Ŋúnuyi 89 - Cebaara Bible 2010

Ŋúnuyi 89 Sán Yawe joogaanni nyɛ, lee wi kpéʔele Davidi ma lè

¹ Tamani ŋúnugo Eziraki yòdaʔagi Etan ŋùu lè.

² Mii a ra Yawe funjǎngi kapyegèlē kéele ŋúu canʔa o canʔa. Mii nyɔ́ɔgi a ra mɔ kányɛɛgi kéele tèé làrigèle myɛ syɛ̀ɛnnɛ na.

³ Níì cán mii n jo: «Mɔ funjǎngi n báriga n kòro beè làla o làla. Mɔ n mɔ kányɛɛgi sámaga n cɔ́rɔ nyɛ̀ʔɛni na.»

⁴ «Mii n joogaanna kpéʔele ní mii wonyɛnɛ-wòlow ní. Mii n kàli mii falipyew Davidi ma.

⁵ Mii a mɔ yodaʔagi sámaga yérige gi kòro beè làla o làla, si wɔ́ɔ mɔ fangoli sámaga télege li kòro beè làrigèle myɛ syɛ̀ɛnnɛ ma.» Ŋɔ́ndaala

⁶ Nyɛ̀ʔɛgèle i mɔ sòoló kakpoloyi kéele na mɔ kpéʔele lè, ee Yawe! Ní wɔ́ɔ i mɔ kányɛɛgi kéele sòoló syɛɛncanbèle syɛɛnkpoʔolomɔ ni,

⁷ wìí wi yaà nyɛ̀ʔɛgèle ni bi gbǎn tímana ní Yawe ní? Wìí wi nyɛ Yawe félege Kolocɔlɔɔ pìíbèle myɛ ni?

⁸ Kolocɔlɔɔ tɔ̀nɔ́ i nyɛ fyáakpɔɔrɔ yáriga syɛɛncanbèle syɛɛnkpoʔolomɔ ni. Wi i nyɛ bìngaataa-yariga n sɔ̀lɔ bele myɛ na pe wi màʔa lè.

⁹ Yawe Kolocɔlɔɔ, mɔ wi lè Nyɛ̀ʔɛni Sùlasiibéle Kafɔlɔ, wìí syɔ́ɔn fànʔa gi nɛʔɛ àmɛɛ mɔ wógi nyɛ lè? Ee Yawe, mɔ kányɛɛgi n mɔ màʔa n kpàra.

¹⁰ Mɔ wi sólomi lòjámaga fwɔɔgi. Ki kùnguruyi ga ni yìrigí lǎli ni lè, mɔ wi yi sínɛgi.

¹¹ Mɔ wi Arahabi tɔ́nʔɔnɔ àmɛɛ kpóō nyɛ lè, mɔ n mɔ nigoobèle cariga ní mɔ séew kɔ́lɔ ní.

¹² Nyɛ̀ʔɛni i nyɛ mɔ wólo, a tári wɔ́ɔ i nyɛ mɔ wóro. Mɔ wi dulunyanw, ní wi fúngi yárira myɛ kàpɔɔn le.

¹³ Mɔ wi solomɔkulo kàbangi faan, ní wɔ́ɔ̀ wòrogulo kàbangi faan. Tabɔɔri ní Hɛrimɔn nyanbeleyi i fundaanra kpéʔele mɔ mɛ́ɛgi na.

¹⁴ Mɔ má séew nyɛ kɔ́gi ni. Mɔ kɔ́gi i nyɛ ní fànʔa ní, mɔ kaliigi i nyɛ wozánʔaga ní ǹjoʔo ma.

¹⁵ Sínni ní kányɛɛgi gi nyɛ mɔ fangoli kàpɔɔn. Funjǎngi ní kányɛɛgi i syée mɔ yɛ́ʔɛ ma.

¹⁶ Bele be mɔ kpɔʔɔrɔli yákpolo cán lè, ee Yawe, pe i nyɛ dùba pìibēle. Pe i táanri mɔ yɛ́ɛgi gbɛ̀ɛnmɛ na.

¹⁷ Pe i nyɛ fundaanra na canʔa o canʔa mɔ mɛ́ɛgi báriga ni. Pe i nyɔ̌ngbɔɔlɔ táanri mɔ sínni báriga ni.

¹⁸ Níì cán mɔ wi nyɛ pe fǎngi nìjanra. Mɔ funjǎngi báriga ni kàa fàrá wolo fǎngi na.

¹⁹ Níì cán Yawe má wolo tunmɔzige-yárigi nyɛ, Isirayɛli Wojanw má wi lè wolo fànʔafɔw.

²⁰ Lǎli bee ni mɔ maa joo yanyaʔa ni mɔ syɛɛn-nidaanmabèle ma, níì jo: «Mii n fànnɛʔɛgɛfɔlɔ dɛ̀ɛmɛ. Mii n nìgɔcariwaa nyɛ́nɛ n wòlo syɛ́ɛnbèle nínge ni.

²¹ Mii n mii falipyew Davidi nyaa, a mii mii sìnjǎnmi wo wi na.

²² Woro mii kɔ́gi a ra dɛ̀ɛmɛ́. Mii kɔ́dirigi a ra fànʔa nii wi ni.

²³ Nigoow a gbǎn wi foo cò í, kolomɔfɔw a gbǎn faʔara wáa wi na í.

²⁴ Mii a wi kàsiitun-nyɛ́nbèle tɔ́nʔɔnɔ wi yɛʔɛ̀ ma, si wi parafɔbèle kpúmɔn.

