Ŋúnuyi 84 - Cebaara Bible 2010

Ŋúnuyi 84 Kùsɛ́ɛbèle ŋúnugo, pe nan lè Zyerusalɛmi na

¹ Ŋúnuŋùúbèle kùndigi wóʔo. Gitiiti ni. Kore jáabèle ŋúnugo.

² Mɔ tɛɛkòroyi n tɔ̀nɔ n tɛ́nɛ, Yawe, mɔ wi lè Nyɛ̀ʔɛni Sùlasiibéle Kafɔlɔ!

³ Yawe kàcooli kadàagēle láa n wári mii na fwɔɔ a mii fúngi báriga myɛ i kwóo, mii fúngi ní mii céri myɛ i yákpoli wáa Kolocɔlɔɔ woweew kurugo.

⁴ Alí cɔ̀ɔrɔbili n tɛɛlaraga taa, a zǎlɛɛli zyàara taa n pye li pìíbèle tɛɛlege mɔ sáriga-wòlo-yafaanyi taana, ee Yawe, mɔ wi lè Nyɛ̀ʔɛni Sùlasiibéle Kafɔlɔ, mɔ wi lè mii Fànʔafɔw ní mii Kolocɔlɔw!

⁵ Bele be nyɛ mɔ kpáagi ni lè, pe i nyɛ dùba pìibēle! Pe a kòro bàā mɔ kpɔ̀ʔɔrɔ́ làla o làla. Ŋɔ́ndaala

⁶ Syɛ́ɛnbèle bele be fǎngi taagi mɔ ni lè, pe i nyɛ dùba pìibēle! Poro bele be koloyo nyaagi peyɛɛ fúnyi ni lè wowologwɔɔyɔ ní.

⁷ Pe ga tánʔa n sɔ̀lɔ Baka jǐnlɔgi ni, pe n gi kàriga pùnweegéle tɛ́ʔɛ, zěseligi n wɔ́ɔ̀ dùbaw tɛ́ʔɛ n gi tɔ́n.

⁸ Amɛɛ be syée lè, ànbée kàa taari be fǎngi na, pe a sa yére Kolocɔlɔɔ yɛ́ʔɛ ma Siyɔn ni.

⁹ Yawe Kolocɔlɔɔ, mɔ wi lè Nyɛ̀ʔɛni Sùlasiibéle Kafɔlɔ, ki n yɛlɛ mi mii nyɛ́ɛrigi lóʔo! Zyakɔbi Kolocɔlɔw, ki n yɛlɛ mi mɔ líiyi cáan! Ŋɔ́ndaala

¹⁰ Ee Kolocɔlɔɔ, mɔ wi lè wolo tunmɔzige-yárigi, ki wéle! Mɔ wonyɛnɛ-wòlow yɛ́ʔɛ wéle!

¹¹ Bi canʔa nibin kwɔ́ɔ mɔ kpɔʔɔrɔli kpaʔa kàcoolo kadàagēle na, koro n pɔ́rɔ n sɔ̀lɔ canya saala kagunɔ kwɔ́ɔlɔ na tɛɛgaa nikwɔɔ ni. Bi yére mii Kolocɔlɔw kpaʔa kpaaweele na, mii n koro fúngo cán n sɔ̀lɔ tɛ́ɛnni na syɛɛnpeebèle fànikpaaya ni.

¹² Níì cán Yawe Kolocɔlɔɔ i nyɛ canʔa, ní tunmɔzige-yariga, Yawe i kpɔ́ʔɔri ní nìjanri kaangi, bele be táanri sínnɛ ni lè, wi o téē cèʔé bele bee ma yacangaa faala na í.

¹³ Ee Yawe, mɔ wi lè Nyɛ̀ʔɛni Sùlasiibéle Kafɔlɔ, syɔ́ɔnwee wi wiyɛɛ kàlifáa mɔ ma lè, wi i nyɛ dùba pyà.