Oze sɛ́bɛw 12 - Cebaara Bible 2010

Ki laà-kwɔ́ɔ syɛɛnfelege nlaa yaà gi sélimi na

¹ Efirayimi n mii màʔa ní jànvaaw ní, Isirayɛli kpáagi wòolo n mii màʔa ní námaraw ní. Kàjáa Zyuda sèʔé i táanri ní Kolocɔlɔɔ ní, wi i nyɛ tágala syɔ́ɔn Kolocɔlɔɔ ma wi lè Wojanw.

² Efirayimi i wiyɛɛ gbóo ní káfalagi ní, níì taʔa canʔafolomɔ kabangi káfalaga na ni nɛnɛ. Wi i kàa fàrá canʔa o canʔa jànvaaw ní tanʔari na. Wi i joogaanna kpéʔele ní Asirii ní, pe i syée ní sìnmɛ ní Ezyipiti ma.

³ Yawe i nyɛ kútii na ní Zyuda ní, wi a keele tɛ́ʔɛ Zyakɔbi na bi yɛlɛ ní wi tánʔaganmi ní, wi a wi sàra bi yɛlɛ ní wi kapyegèle ní.

⁴ N Zyakɔbi yaʔa wi nɔ́ɔw láʔa ni, a wi wi senyɛnw cò yédeleeli na, lǎli ni wi baa lɛɛ n nìri lè, a wi gbɛ̀ɛ cò ní Kolocɔlɔɔ ní.

⁵ Wi n gbɛ̀ɛ cò ní nyɛ̀ʔɛni tunduɔn ní, a wi fànʔa taa, wi n nyɛni níì wi nyɛ́ɛri wi nyɔɔ woro na. Betɛli má Zyakɔbi da wi nyaa, nɛɛ bee Kolocɔlɔɔ joo ní wolo ní.

⁶ Yawe wi nyɛ Kolocɔlɔɔ wi lè Nyɛ̀ʔɛni Sùlasiibéle Kafɔlɔ. Wi mɛ́ɛgi gi nyɛ Yawe.

⁷ Mɔ si na, lúru maa maa mɔ Kolocɔlɔw ma, tàmagi ní sínni sámaga mi cò, mí miyɛɛ daʔa mɔ Kolocɔlɔw na làla o làla.

⁸ Námara cúlobéle i nyɛ Efirayimi kɔ́yi ni àmɛɛ Kanaan ye nyɛ lè, syɛɛnnɔʔɔrɔgi n wi dɛ́nɛ.

⁹ Efirayimi i gi nyuu níì jo: «Kányɛʔɛ na, mii n lɔrɔ taa, mii n lɔnɛʔɛrɛ caa n taa. Mii fáliw tɔ̀nɔ si wi kélemi. Pe a tée kolomɔ kéele nyaa mii na, lee li lè kapeele í.»

¹⁰ «Mii si na, mii wi nyɛ Yawe mɔ Kolocɔlɔw, n séli yaà Ezyipiti tári ni. Mii a ní ba mɔ télege fànikpaaya ni àmɛɛ gi kpéʔele kpóʔorojǎngèle canya ni lè.

¹¹ Mii n joo kanyaajoobèle ma, mii n yanyaayi nɛʔɛ, mii n kàseegéle joo kanyaajoobèle nyɔ́ɔyɔ ni.»

¹² Galaadi ye i nyɛ kakolobye-tèlebēle, kányɛʔɛ na pe i nyɛ gbanzan. Pe n kòro ni nǐyi wóo sáriga Giiligali ni. Koro na pe sáriga-wòlo-yafaanyi a ba pye àmɛɛ kàdɛnɛgboogéle nyɛ lè séyi sɔ̀nlɛɛyɛ ni.

¹³ Zyakɔbi n fàn n sáà jée Arami sìnbirigi ni, Isirayɛli n báara cɔlɔɔ na, Wi n yaweere nàʔa cɔlɔɔ na.

¹⁴ Yawe si n kanyaajooo tɛ́ʔɛ n Isirayɛli yirige Ezyipiti tári ni, n kanyaajooo tɛ́ʔɛ n wi kpáaw wéle.

¹⁵ Efirayimi n Yawe fúngi tanʔa gbanʔama, wi Kàfɔw si a wi sìsyaanwori kapeele túgoro taʔa wi na, wi a wi faʔari yaʔa ti lúru kòro wi na.