Oze sɛ́bɛw 2 - Cebaara Bible 2010

Zyizireyɛli cângbɔɔgi kéele

¹ Isirayɛli wóbèle nyɔ́ɔ si a ba pye àmɛɛ sólomi lɔ̀ʔɔ nyɔ́ɔ táminyɔɔ nyɛ lè, wee wi lè wi a gbǎn tímana í, wi a wɔ́ɔ gbǎn córo í. Tɛ́ɛgee ni ki da ni nyuu be ma lè níì jo: «Yele o nyɛ mii syɛ̀ɛnnɛ í!» Ki a ní ba joo be ma tɛ́ɛgi bee ni si jo: «Yele i nyɛ Kolocɔlɔɔ woweew jàala!»

² Zyuda ye, ní Isirayɛli ye a ba kpóʔoro si kùndigi nibin télege peyɛɛ nyúngi na, si yiri tári ni. Níì cán Zyizireyɛli cángi a tɔ̀nɔ́ pye cângbɔʔɔ.

³ Ye gi joo yele senyɛnnǎnbèle ma ye jo: Amii! Yé gi joo yele senyɛnjebèle ma ye jo: «Uruhama!»

Isirayɛli wi lè wi o nyɛ tágala cɔ́ɔ í

⁴ «Ye kolomɔ kaan yele nɔ́ɔw ma, ye kolomɔ kaan wi ma, níì cán wi o nyɛ mii cɔ́ɔ í, mii si wɔ́ɔ o nyɛ wi nàɔn í! Ki n yɛlɛ wi wi nànjaari fɛ̀ɛbēle láʔa yaà wi yɛ́ɛgi na, wi wi kanɔnʔɔbyeri fɛ̀ɛbēle láʔa wi dǒgi na!

⁵ Kapye koro ban í, mii a wi waragi péw, bi wi pye wi canzeegi cére na. Mii a wi kàriga àmɛɛ fìími tára nyɛ lè, bi wi pye àmɛɛ lɔ̀ʔɔ fun tára nyɛ lè, si lògbaalaagi yaʔa ki wi kpóo.

⁶ Mii a nyinimɛ taa wi pìíbèle na í, níì cán kanɔnʔɔrɔ piibéle bɛɛ.

⁷ Pe nɔ́ɔw n wiyɛɛ gbéʔele nànjaaɔ. Céw wi be see lè, wi n fɛ̀ɛrɛ wáa wiyɛɛ na. Ncan wi n jo: ‹Mii a kári nǎnbèle kurugo bele mii kéeli da dɛ́nɛ lè, poro bele be mii lìíli ní mii lògbaagi kaangi mii ma lè, n fàra mii bàsiiri, ní mii lɛnw, ní mii sǐnmi, ní mii yagbaagi na.›

⁸ Gee bee na wéle, mii a wi kólogi tɔ́n ní wúuro tiipiire ní, mii a gi faan sùlu ní gungo ní jàngó wi a ní kɔ́ wi kobiigèle caa nyaa í.

⁹ Wi a taʔa bele na wi kéeli da dɛ́nɛ lè, wi si a be nɛnɛ taa í. Wi a be caa, wi si a be nyaa í. Lǎli bee ni wi a jo: ‹Mii a lúru mii nànzeliw ma, níì cán lǎli bee ni mii maa pye fundaanra na n sɔ̀lɔ lǎli naa na.›

¹⁰ Wi da níì gi cán ncan mii wi da ni bilew, ní dùvɛɛnfɔnw, ní sǐnmi kaangi woro ma í, mii wi da ni wálifiiw ní tɛ́ɛw nɛʔɛgi wi ma, á pe baa wi wàa kaan Baali ma.

¹¹ Gee bee na mii a lúru pan ba mii bilew syɔɔ wi lǎli ni, ní mii dùvɛɛnfɔnw, wi lǎli ni, mii a mii bàsiiri, ní mii lɛnw syɔɔ wi na, dee ti da ni wi níboriw tɔ́ngi lè.

