Ŋúnuyi 91 - Cebaara Bible 2010Ŋúnuyi 91 Kolocɔlɔɔ tɛ́ɛgi ni, woro láari ni wi lè Pe Myɛ Nyúngo na 1 Syɔ́ɔnwee wi jée n làra wee láara ni wi nyɛ lè Pe Myɛ Nyúngo na, wee bee n kòro Séew Myɛ Fɔ́lɔ nyínmɛ ni. 2 Mii n gi joo Yawe ma níì jo: «Mɔ wi nyɛ mii tɛɛlaragi ní mii Kènirigi, ní mii Kolocɔlɔw, wee na mii niyɛɛ daʔa lè.» 3 Níì cán woro wi a mɔ syɔɔ cɔ̀ɔcáanw cɔ̀ɔ ma, ní syɛɛnkpóo-káfalagi yáama ma. 4 Wi a wi fókaanyi síire tɛ́ʔɛ bi mɔ tɔ́n, mɔ a làra wi fókaanyi láara ni. Wi kányɛɛgi i nyɛ tunmɔzige-yariga, ní tunmɔrɔ-búrogo. 5 Mɔ a tée fyáa yébiligi fyáakpɔɔrɔ yáriga na í, wàlá cángi làla ŋáʔa na gi sɔ̀lɔ́ ǹjogi ni lè í. 6 Wàlá káfalagi yáama na bi sɔ̀lɔ́ yébilimi ni lè í, wàlá yáami na, bee bi gàlagíw kpéʔele cânvulɛɛli na lè í. 7 Alí kálagili bee ga syɛ̀ɛnnɛ saala kagunɔ cáan mɔ taana, á selebingéle kagunɔ too mɔ kaliige ma, yafyɛn a nan mɔ na í. 8 Mɔ a ba ra gi wéle wii yagana ní mɔ nyapiigèle ní, bi gi nyaa kánmee na syɛɛnpeebèle a sàra lè. 9 Níì cán mɔ wi nyɛ mii tɛɛlaragi, ee Yawe! Wee wi nyɛ Pe Myɛ Nyúngo na lè, woro mɔ kpéʔele mɔ tɛɛsyɔɔli. 10 Kapeʔe faala a nan mɔ na í, wɔʔɔlɔ faala a tée nùuni mɔ fanikpaagi na í. 11 Níì cán wi a mɔ kéeli joo gbàn wi nyɛ̀ʔɛni tundunbéle ma. Paa mɔ kpáaw wéle mɔ kozɔ̀lɔyi myɛ ni. 12 Pe a mɔ tɔʔɔ cò kɔ́yi ni jàngó mɔ tɔ́lɔgaa a kɔ́ círi kàdɛnɛgaa na í. 13 Mɔ a tánʔa sɔ̀lɔ càaraw ní màátɔnw na, mɔ a càarabiigi ní diragɔnw tánʔana. 14 «Amɛɛ mii kéeli wi dɛ́nɛ lè gbanʔama, koro na mii a wi syɔɔ. Mii a ra wi kpáaw wéle, níì cán wi n mii mɛ́ɛgi cán. 15 Wi a mii mɛ́ɛgi yeri, mii a lóʔo wi ma. Mii a pye ní wi ní wɔʔɔgi làla ni, mii a wi syɔɔ si wi kpɔ́ʔɔ. 16 Mii a sìinɛʔɛɔ kaan wi ma wi tín, si gi yaʔa wi mii syɔɔli nyaa.» |
Kolocɔlɔɔ Syɛ́ɛnri © Bible Society of Côte d'Ivoire, 2008.
Bible Society of Côte d'Ivoire