Ŋúnuyi 98 - Cebaara Bible 2010

Ŋúnuyi 98 Yaa fundaanra yákpogéle wáa Yawe ma wi maa lè

1 Ŋúnugo.

¹ Ŋúnugo. Yaa ŋúnuvɔngɔ ŋúu Yawe ma! Níì cán wi n bìngaataa-kele kpéʔele. Wi kàliigi ki lè kɔjǎngi wi i syɔɔli kpéʔele gee bee báriga ni.

² Yawe n wi syɔɔli tɛ̀ɛn, wi n wi sínni yirige gbɛ̀ɛ́nmi na syɛɛnfeleyi nyɛ́nɛ na.

³ Wi n sɔ̀ngi n taa wi funjǎngi ní wi kányɛɛgi na Isirayɛli kpáagi wòolo ma, tári láʔagéle myɛ wòolo n syɔɔli nyaa, lee wolo Kolocɔlɔw kaan lè.

⁴ Tápow, yaa fundaanra yákpogéle wáa Yawe ma! Yaa muguri, yáā ŋúu ní fundaanra ní, yáā kɔ̀nʔɔri kɔ̀nʔɔ́!

⁵ Yaa Yawe kpɔ̀ʔɔrɔli ŋúnuyo ŋúu ní kɔ̀ríw ní. Yaa gi kpéʔele ní kɔ̀ríw ní, n fàra ŋúnuyi ŋùumɔ na.

⁶ Yaa ŋúu ní fundaanra ní Fànʔafɔgbɔɔw Yawe yɛ́ʔɛ ma ní búrubéle wiimɛ, ní tòmaayi wìimɛ ní!

⁷ Ki n yɛlɛ sólomi lɔ̀ʔɔ ní gi fúngi yárira myɛ í da tìngbɔɔmɔ kpéʔele n fàra tári, ní bele myɛ na be nyɛ di na lè.

⁸ Ki n yɛlɛ cábiyi í da kadaʔala kóri, nyanbeleyi si pínɛ bàā fundaanra ŋúnuyo ŋúu

⁹ Yawe yɛ́ʔɛ ma! Níì cán wi i maa bi ba kútiiw ceri tári na. Wi a ba kútiiw ceri dulunyanw na ní sínnɛ ní bi syɛɛnfeleyi kútii ceri ní kányɛɛgi ní.