Ŋúnuyi 90 - Cebaara Bible 2010

SƐBƐSICƐRƐ WOW ( 90—106 ) Ŋúnuyi 90 Syɔɔn i sɔ̀lɔ́, Kolocɔlɔɔ si i beè

1 Mowizi wi lè Kolocɔlɔɔ syɔ́ɔnw, woro nyɛ́ɛrigi.

¹ Mowizi wi lè Kolocɔlɔɔ syɔ́ɔnw, woro nyɛ́ɛrigi. Kàfɔw, mɔ wi nyɛ wolo tɛɛlaragi, wolo yìrigèle myɛ syɛ̀ɛnnɛ ma.

² Sáni nyanbeleyi í see lè, n tári ní dulunyanw yaʔa mɔ da kɔ́ɔ̀ di sámaga í, nlaa yaà làrigèle myɛ ni kwɔ́ɔmɔ fun, mɔ wi nyɛ Kolocɔlɔɔ.

³ Mɔ i syɔɔn lúrugu ni légi támiigi ni, ní i gi nyuu níì jo: «Yele Adami pìíbèle, ye lúru yaa syée beè yele yìri lè!»

⁴ Níì cán yɛ̀ʔɛlɛ saala kagunɔ i nyɛ mɔ nyɛ́nɛ na àmɛɛ cànʔaniw nyɛ, wee wi sɔ̀lɔ lè, wàlá àmɛɛ yébiligi kpaàwelebéle larivalilaa nyɛ lè.

⁵ Mɔ i be lée ni syée. Pe i sɔ̀lɔ́ àmɛɛ nyɛ̀ʔɛ nyɔ́ɔ ŋúnɔmɔ cɛɛri nyɛ lè, àmɛɛ nyàā nyɛ lè.

⁶ Nyǐngi nyɔ́ɔ na, ki n fuguri, cângwɔɔgi nyɔ́ɔ na, ki n pábari n waʔa.

⁷ Wolo i kálagi mɔ fundanʔari báriga ni, zɔ̀nviikɔnirɔ i nyɛ wolo na mɔ fundanʔagbɔɔri báriga ni.

⁸ Mɔ n wolo kolomi kèlē tɛ́ʔɛ miyɛɛ yɛ́ʔɛ ma, mɔ yɛ́ɛgi gbɛ̀ɛnmɛ i wolo kapeelàragèle tèé.

⁹ Wolo sìíw canya myɛ i sɔ̀lɔ́ mɔ fundanʔagbɔɔri báriga ni. Wolo sìíw yɛ̀ʔɛlɛ i kwóo àmɛɛ funyaʔa ŋɔ́nganga nyɛ lè.

¹⁰ Wolo sìíw yɛ̀ʔɛlɛ nyɔ́ɔ i nyɛ togoye taanri ní kpɔrigɔ. Wàa fànʔa ga nɛʔɛ, wi n yɛ̀ʔɛlɛ togoye sicɛrɛ taa. Ke taali si o nyɛ yafyɛn í, fwɔɔ wɔʔɔgɔ ní foomɔ yagana. Ke i kwóo kelekele, wolo n si yìri fókaanya na n kári.

¹¹ Wìí syɔ́ɔn wi mɔ fundanʔari fànʔa cán? Ba wìí wi mɔ fundanʔagbɔɔri cán n yɛlɛ ní mɔ yɛ́ɛgi fyáara ní?

¹² Wolo sámaga mi tama wolo sìíw canya córomɔ na, koro ga pye wolo í sícilimɛ funyo le woyɛɛ ni.

¹³ Ee Yawe, lúru mi pan, làlìí ni ki a kwɔ́ɔ? Nyinimɛ taa mɔ falipyebèle na.

¹⁴ Ki ga pye nyǐngi nyɔ́ɔ na, mi wolo tín mɔ funjǎngi na, koro ga pye wolo í kòro fundaanra na bàā muguri wolo sìíw myɛ ni.

¹⁵ Fundaanra saʔa kaan wolo ma bi yɛlɛ ní cányi nyɔ́ɔ ní, yee ni mɔ wolo cɛ́rɛ lè, bi yɛlɛ ní yɛ́ɛgèle nyɔ́ɔ ní, gele ni wolo nyáani lè.

¹⁶ Mɔ kapyeli tɛ̀ɛn mɔ falipyebèle na, ní mɔ nijangbɔɔri darigala be pìíbèle na!

¹⁷ Kàfɔw, wolo Kolocɔlɔw tàmaga n yɛlɛ gi pye wolo na! Wolo kɔ́yi fáli yaʔa wi báriga wolo ma, wolo kɔ́yi fáli, ki n tɔ̀nɔ n yɛlɛ mi wi báriga!