Ŋúnuyi 81 - Cebaara Bible 2010

Ŋúnuyi 81 Ee, mii syɛ́ɛnbèle ga maa ni lúro mii ma…

¹ Ŋúnuŋùúbèle kùndigi wóʔo. Gitiiti ni. Azafi ŋúnugi.

² Ki n yɛlɛ yaa ŋúu ní yákpogbologéle ní Kolocɔlɔɔ ma wi lè wolo fǎngi! Yaa fundaanra yákpogéle wáa Zyakɔbi Kolocɔlɔw ma!

³ Yaa ŋúnugo ŋúu yaa maa ní tàmábèle kɔ̀nʔɔrɔ ní, n fàra kɔ̀rítàánw ní dǎngbogèle na!

⁴ Yaa tòmaagi wíi yevɔngi na, bàā gi wíi yesóli na, wolo sériw canʔa na!

⁵ Níì cán làlwawaa wii, wee wi sɛ́bɛ n kaan Isirayɛli ye ma lè, Zyakɔbi Kolocɔlɔw kajoolaa lii.

⁶ Kajoolee wi sɛ́bɛ n kaan Zyozɛfu kpáagi wòolo ma lè, lǎli ni wi too Ezyipiti tári na lè, a mii i yákpolo lúro, lee li lè mii ga li cán í, a li jo:

⁷ Mii n túgori láʔa wi fókaannyungi na, a wi kɔ́yi láʔa sɛ̀ʔɛli na.

⁸ Mɔ n mii mɛ́ɛgi yeri mɔ wɔʔɔli làla ni, a mii mɔ syɔɔ. Mii n syɔɔ mɔ ma nyɛ̀ʔɛdǐnni fúngo ni. Mii n mɔ pye n wéle Meriba lógi taana. Ŋɔ́ndaala

⁹ Mii syɛɛnfelegi, ki n yɛlɛ mi lóʔo! Mii a mɔ sàmi. Isirayɛli, ki maa yɛlɛ mɔ í da lúro mii ma!

¹⁰ Kolocɔlɔwaa nikwɔɔ ga yɛlɛ wi nyaa mɔ ma í! Mɔ a kɔ́ ra táraa nikwɔɔ wòolo kolocɔlɔwaa kpɔ̀ʔɔrɔ́ í!

¹¹ Mii wi nyɛ Yawe mɔ Kolocɔlɔw, woro wee wi mɔ yirige Ezyipiti tári ni lè. Mɔ nyɔ́ɔgi múgu fáa, mii a gi nyìn.

¹² Kàjáa mii syɛ́ɛnbèle ga mii yákpoli lóʔo í, Isirayɛli ye ga fɔ̀lɔ ni mii caa í.

¹³ Lǎli bee ni a mii be yaʔa pe i syée be fungbanyi kóloyo ni, a pe i be tiimaa kakɔrirɔgèle kóloyo táanri.

¹⁴ Ee! Mii syɛ́ɛnbèle ga maa fɔ̀lɔ ni lúro mii ma, Isirayɛli ye ga maa fɔ̀lɔ ni táanri ni yɛlɛgi ní mii kólogi kèlē ní!

¹⁵ Mii mǎà dée pe nigoobèle kùrú kaan be ma terire, mii a dée kɔlɔ̀ taʔa be kàsiitun-nyɛ́nbèle na.

¹⁶ Bele Yawe kéeli bɛɛn lè poro a dée peyɛɛ gaan wi ma nyɔɔwara na, pe lǎli a dée tɛ́ʔɛ yaʔa gi kòro nya làla o làla.

¹⁷ Mii a dée ra be gbóo ní yaliicànra ní, mii a dée ra sárigi yirigi fálagi ni bàā be kaangi paa líi ra tíngi.