Ŋúnuyi 86 - Cebaara Bible 2010

Ŋúnuyi 86 Mii i mɔ yiri mii wɔʔɔli làla ni

1 Davidi nyɛ́ɛrigi

¹ Davidi nyɛ́ɛrigi Ee Yawe, ki n yɛlɛ mi mɔ líiyi cáan mi lóʔo mii ma. Níì cán mii i nyɛ nyinimɛ wóo, ní foomɔ wóo ní.

² Da mii sìíw kpáa wéle níì cán mii i nyɛ mɔ kpɔʔɔrɔfɔlɔ! Ee, mɔ wi lè mii Kolocɔlɔw, mii syɔɔ, mii wi lè mɔ falipyew, mɔ na mii niyɛɛ daʔa.

³ Kàfɔw, nyinimɛ taa mii na! Níì cán mii i canbogi myɛ kwóo sùpiiwáari na mɔ kurugo.

⁴ Ki n yɛlɛ mi fundaanra kaan mɔ falipyew ma. Kàfɔw, mɔ má mii mii fúngi kàriga.

⁵ Níì cán Kàfɔw mɔ fúngi n nyɔɔ, mɔ i kùsulugi syoo, mɔ nyínimi n tɔ̀nɔ n nɛʔɛ bele myɛ kàbaan na pe mɔ mɛ́ɛgi yiri lè.

⁶ Ee Yawe, líiyi cáan mi mii nyɛ́ɛrigi lóʔo. Yákirii yaʔa mii nyɛ́ɛrigbɔɔgi yákpolo na!

⁷ Mii i mɔ mɛ́ɛgi yiri mii wɔʔɔli canʔa na níì cán mɔ i lúro mii ma.

⁸ Kolocɔlɔwaa o nyɛ mɔ félege kolocɔlɔbèle nínge ni í, Kàfɔw, mɔ kapyegèle félege o nyɛ í.

⁹ Syɛɛnfeleyee myɛ mɔ sámaga lè, yee bee a ra maa bi ba ra tíri da tuun mɔ yɛ́ʔɛ ma, Kàfɔw, yi a ra mɔ mɛ́ɛgi kpɔ̀ʔɔrɔ́.

¹⁰ Níì cán mɔ n kpɔ́ʔɔ, mɔ i kakpoloyo kpéʔele, mɔ nibin wi nyɛ Kolocɔlɔɔ.

¹¹ Ee Yawe, mii tama mɔ kólogi kèlē na, mii a ra táanri mɔ kányɛɛgi na. Mii fúngi pye nibin koro ga pye mii í da fɛ̀ɛgí mɔ mɛ́ɛgi na.

¹² Mii a ra mɔ kpɔ̀ʔɔrɔ́ ní mii fúngi myɛ ní Kàfɔw, mɔ wi lè mii Kolocɔlɔw! Mii a ra mɔ mɛ́ɛgi kpɔ́ʔɔgi làla o làla.

¹³ Níì cán mɔ tamagi n tɔ̀nɔ n kpɔ́ʔɔ mii kàbangi na, mɔ n mii pǐli syɔɔ n yirige kúbèle tɛɛkòrogo weecurugo ni.

¹⁴ Ee Kolocɔlɔɔ! Bele be peyɛɛ gbɔ́ʔɔgi lè, pe n yìri mii kurugo, syɛɛnpeebèle kabiga i mii sìikwɔɔri caa. Pe o mɔ córo kanma faala na í.

¹⁵ Kàjáa Kàfɔw, mɔ wi nyɛ fûnnyingi ní nyinidaari Kolocɔlɔɔ, mɔ fúngi o taanri kelekele í, mɔ nyínimi n nɛʔɛ, mɔ si wɔ́ɔ i nyɛ tágala syɔ́ɔn.

¹⁶ Mɔ yɛ́ɛgi fíige naa mii ma, mi nyinimɛ taa mii na, mɔ fangi kaan mɔ falipyew ma, mɔ pulocew pyà syɔɔ!

¹⁷ Fɛ̀ɛ kpéʔele mii ma bi gi tɛ̀ɛn mii a kacànna taa! Koro ga pye mii parafɔbèle í gi nyaa fɛ̀ɛrɛ si be taa! Níì cán Yawe, mɔ wi mii dɛ̀ɛmɛ́ ní i mii kpɛʔɛlɛ.