Ŋúnuyi 85 - Cebaara Bible 2010

Ŋúnuyi 85 Yawe i yɛɛ̀nyingi kéele nyuu

¹ Ŋúnuŋùúbèle kùndigi wóʔo. Kore jáabèle ŋúnugo.

² Ee Yawe, mɔ n fɔ̀lɔ mɔ tári na! Mɔ n Zyakɔbi syɛ́ɛnbèle yirige púlori ni n lúrugo n pan.

³ Mɔ n mɔ syɛ́ɛnbèle kolomɔ láʔa be na, mɔ n be kapeegèle myɛ tɔ́n. Ŋɔ́ndaala

⁴ Mɔ n mɔ fundanʔagbɔɔri myɛ yaʔa, àmɛɛ mɔ fúngi da yìri lè gbanʔama, mɔ n lúru n koro myɛw yaʔa.

⁵ Kolocɔlɔɔ, mɔ wi lè wolo syɔɔli kaanfɔlɔ, wolo lúrugo mi télege! Mɔ fundanʔari kwɔ́ɔ nya wolo kàbangi na!

⁶ Ba mɔ fúngi a zǐn yìri lé wolo kurugo bi kòro nya làla o làla? Mɔ fundanʔari a kòro lé bàā syée nya yìrigèle myɛ syɛ̀ɛnnɛ kurugo?

⁷ Mɔ a ní pan ba sìi kaan wolo ma, koro ga pye mɔ syɛ́ɛnbèle í ní da fundaanra kpéʔele mɔ ni ì?

⁸ Ee Yawe, mɔ funjǎngi tɛ̀ɛn wolo na, mí mɔ syɔɔli kaan wolo ma!

⁹ Gee Kolocɔlɔɔ ga joo lè, wi lè Yawe, mii a gi lóʔo. Níì cán wi i yɛɛ̀nyinge syɛ́ɛnrɛ nyuu wi syɛ́ɛnbèle, ní wi tágala syɛ́ɛnbèle ma, pe si a ní kɔ́ lúru da labalami kèlē kpéʔele í.

¹⁰ Kányɛʔɛ na, bele be fɛ̀ɛgí wi na lè, wi syɔɔli n nùuni bele bee na koro ga pye nìjangbɔɔri í ba kòro wolo tári ni.

¹¹ Funjǎngi, ní kányɛɛgi i tiyɛɛ fàrá ni taagi, sínni, ní yɛɛ̀nyingi i tiyɛɛ syɔɔnri syɔɔnri.

¹² Kányɛɛgi i fíin ni yirigi tári ni, á sínni kòro yaà ǹjogi ni níì jùngu naa.

¹³ Yawe tiimaa i yacanri kaangi, wolo tári yafálara a ra nyɔɔgi.

¹⁴ Sínni a ra táanri wi yɛʔɛ̀ ma, wi nyɔ̌ngèle a pye kólogi ni.