Ŋúnuyi 92 - Cebaara Bible 2010

Ŋúnuyi 92 Ki tɔ̀nɔ́ i nyɛ kacànga bàā mɔ sòoló Yawe

¹ Kpɔ̀ʔɔrɔli ŋúnugo. Cândɛnɛgi canʔa ŋúnugo.

² Ki n tɔ̀nɔ n nyɔɔ syɔɔn í da Yawe kpɔ̀ʔɔrɔ́ bàā mɔ mɛ́ɛgi kpɔ̀ʔɔrɔlɔ ŋúnuyo ŋúu, ee, mɔ wee wi lè Pe Myɛ Nyúngo na!

³ Bàā mɔ funjǎngi kéele nyuu bi séli nyǐngi nyɔ́ɔ na, sáā mɔ kányɛɛgi kéele nyuu yébilige o yébilige

⁴ ní mɛ́ɛngèle kɛɛ kɔ̀rí ní, n fàra dǎngbolo, ní kɔ̀ríw kpúmɔnmɔ na.

⁵ Ee Yawe, mɔ i fundaanra kaangi mii ma mɔ kapyegèle báriga ni! Mii i muguri mɔ kɔ́yi fáli kéele na.

⁶ Mɔ kapyegèle n tɔ̀nɔ n kpólo, ee Yawe! Mɔ sɔnguri n tɔ̀nɔ n cùru.

⁷ Nidoligi ga gee bee cán í, síciligaanna o nyɛ nilabalaw ma í.

⁸ Kapye syɛɛnpeebèle i fún àmɛɛ nyàā nyɛ lè, kapye syɛɛnnaa-sìnzinbèle myɛ i fyɛ́ɛnrɛ kpéʔele, gee bee myɛ kàdoʔo i nyɛ bàngwɔɔ kálagila.

⁹ Kàjáa, Yawe, mɔ i nyɛ ǹjoʔo ma làla o làla bàngwɔɔ!

¹⁰ Mɔ nigoobèle wéle bele, ee Yawe! Wéle, mɔ nigoobèle i kúu. Bele myɛ be kanaa-sìnzinri kpéʔele lè, pe n cariga.

¹¹ Mɔ i fànʔa nii mii ni àmɛɛ senɔ́ɔ wóʔo nyɛ lè. Mɔ n sìnvɔ́nmɔ wo mii na.

¹² Mii i mii labafɔbèle bɔ̀nɔ nyaagi, syɛɛnpeebèle be tuun mii na lè, mii i be yákpowáari lúro.

¹³ Syɛɛnsinw i fún àmɛɛ sɛʔɛtiige nyɛ lè, wi i tɔnɔgi ni syée àmɛɛ Liban sɛdiri tíige nyɛ lè.

¹⁴ Pe n be cɔ́rɔ Yawe kpáagi ni, pe i fyɛ́ɛn wolo Kolocɔlɔw kpaʔa kàcoolo ni.

¹⁵ Alí pe lɛ́ɛri làla ni, pe i sangi, tǔnmi n be nyìn, pe wári n kòro wobirire ní,

¹⁶ koro ga pye pe gi tɛ̀ɛn ncan Yawe n sín. Woro wi nyɛ mii Fálagi, sìnzinmɛ o nyɛ wi na í.