¹² Tɔ́ɔliw ni mii a wi fɛ̀ɛ́ri tɛ́ʔɛ múgu yaʔa bele yɛ́ʔɛ ma wi kéeli da dɛ́nɛ lè, syɔɔn faala a wi yirige mii kɔ́gi ni í.

¹³ Mii a wi fundaanri myɛ kwɔ́ɔ, ní wi fɛ́tiibèle, ní wi yevɔnyi, ní wi cândɛnɛyi, ní wi kpóʔorojǎngèle myɛ ní.

¹⁴ Mii a wi ɛrɛzɛn tíriri, ní wi děsyaantiiri kálagi, dee kéele na wi da ni gi nyuu lè níì jo: ‹Bele mii kéeli dɛ́nɛ lè, sàraw be kaan mii ma lè, woro wii!› Mii a di kàriga kɔligɔ, sìnbirigi yaweere a di lìi.

¹⁵ Cányee na wi da ni nùndaanni yáriga sórogi Baalibèle ma lè, ní i wiyɛɛ vèré ní vèʔebèle, ní kɔ́nɔtiriyi ní, ní i syée bele kurugo wi kéeli da dɛ́nɛ lè, níì fɛ̀ʔɛ mii na, mii a keele tɛ́ʔɛ wi na kérigèle bee na,» Yawe wi jo nya.

¹⁶ «Gee bee na wéle, mii a wi lɛ́ɛlɛ bi kɔ́ri kári fìími tára ni, bi sa wi fúngi kàriga ní syɛɛnrɛ ní.

¹⁷ Mii a wi ɛrɛzɛn séyi kaan wi ma yaà, bi Akɔri jǐnlɔgi kaan wi ma gi pye sɔ̀ngumɔ tɛɛtaʔaga kpaanweele, wi a ra ŋúu yaà àmɛɛ ki da pye wi cárimi làla ni lè, ní àmɛɛ ki da pye cángee na wi da ni yirigi Ezyipiti tári ni lè.»

Bɛ̀ɛ́li canʔa kéele

¹⁸ Kàfɔw Yawe n jo: «Cángi bee na mɔ a ra mii yiri: ‹Mii nǎnw.› Mɔ a ní da mii yiri: ‹Mii Baali› í.

¹⁹ Mii a Baalibèle mɛ́ɛyɛ kwɔ́ɔ yirige wi nyɔ́ɔgi ni, àlí pe a ní sɔ̀ngí taa pe mɛ́ɛyi na í.

²⁰ Cángi bee na mii a joogaanna kpéʔele be ma, ní sìnbirigi yaweere, ní nyɛ̀ʔɛni féjɛɛnrɛ, ní yáriri ní di fulolo tári na lè. Mii a sedegi, ní ŋɔséew, ní kapɛɛnni ceri bi yirige tári ni, mii a be yaʔa paa ŋúnɔ yɛɛ̀nyinge na sági.

²¹ Mii a mɔ cò mii pìcaa ki kòro nya. Mii a mɔ cò mii pìcaa ní sínnɛ, ní funvii, ní funjànga, ní nyinidaara ní.

²² Mii a mɔ cò mii pìcaa ní tágala ní, mɔ si a Yawe cán.

²³ Cángi bee na mii a nyɛ́ɛrigi lóʔo,» Yawe wi jo nya, «Mii a nyɛ̀ʔɛgèle nyɛ́ɛrigɛ lóʔo, ke si a tári nyɛ́ɛrigɛ lóʔo.

²⁴ Tári a bilew, ní dùvɛɛnfɔnw, ní sǐnmi kaan. Koro a pye Zyizireyɛli nyɔɔmi kéele na.

²⁵ Mii a di cariga niyɛɛ wóro tári ni di pye lùguro. Mii a nyinimɛ taa Lo-Uruhama na. Mii a gi joo Lo-Amii ma si wi pye: ‹Mɔ i nyɛ mii syɛɛnfelege!› Wi a gi joo si jo: ‹Mɔ i nyɛ mii Kolocɔlɔɔ.› »