Ŋúnuyi 94 - Cebaara Bible 2010

Ŋúnuyi 94 Kolocɔlɔɔ wi nyɛ sìnzinmi gɔ̀lɔ-wòloo

¹ Ee Yawe, mɔ wi lè Kolocɔlɔɔ, wee wi kapeegèle gɔ̀lɔ́ wóo lè, ee Kolocɔlɔɔ, mɔ wi lè kapeegèle gɔlɔ́-wòloo, miyɛɛ dɛ̀ɛn mɔ gbɛɛnmi ni.

² Ki n yɛlɛ mi yìri, tári kútiicerio, mi nɛ̀ɛnyɛnɛgi fɔ̀ɔlɔ sàra mi yɛlɛ ní be kapyegèle ní.

³ Làla jòorí syɛɛnpeebèle a kwɔ́ɔ, ee Yawe! Làla jòorí syɛɛnpeebèle a kwɔ́ɔ fàndaari na?

⁴ Pe i nyuu saʔa, pe i nyuu ní tanʔara ní. Pe i peyɛɛ gbɔ́ʔɔgi, syɛɛnpeebèle myɛw.

⁵ Pe i mɔ syɛ́ɛnbèle tɔ́nʔɔnɔ, ee Yawe, pe i be wɔʔɔ, bele be lè mɔ kɔ́rigi.

⁶ Pe i lɔgucaa ní nibɔɔn kɔɔn, pe i círibèle kúu.

⁷ Pe i gi nyuu níì jo: «Yawe o gi nyaagi í, Zyakɔbi Kolocɔlɔw yákirii o gi na í.»

⁸ Ki n yɛlɛ yaa kɔ̀rɔsíi, yele bele ye labala n sɔ̀lɔ syɛɛnsanbèle myɛ na lè. Yele yákiri-fùnvɔbèle, làlìí ni yele a yákirii taa?

⁹ Wee wi líigi táriga syɔɔn na lè, wee bee í pye lé wi a ra lúro í? Wee wi nyapili sámaga lè, wee bee í pye lé wi a kɔ́ ra nyaagi í?

¹⁰ Wee wi syɛɛnfeleyi kpúmɔn ni kàragí lè, woro wee wi syɔɔn ye tama kacánmi na lè, wee bee í kòro lé kpumɔnrɔ sìngbeʔele ni?

¹¹ Yawe n syɔɔn ye sɔ̀nguri cán! Ti i nyɛ gbanzan!

¹² Syɔɔnwee mɔ kpúmɔn ni kàragí lè, wi i nyɛ dùba pyà, ee Yawe! Woro wee mɔ tama mɔ lalwaw na lè,

¹³ koro ga pye bi ŋɔ́ndaala kaan wi ma wɔʔɔgi canʔa na, sáni weekpɔɔgi í túgu syɛɛnpeew kéele na lè!

¹⁴ Níì cán Yawe a tée wi syɛ́ɛnbèle yaʔa í, wi a tée wi kɔ́rigi wáa bi yaʔa í.

¹⁵ Níì cán kútiiw a lúru da síngi, bele myɛ fúnyo si yi sín lè, poro a ra táanri sínni ni.

¹⁶ Wìí wi a yìri mii ma syɛɛnpeebèle kurugo? Wìí wi a yìrí yére mii ma syɛɛnnaa-sìnzinbèle kánma na?

¹⁷ Kapye Yawe da mii dɛ̀ɛmɛ í, mii pǐli a dée tée jée kelekele joomɔ fun tɛɛkòrogi ni.

¹⁸ Lǎli ni mii ga joo lè: «Mii tɔ́lɔgi i kólogi yaari,» lǎli bee ni mɔ funjǎngi n mii tɔʔɔ n yérige, Yawe.

¹⁹ Lǎli ni mii funzɔngumi kèlē ga nɛʔɛ lè, mɔ kɛɛlɛli kèlē n fundaanra le mii fúngi ni.

²⁰ A syɛɛnkpoo-kútiijoobèle a gbǎn wɔ́ɔ lé ní mɔ ní yarigaa na, poro bele be kapeeyi sélegi lè, yee yi lè yi ga bɛ̀ɛ ní làlwabèle ní í?

²¹ Pe i peyɛɛ gbóʔoro syɛɛnsinw sìi kánma na, ní i kolomɔ kaangi tɛɛlɛ fun sìsyaanw ma.

²² Kàjáa Yawe wi nyɛ mii Kènirigi, mii Kolocɔlɔw wi nyɛ mii tɛɛlaragi fálaga.

²³ Wi a be kolomi yaʔa bi lúru kòro be na, wi a be péemi tɛ́ʔɛ bi be nyɔ́ɔyi tɔ́n. Yawe wolo Kolocɔlɔw a be nyɔ́ɔyi tɔ́n.