Ŋúnuyi 95 - Cebaara Bible 2010

Ŋúnuyi 95 Lǎli ni syɔɔn a ba yére Yawe yɛ́ʔɛ ma lè

¹ Yaa maa wo ba ra fundaanra yákpogéle wáa Yawe ma! Waa fundaanra yákpogéle wáa wolo syɔɔli Fálaga ma.

² Ye bo waa maa wi yɛʔɛ̀ ma ní bariga kaanna ní, waa fundaanra yákpogéle wáa wi ma ní ŋúnuyo ní.

³ Níì cán Yawe i nyɛ Kolocɔlɔɔ, wee wi kpɔ́ʔɔ lè, wi i nyɛ Fànʔafɔgbɔɔɔ, wee wi nyɛ lè kolocɔlɔbèle myɛ nyúngo na.

⁴ Tári tɛɛcùruyo i nyɛ wi kɔ́gi ni, nyanbe-nyundɔnɔyi ǹjoyo wɔ́ɔ i nyɛ wi woyò.

⁵ Sólomi lɔ̀ʔɔ i nyɛ wi woʔò, woro wi gi kpéʔele. Woro kɔ́yi yi wɔ́ɔ̀ tári sámaga.

⁶ Yaa maa wo ba tìgi wo too tári na, wo tìgi wo kpùmɔnɔ, wo yégunri cáan wo Faanfɔw Yawe yɛ́ʔɛ ma.

⁷ Níì cán woro wi nyɛ wolo Kolocɔlɔw, wolo i nyɛ wi syɛ̀ɛnnɛ, bele wi náari lè, ní wi bàala, bele wi kɔ́gi kɔ̀rɔsíi lè. Yele ga wi yákpoli lóʔo níjanʔa,

⁸ yele a kɔ́ yele fúnyi gbàn àmɛɛ ki da kpéʔele Meriba ma lè í, àmɛɛ ki da pye lè Masa cángi na, fìími tára ni lè í,

⁹ tɛ́ɛgee ni yele tóolɛɛbèle da mii pye n wéle lè, si mii kánmi cán, àlí bi gi taa pe maa ni mii kapyegèle nyaagi.

¹⁰ Yɛ̀ʔɛlɛ togoye siin fúngo ni, a yìrili bee syɛ̀ɛnnɛ láa wòlo mii ni, a mii jo: «Syɛɛnfelegaa gii, gee fúngo gi kólogi yaʔa lè. Pe ga mii kólogi kèlē cán í.»

¹¹ Koro na mii fundanʔaratɔw wɔ́ɔ̀ kàli níì jo: «Pe a tée jée mii ŋɔ́ndaali ni nyáana í!»