi si i nyɛ kanɔnʔɔbyeo, tàmaga le ní wi ní àmɛɛ Yawe tàmaga le ní Isirayɛli ye ní lè, àlí bi gi taa pe i kàragí ni syée kolocɔlɔbèle pèle nikwɔɔlɔ kurugo, á ɛrɛzɛn kàgbalayi kéele be dɛ́nɛ.»

² A mii wi syɔɔ wálifiio támabéle kɛɛ ní kagunɔ na, ní orizye lítiribéle dabata-da yalenyɛyɛ kɔrɔni.

³ A mii wi pye: «Kòro mii ma mi làla saʔa kwɔ́ɔ, mɔ a ní kɔ́ ra syée nànjaari kurugo í, wàlá bi ní pye nànwaa nikwɔɔ cɔ́ɔ í ànbée mii a wɔ́ɔ pye mɔ kabangi na.»

⁴ Níì cán Isirayɛli ye a kòro fànʔafɔlɔ ní fànʔafɔbile fun ni, ní sáriga ní yasungaanna fun ni, ní efɔdi, ní ǹdebiigéle fun ni, bi mɔn.

⁵ Koro kàdoʔo ma Isirayɛli ye a lúru pan, pe a ba ra Yawe be Kolocɔlɔw, ní be fànʔafɔw Davidi caa. Pe a ra cɛ̀lɛ́ bàā maa Yawe ní wi funjǎngi ma làrigèle kwɔ́ɔmɔ na.