²⁵ Mii kányɛɛgi ní mii funjǎngi a pye ní wi ní, wi fǎngi sáā kpɔ́ʔɔgi mii mɛ́ɛgi báriga ni.

²⁶ Mii a sólomi lɔ̀ʔɔ le wi kɔ́gi ni, ní cábiyi, wi kàliigi ni.

²⁷ Wi a ra mii mɛ́ɛgi yiri si jo: ‹Mɔ wi nyɛ mii tóow! Mii Kolocɔlɔw, ní mii syɔɔli fálaga!›

²⁸ Mii si a wi kpéʔele pìiseliw, si wi kpɔ́ʔɔ bi sɔ̀lɔ tári fànʔafɔɔlɔ myɛ na.

²⁹ Mii a mii funjǎngi kɔn bi yaʔa wi kéeli na làla o làla, mii joogaanni si wɔ́ɔ báriga bi kòro beè wi ma.

³⁰ Mii a wi yòdaʔayi yaʔa yi kòro beè làla o làla, wi fàngoli si wɔ́ɔ mɔn beè àmɛɛ nyɛ̀ʔɛni canya nyɛ lè.

³¹ Wi pìíbèle ga mii làlwaw yaʔa, kapye pe o táanri ni yɛlɛgi ní mii kajoogèle ní í,

³² làlwaw mii sɛ́bɛ n kaan lè, pe ga wi kálagi, níì mii kajoodɛɛngèle cée,

³³ lǎli bee ni mii a be céemi gɔ̀lɔ́ wòlo be na ní sàbinnɛ ní, bi be kolomi gɔ̀lɔ́ wòlo be na ní kuruyo ní.

³⁴ Mii funjǎngi si a tée kwɔ́ɔ wi kàbangi na í, mii a tée fɔ̀lɔ mii kányɛɛgi í kálagi í.

³⁵ Mii a tée mii joogaanni kálagi í, gee gi yiri mii nyɔ́ɔgi ni lè, mii a tée gi fàli í.

³⁶ Mii n kàli tɔlɔgɔ nibin mii sínni na, mii a tée finɛ Davidi ma í!

³⁷ Wi yòdaʔagi a kòro beè làla o làla. Wi fàngoli a kòro beè mii yɛ́ʔɛ ma àmɛɛ cángi nyɛ lè.

³⁸ Li a báriga bi kòro beè àmɛɛ yégi nyɛ lè, ki lè tágala séerafɔw, nyɛ̀ʔɛni na.» Ŋɔ́ndaala

³⁹ Mɔ si n wi cée, mɔ n wi wáa n yaʔa! Mɔ fúngi n tanʔa mɔ wonyɛnɛ-wòlow kurugo!

⁴⁰ Joogaanni mɔ da kpéʔele mɔ falipyew ma lè, mɔ n li kálagi. Mɔ n wi fànʔafɔ-nyùndɔnni cáan tári na n li nɔ́nʔɔ.

⁴¹ Mɔ n weeye kúun wi tǒbèle myɛ na, mɔ n wi kèniriyi myɛ cáan.

⁴² Kozɔ̀lɔbèle myɛ n wi fuguri. Wi n pye yafaʔaga wi tɛ́ɛnnyɛnbèle ma.

⁴³ Mɔ n wi kàsiitun-nyɛ́nbèle kàliige kɔ́yɔ yìrige, mɔ n wi nigoobèle myɛ kaan pe i fundaanra kpéʔele.

⁴⁴ Mɔ n wi ŋɔséew nyɔ́ɔ lúrugo kàdoʔo ma, mɔ ga wi dɛ̀ɛmɛ kapɛɛnni séʔe ni í.

⁴⁵ Mɔ n wi nìjanri kwɔ́ɔ, mɔ n wi fàngoli cáan tári na.

⁴⁶ Mɔ n kàa yirige wi cárimi canya ni, mɔ n fɛ̀ɛ́ri tɛ́ʔɛ n wi tɔ́n. Ŋɔ́ndaala

⁴⁷ Yawe, làlìí ni ki a kwɔ́ɔ? A mɔ a miyɛɛ làriga lé bi kòro nya? Mɔ fundanʔari a kòro lé bàā nyín àmɛɛ naà nyɛ lè?

⁴⁸ Sɔ̀ngi mi taa gi na mi cán mii sìíw canya n tɔ̀nɔ n cɛ́rɛ, ncan mɔ n syɔɔn ye faan gbanzanw mɛ́ʔɛ na.

⁴⁹ Syɔɔnwìí wi a kòro sìi na wee wi lè wi a kùúw nyaa í, wàlá bi wi sìíw syɔɔ kúbèle tɛɛkòrogo fànʔa ma? Ŋɔ́ndaala

⁵⁰ Kàfɔw, sán mɔ booma funjǎngi kapyegèlē nyɛ, koro gele kéele na mɔ kàli Davidi ma lè mɔ kányɛɛgi báriga ni?

⁵¹ Kàfɔw, ki n yɛlɛ mi sɔ̀ngi mi taa mɔ falipyew faʔara kéele na, syɛɛnfele-nɛʔɛyi myɛ i mii faari.

⁵² Ee Yawe, mɔ nigoobèle be faʔari kpéʔele, pe i mɔ wonyɛnɛ-wòlow nyɔ̌nlaagéle faari.

⁵³ Yawe n yɛlɛ waa wi kpɔ̀ʔɔrɔ́ làrigèle myɛ ni! Amiina! Amiina!