Oze sɛ́bɛw 11 - Cebaara Bible 2010

Kolocɔlɔɔ tàmagi faʔala ní gi fàndaari

¹ «Lǎli ni Isirayɛli pye lè wojáriɔ ní, wi kéeli maa mii dɛ́nɛ, mii n mii jáaw yeri n yirige Ezyipiti ni.

² Bele si pe da ni be yiri lè, a be i canʔana bele bee na. Pe n sárigaw wòlo Baalibèle ma, níì nùndaanni yáriga sórigo yasunyi ma.

³ Mii si wi Efirayimi tama nyɔ̌nzeligèle láala na, mii wi be cò kɔ́yi na. Kàjáa pe ga gi cán ncan mii wi da ni poro poori í.

⁴ Mii maa ni be kíle ni maa ní funjànga mɛ́ɛngéle ní, ní tàmaga nyɔ̀ʔɔdiriye ní. Mii n pye be ma syɔɔnwaa, wee wi be zúuw sánʔa lè, mii n yaliire kaan be ma.

⁵ Pe a ní lúru kári Ezyipiti tári ma í. Kàjáa Asirii ye wów a ba pye be fànʔafɔw. Níì cán pe n cée, pe ga fɔ̀lɔ n lúru n pan mii ma í.

⁶ Ŋɔséew a fùuri bi too be kěyi na, wi a be kɔ̀risɔ̀ʔɔyi kálagi péw, wi a be lìi pe fúnyi katimanagéle kéele na.

⁷ Mii syɛ́ɛnbèle n peyɛɛ daʔa námaraw na. Pe i be yiri ǹjoʔo ma, kàjáa pe wàa faala ga yìri í.

⁸ Kanmìí na mii a dée gbǎn mɔ yaʔa Efirayimi? Ba mɛ̀ɛ́ mii a dée gbǎn mɔ le kɔlɔ̀ ni, Isirayɛli? Kanmìí na mii a dée gbǎn mɔ kpéʔele àmɛɛ Adima nyɛ lè? Ba mɛ̀ɛ́ mii a dée mɔ kpéʔele àmɛɛ Seboyimi nyɛ lè? Mii fúngi n baa wáa n kàri, mii fúngi yárira myɛ i nyaʔami mii ni.

⁹ Mii a gi kpéʔele bi yɛlɛ ní mii fundanʔari káfugbanga ní í, mii n Efirayimi kálagili kéele yaʔa. Níì cán mii i nyɛ Kolocɔlɔɔ, syɔɔn ban mii nyɛ í, mii wi nyɛ Wojanw mɔ níngi ni. Mii a ní pan ní fundanʔara ní í.

¹⁰ Pe a taʔa Yawe na, wi a ra kaana àmɛɛ càaraɔ nyɛ lè, Níì cán wi a ra kaana, wi pìíbèle si yìri canʔajeemɛ kabangi na bàā cɛ̀lɛ́ sáā fé ra maa.

¹¹ Pe a yìri Ezyipiti ma bàā fé da maa, sáā cɛ̀lɛ́ àmɛɛ féjɛɛnnɛ nyɛ lè, ní Asirii tári ma àmɛɛ kàtolo nyɛ lè, mii si ba be télege be kpáayi ni,» Yawe wi jo nya.