Oze sɛ́bɛw 1 - Cebaara Bible 2010

¹ Yawe syɛ́ɛnri di nan lè Oze na wi lè Beerii jáaw, Zyuda fànʔafɔbèle be pye lè Ozyasi ní Yotami ní Akazi, ní Ezekyasi, poro lǎli ni, ní Isirayɛli fànʔafɔw Zyerobowami lǎli ni, wi lè Zyowasi jáaw.

Kanyaajoow narigbaʔa, Kolocɔlɔɔ joozelili

² Syɛ́ɛnri sélimɛ bi bee naa, dee Yawe joo Oze ma a wi joo lè, Yawe n Oze pye: «Da syée mi sa kanɔnʔɔbyecewaa láa mi kanɔnʔɔrɔ piibéle see. Níì cán tári n Yawe yaʔa níì kòro kanɔnʔɔbyeri na!»

³ A wi kári n sáà Gomɛɛri láa wi lè Dibilayimi jáaw. A wi yére fícɛnnɛ na n nànbile see wi ma.

⁴ A Yawe wi pye: «Wi mɛ́ɛgi le paa wi yiri Zyizireyɛli. Níì cán cɛɛri ga pye mii a keele tɛ́ʔɛ Zyehu kpáagi wòolo na sìsyaanw kéele na be wo Zyizireyɛli ni lè, mii a Isirayɛli kpáagi fànʔa kwɔ́ɔ.

⁵ Cángi bee na ki a pye fwɔɔ mii i Isirayɛli sedegi kabi Zyizireyɛli jǐnlɔgi ni.»

⁶ A wi níì yére fícɛnnɛ na n calipile see. A Yawe Oze pye: «Wi mɛ́ɛgi le paa wi yiri Lo-Uruhama. Níì cán mii a ní kòro bàā nyinimɛ taagi Isirayɛli kpáagi wòolo na í bàā be kùsulugi syoo da syée làla o làla í.

⁷ Kàjáa mii a ba nyinimɛ taa Zyuda kpáagi wòolo na. Mii a be syɔɔ Yawe be Kolocɔlɔw báriga ni, mii a be syɔɔ sedegi báriga ni í, wàlá ŋɔséew, wàlá kapɛɛnni, wàlá syɔ́ɔnyi wàlá syɔɔnfanbèle báriga ni í.»

⁸ A wi Lo-Uruhama láʔa yíremi na, ní níì yére fícɛnnaa na n nànbile see.

⁹ A Yawe jo: «Wi mɛ́ɛgi le paa wi yiri Lo-Amii. Níì cán yele o nyɛ mii syɛ̀ɛnnɛ í, mii si wɔ́ɔ o nyɛ yele wóo í.»