Oze sɛ́bɛw 14 - Cebaara Bible 2010

¹ Samarii a córo kolomɔfɔlɔ, níì cán wi n céemɛ kpéʔele wi Kolocɔlɔw kánma na. Ŋɔséew a be kpóo cáan. Pe pìipiiri a tɔ́nʔɔnɔ, pe cébèle be nyɛ lè ficarigèle fɔ̀ɔlɔ, bele bee a purugu.

Tágala fun syɛɛnfelegi pɔʔɔlɔ kéele

² Isirayɛli, lúru mi pan Yawe mɔ Kolocɔlɔw ma, níì cán mɔ n kpírige n too mɔ kolomi kéele na.

³ Ye kàdowaara syɛ́ɛnrɛ láa ye yaʔa yeyɛɛ ma, yé lúru ye pan Yawe ma. Ye ba gi joo wi ma ye jo: «Kolomi myɛ kùsulugo syɔɔ, mí fɔ̀lɔ wolo na ní funjànga ní! Wolo a ra wolo nyɔɔwari kpɔ̀ʔɔrɔlɔ wóo mɔ ma sáriga náapegèle sìndɛʔɛ ni.

⁴ Asirii ye wów a wolo syɔɔ í. Wolo a ní lúgu kapɛɛnkpumɔn-syɔ́ɔnyɔ na í, wolo a ní gi joo wolo kɔ́yi fáli ma í si jo: ‹Wolo Kolocɔlɔw í!› Níì cán mɔ taana círiw ba ni nyinidaara nyaagi.

⁵ Mii a be tágala funmi yáama pɔʔɔ, pe kéeli a mii dɛ́nɛ gbanʔama, níì cán mii fundanʔari n wàli n láʔa be na.

⁶ Mii a pye Isirayɛli ma àmɛɛ kásaga nyɛ lè, wi a fyɛ́ɛnrɛ kpéʔele àmɛɛ sinbirigi nyàáfyɛɛnrɛ nyɛ lè, si nǐnri tìrige àmɛɛ Liban tíiri nyɛ lè.

⁷ Wi káganyi a cabara. Wi a nyɔɔ àmɛɛ olivye tíige nyɛ lè, wi núngi si tɛ́nɛ àmɛɛ Liban nùndaanni nyɛ lè.

⁸ Bele pe a lúru pan lè, pe a ba ra tɛ̀ɛ́n wi nyínmi ni, pe a ní da lìíli fála da taagi, pe a ra fyɛ́ɛnrɛ kpéʔele àmɛɛ ɛrɛzɛn tírige nyɛ lè. Pe mɛ́ɛgi a yiri àmɛɛ Liban dùvɛɛnw wóʔo nyɛ lè.

⁹ Efirayimi, nyàʔá mii ní i caa ní yasunyo ní? Mii i wi nyɛ́ɛrigi lúro, mii nyɛ́nɛ i nyɛ wi na. Mii a pye wi ma àmɛɛ siipirɛ tiipirige nyɛ lè. Mii má mɔ yasanri yìrigí.»

¹⁰ Wee wi cìlige lè, ki n yɛlɛ wi cánna taa kérigèle bee ni! Wee má cánna nyɛ lè, ki n yɛlɛ wi ge kɔ́rɔw cán! Níì cán Yawe kóloyi n sín. Syɛɛnsinbèle a ra táanri yi ni, kàjáa kapeebyebèle a ra kpírigi da tuun yi ni.