Ŋúnuyi 9 - Cebaara Bible 2010

Ŋúnuyi 9 Yawe i nyɛ fóomi fɔ̀ɔlɔ ní fɔ̀rɔgi fɔ̀ɔlɔ syɔɔfɔlɔ

¹ Ŋúnuŋùúbèle kùndigi wóʔo, pìíw kùu kéele na. Davidi ŋúnugi.

² Mii a ra mɔ kpɔ̀ʔɔrɔ́ ní mii fúngi myɛ ní, Yawe mii a ra mɔ bingaari kèlē myɛ kéele nyuu.

³ Mii a ra fundaanra kpéʔele sáā muguri mɔ ni, Kolocɔlɔɔ, mɔ wi lè Pe Myɛ Nyúngo na, mii a ra mɔ kpɔʔɔrɔli ŋúnuyo ŋúu!

⁴ Mii nigoobèle i kologi ni lúrugu, pe i kpírigi ni tuun, pe i kúu mɔ yɛ́ʔɛ ma.

⁵ Níì cán mɔ n tànʔa kaan mii ma, níì sínni córo mii ma, mɔ n tɛ́ɛn mɔ fangoli na n pye kútiijoo-síɔn.

⁶ Mɔ i fúlo tári syɛɛnfeleye na, mɔ i syɛɛnpeew kúu, mɔ i be mɛ́ɛyi kurugu ni láari yaà, ki n kòro nya làla o làla kwɔ́ɔmɔ fun.

⁷ Nigoobèle n kwɔ́ɔ! Pe n kálagi, gi kòro nya làla o làla! Kěyee mɔ jaa lè, yee bee kéele n yiri n kwɔ́ɔ syɛ́ɛnbèle fúnyo ni.

⁸ Wéle, Yawe si a kòro wodɛ́ɛɔn ní fǎngi na làla o làla, wi n wi fàngoli sámaga n yaʔa kútiiw kéele na.

⁹ Woro wi dulunyanw kútii nyuu ní sínnɛ ní, wi i kútiiw kúunri syɛɛnfeleyi myɛ na, kányɛɛgi na.

¹⁰ Yawe wi yɛlɛ bi pye fɔ̀rɔgɔfɔw tɛɛlàraga, ní tɛɛlàraga wɔʔɔgi làla ni.

¹¹ Bele be mɔ mɛ́ɛgi cán lè, pe a be sɔ̀ngumi taʔa mɔ na. Níì cán bele be mɔ caa lè, Yawe, mɔ a tée be wáa yaʔa í!

¹² Yaa ŋúu Yawe ma, woro wee wi nyɛ lè wodɛ́ɛɔn ní Siyɔn ni. Kakpoloyi wi kpéʔele lè, yaa yi kéeli nyuu syɛɛnfeleyi myɛ nínge ni!

¹³ Níì cán wi i sìsyaan wolo gɔlɔ́ wóo. Wi i sɔ̀ngí ni taagi wi kéeli na, wi o fɛ̀ʔɛ́ fɔ̀rɔgɔfɔbèle sùpiiwáara na í.

¹⁴ Nyɔɔ mii na, ee Yawe, mii wɔʔɔgi kánma wéle, gee mii parafɔbèle taari mii na lè, mɔ wee wi mii lée ni núngu kùúw kpàánweegéle taana lè,

¹⁵ koro ga pye mii í da mɔ kpɔʔɔrɔli kèlē myɛ nyuu Siyɔn calipili kpàánweegéle na, mii si pye fundaanra na àmɛɛ mɔ mii syɔɔ lè.

¹⁶ Wéegee tári syɛɛnfeleye da túgu lè, yi tiimaa n too gi ni, cɔ̀ɔ́wee yi cáan làrama ni lè, yi tiimaa tɔ́lɔyi n cò wi na.

¹⁷ Yawe n wiyɛɛ dɛ̀ɛn, wi n kútiiw ceri. Syɛɛnpeew n cò wi tiimaa kɔ́yi fáli na. Yatingbumɔngɔ Ŋɔ́ndaala

¹⁸ Syɛɛnpeebèle a lúru kàdoʔo ma bi fala kúbèle tɛɛkòrogo ma, syɛɛnfeleyee myɛ yi fɛ̀ʔɛ Kolocɔlɔɔ na lè.

¹⁹ Níì cán pe a fɛ̀ʔɛ foomɔfɔw na bàā syée yaà làla o làla í, fɔ̀rɔgɔfɔbèle sɔ̀ngumɔ tɛɛtaʔaga a gbǎn kálagi nyáana í.

²⁰ Ki n yɛlɛ mi yìri, ee Yawe, syɔɔn ga yɛlɛ wi kɔ́ fànʔa taa í! Kútiiw n yɛlɛ wi kúun syɛɛnfeleyi na mɔ yɛ́ʔɛ ma!

²¹ Ee Yawe, fyáara cáan be na! Syɛɛnfeleyi í gi cán yoro o nyɛ yafyɛn í, syɛ̀ɛnnɛ yoro nyɛ yagana! Ŋɔ́ndaala