Oze sɛ́bɛw 10 - Cebaara Bible 2010

Sérikologi ní fǎngi kwɔ́ɔmɔ

¹ Isirayɛli maa pye àmɛɛ ɛrɛzɛn tírige nyɛ, gee gi cábiga lè, wi maa ni yasanra sangi. Wi yasanri si maa ni nɛʔɛgi, a wi wɔ́ɔ i sáriga-wòlo-yafaanyi nɛʔɛgi. Wi maa ni yasungaangèle nyɔɔgi ni yɛlɛgi ní wi tári nìjanra ní.

² Pe fúnyi n tíla, tɔ́ɔliw ni, pe a be kolomi túgoro tugo. Yawe a be sáriga-wòlo-yafaanyi cáan, si be yasungaangèle jabagi.

³ Lǎli bee ni pe a gi joo si jo: «Fànʔafɔlɔ o nyɛ wolo ma í, níì cán wolo ga fyáa Yawe na í. Nyàʔá si fànʔafɔw a dée gbǎn kpéʔele wolo ma?»

⁴ Pe i syɛɛnrɛ nyuu, ní i jànvaa kàliyi kɛ̀ɛ́, ní i joogaanna kpéʔele. Kútiiw i fún àmɛɛ nyàápeʔe nyɛ lè séyi sɔ̀nyɔ ni.

⁵ Samarii ye a ra cɛ̀lɛ́ Bɛti-Avɛn náapyaayi kéele na. Syɛ́ɛnbèle a pye kùu káyaʔa na yasungi kéele na, ki sáriga-wòlobèle pe da ni muguri ki kéeli na lè, pe a ra cɛ̀lɛ́ gi kéeli na, ki nìjanri kéele na ti a yiri be níngi ni bi kári lè.

⁶ Pe a gi láa kári Asirii ma, bi sa kaan fànʔafɔw Yarebi ma kpɔʔɔrɔ. Fɛ̀ɛrɛ a Efirayimi taa. Fɛ̀ɛrɛ a Isirayɛli taa wi katimanagèle kéele na.

⁷ Ki n pye Samarii na n kwɔ́ɔ, wi fànʔafɔw n pye àmɛɛ nìmulɔɔlɔ nyɛ lè lɔ̀ʔɔ ǹjoʔo ni.

⁸ Bɛti-Avɛn sáriga-wòlo-tɛ́ɛyi a kálagi, beè Isirayɛli kapeele kpéʔele lè. Solovinge ní wúuro a fìin be sáriga-wòlo-yafaanyi na. Pe a gi joo nyanbeleyi ma si jo: «Ye wolo tɔ́n!» Bi gi joo dǎndamayi ma si jo: «Ye too wolo na.»

Gee Isirayɛli lùgu lè, koro wi a ba láa

⁹ «Isirayɛli, nlaa yaà Gibeya cányi na, mɔ n kapeele pye! Beè be kòro. Kapɛɛnni li nyɛ syɛɛnpeebèle kánma na lè, li a nan be na Gibeya ni ì?

¹⁰ Mii a be kpúmɔn kàriga mii fúngo, syɛɛnfeleyaa a kpóʔoro be kánmi na lǎli ni pe ga ni be pwoo be kapeetɛɛyi siin kéele na lè.

¹¹ Efirayimi i nyɛ náapyaʔa, gee be sámaga n kóro lè, á ki gi dɛ́nɛ bàā yaliiri tánʔana, kàjáa mii a zúu taʔa ki yátiicǎngi na. Mii a nìtěgi pwɔɔ Efirayimi na, Zyuda sáā fála ní gi ní, Zyakɔbi sáā tári fuguri ní kanadyɛnw ní.

¹² Yaa sínni lùguro lúru, yáā funjǎngi yaliilaara kpéʔele, ye sefɔngɔ cáan yeyɛɛ ma! Yawe caali làla n nan fwɔɔ bi taa wi pan ba sínni yàli yele na.

¹³ Yele n péemi fála, ní baa sìnzinmi yaliilaara kpéʔele, níì jànvaaw yasanga lìi. Níì cán mɔ n mɔ sɔngumi taʔa mɔ kólogi na, ní mɔ sanbalipɔbèle na be nɛʔɛ lè.

¹⁴ Kàfulogbɔʔɔ a yìri mɔ syɛ́ɛnbèle nínge ni, mɔ keniriyi myɛ a tɔ́nʔɔnɔ àmɛɛ Syaliman Bɛti-Aribɛli tɔ́nʔɔnɔ kapɛɛnni canʔa na lè, beè be nafɔlɔ pulɔlɔ wi pìibēle na lè.

¹⁵ Gee bee ki a kpéʔele yele na Betɛli ye, yele péemi kéele na bee bi sɔ̀lɔ ki dǎnw na lè. Ki ga pye nyǐnjerigi na, koro a pye Isirayɛli fànʔafɔw kwɔ́ɔmɔ.»