Ŋúnuyi 97 - Cebaara Bible 2010

Ŋúnuyi 97 Yawe wi nyɛ fànʔafɔw. Fundaanra i nyɛ tári myɛ ni

¹ Yawe i nyɛ wodɛ́ɛɔn ní fǎngi na. Tári n yɛlɛ taa muguri, lǒgi nínge tátɛɛnɛʔɛrɛ n yɛlɛ taa fundaanra kpéʔele!

² Fàfaankpɔʔɔ ní yébiliwɔɔlɔ n wi màʔa sínni ní kányɛɛgi i nyɛ wi fàngoli kàpɔɔn.

³ Naà i syée wi yɛʔɛ̀ ma, ki i wi kasiitun-nyɛ́nbèle líile ni wi máari.

⁴ Wi nyɛ̀ʔɛni nyɛ́ʔɛnɛmɛ i gbɛ̀ɛnmɛ yirigi dulunyanw ma, tári i gee bee nyaagi, a di i cúngu.

⁵ Nyanbeleyi i nyangi Yawe yɛ́ʔɛ ma àmɛɛ sékuro nyɛ lè, yi i nyangi tári myɛ Kàfɔlɔ yɛ́ʔɛ ma.

⁶ Nyɛ̀ʔɛgèle i wi sínni kéele jáari, syɛɛnfeleyi myɛ si i wi nìjangbɔɔri nyaagi.

⁷ Bele myɛ be yasunyi sungu lè, fɛ̀ɛrɛ a be taa, poro bele be peyɛɛ gbɔ́ʔɔgi ní yasunyi kéele ní lè. Kolocɔlɔbèle wozanbèlē myɛ, yaa tíri yaa tuun Yawe yɛ́ʔɛ ma.

⁸ Siyɔn n gee bee lóʔo, ní i fundaanra kpéʔele, Zyuda calipiigèle i muguri mɔ kútiiw cerile kéele na, ee Yawe!

⁹ Níì cán mɔ Yawe i nyɛ Pe Myɛ Nyúngo na tári myɛ ǹjoʔo ni, mɔ i nyɛ kolocɔlɔbèle myɛ nyúngo na ǹjoʔo ma gbanʔama.

¹⁰ Yele bele Yawe kéeli dɛ́nɛ lè, ye kapeegi yaʔa ki yele bɛɛn! Wi i wi tágala syɛ́ɛnbèle sìi kpáa wéle, wi i be yirigi syɛɛnpeebèle kɔ́yɔ ni.

¹¹ Gbɛ̀ɛ́nmi i nyín syɛɛnsinw ma, bele fúnyo yi sín lè, fundaanra i nyɛ bele bee ma.

¹² Yele syɛɛnsinbèle, yaa fundaanra kpéʔele Yawe ni, yé yele sɔ̀ngumi yaʔa wi sínni na yaa wi kpɔ̀ʔɔrɔ́.