Ŋúnuyi 88 - Cebaara Bible 2010

Ŋúnuyi 88 Mii n nùuni kùúw na kabɛʔɛlɛ siin canʔanaganma

¹ Ŋúnugo. Kore jáabèle ŋúnugo. Ŋúnuŋùúbèle kùndigi wóʔo, ki lè funbɛɛnrɛ wóʔo. Tamani ŋúnugo Eziraki yòdaʔagi Heman ŋùu lè.

² Ee Yawe Kolocɔlɔɔ, mɔ wi lè mii Syɔɔfɔw, mii i yákpoli wáa mɔ yɛ́ʔɛ ma n cángi pínɛ yébiligi ni.

³ Ki n yɛlɛ mii nyɛ́ɛrigi í nan mɔ na! Líiyi cáan mi mii sùpili lóʔo!

⁴ Níì cán mii fúngi n tín wɔʔɔyi na, a mii sìíw nùuni kúbèle tɛɛkòrogo na.

⁵ Pe i mii córo ní weekpɔɔgi fúngo jéefɔɔlɔ ní, mii i nyɛ àmɛɛ fànʔa fun syɔ́ɔn nyɛ lè.

⁶ Pe n mii cáan kúbèle nínge ni, mii i nyɛ àmɛɛ pèle nyɛ be kpóo lè, níì be sínɛgɛ nyányi ni, poro bele be lè mɔ sɔngumɔ ní o nyɛ be na í, pe n kálagi n yiri mɔ kɔ́gi ni.

⁷ Mɔ n mii wáa weecurugo ni, yébilimi ni, tɛ́ɛwɔɔtèele ni.

⁸ Mɔ fundanʔari túgoro n líbe mii na n baa sɔ̀lɔ. Mɔ i mii wɔʔɔ ní mɔ lógi kùnguruyo myɛ ní. Ŋɔ́ndaala

⁹ Mɔ n mii tàannyɛnbèle myɛ léeli mii na, mɔ n mii kpéʔele be ma yanɔnʔɔgɔ. Pe n kɔ̀rigi tɔ́n n wáa mii na, mii a gbǎn yiri í.

¹⁰ Mii nyapiigèle n cée wɔʔɔgi báriga ni. Ee Yawe, canʔa o canʔa mii i mɔ mɛ́ɛgi yiri! Mii n mii kɔ́yi yìrige mɔ ma.

¹¹ Kúbèle má lé mɔ a kakpoloyi kpéʔele? A kúbèle a ní nyán lé bàā mɔ kpɔ̀ʔɔrɔ́? Ŋɔ́ndaala

¹² Nyángi fúngo ni lé mɔ funjǎngi kéele a ra nyuu? Kálagili weecurugo ni lé mɔ kányɛɛgi kéele a ra nyuu?

¹³ A be mɔ kakpoloyi kéele cán lé yébilimi ni? Ba mɔ sínni kéele cán lé fɛ̀ʔɛri tára ni?

¹⁴ Mii si na, Yawe, mɔ mii yiri mɔ í mii syɔɔ. Nyǐngi nyɔ́ɔ na, mii nyɛ́ɛrigi i nangi mɔ na.

¹⁵ Yawe, nyàʔá na mɔ mii pǐli cée? Nyàʔá na mɔ mɔ yɛ́ɛgi làragí mii na?

¹⁶ Nlaa yaà mii pìími làla ni, mii i wɔʔɔ fwɔɔ n baa nùuni kùúw na, mɔ kérigèle ge nyɛ lè fyáara woʔolo ní, ke i nyɛ mii na tugoro, mii fúngi n curugo.

¹⁷ Mɔ fundanʔagbɔɔri gbànma n mii tɔ́n, mɔ fyáari kèlē n mii kwɔ́ɔ.

¹⁸ Ke i mii sùlú ni nii canbogi myɛ ni àmɛɛ lɔ̀ʔɔ nyɛ lè, ke i mii máari ni kpàrá làrinijanna ni.

¹⁹ Mɔ n mii tàannyɛnbèle, ní mii pínɛnyɛnbèle léeli mii na, yébilimi bi kòro mii kôbinɛnyɛnbèle sìndɛʔɛ ni.