Ŋúnuyi 80 - Cebaara Bible 2010

Ŋúnuyi 80 Ee Isirayɛli Nàʔafɔw, ki n yɛlɛ mi lóʔo

¹ Ŋúnuŋùúbèle kùndigi wóʔo. «Séeraw nyàáfyɛɛnrɛ na.» Azafi ŋúnugi.

² Isirayɛli Nàʔafɔw, ki n yɛlɛ mi líiyi cáan, mɔ wee wi Zyozɛfu ye yɛ́ɛgi kínigi lè, pe lè àmɛɛ bàtogo nyɛ lè! Mɔ wee wi nyɛ lè wodɛ́ɛɔn ní syerubɛnbèle ǹjoʔo ni! Ki n yɛlɛ mi mɔ gbɛɛnmi yirige.

³ Mɔ fangi yìrige ŋúnɔmi na Efirayimi, ní Bɛnzyamɛ, ní Manase ye yɛ́ʔɛ ma, mí ba wolo syɔɔ!

⁴ Ee Kolocɔlɔɔ, ki n yɛlɛ mi wolo lúrugo mi télege! Mɔ yɛ́ɛgi gbɛ̀ɛnmɛ yirige koro ga pye wolo a syɔɔ!

⁵ Ee Yawe Kolocɔlɔɔ, mɔ wi lè Nyɛ̀ʔɛni Sùlasiibéle Kafɔlɔ, mɔ fúngi a kòro lé wii nya wodanʔaga ní mɔ syɛ́ɛnbèle nyɛ́ɛrigɛ kánma na?

⁶ Mɔ i be gbóo ní nyatinmɛ búru ní, mɔ n nyatinnɛʔɛgɛ kíri n kaan be ma a gi pye be lògbaagi.

⁷ Mɔ n wolo kpéʔele kàsii yáriya wolo tɛ́ɛnnyɛnbèle ma, wolo nigoobèle i wolo tɛ́ʔɛ.

⁸ Kolocɔlɔɔ, mɔ wi lè Nyɛ̀ʔɛni Sùlasiibéle Kafɔlɔ, ki n yɛlɛ mi wolo lúrugo mi télege! Mí mɔ yɛ́ɛgi gbɛ̀ɛnmɛ yirige koro ga pye wolo a syɔɔ.

⁹ Mɔ maa ɛrɛzɛn tírige kɔ́n n yirige yaà Ezyipiti ni. Mɔ n baa syɛɛnfeleyi nɛnɛ n yirige yi tɛ́ɛyi ni, níì gi cɔ́rɔ.

¹⁰ Mɔ n tɛʔɛ sámaga ki yɛʔɛ̀ ma téw, ki n nìnre wáa n tári nyìn.

¹¹ A gi nyínmi nyanbeleyi tɔ́n, a gi káganyi yìri n pye àmɛɛ Kolocɔlɔɔ sɛdiri tíiyi nyɛ lè.

¹² A gi káganbiiri cabara fwɔɔ n sáà nan sólomi lɔ̀ʔɔ na, a gi fíinri kári fwɔɔ n sáà nan cábigi nyɔ́ɔ na.

¹³ Nyàʔá na mɔ gi tɛɛsùluyi ŋɔrigɔ n cáan, a koro gi kaan a kozɔ̀lɔbèle myɛ i gi fuguri?

¹⁴ A seʔe cáalayi wɔ́ɔ i yirigi kákpogi ni n ba ni gi kálagi, a sìnbirigi yaweere wɔ́ɔ ba ni gi líi.

¹⁵ Kolocɔlɔɔ, mɔ wi lè Nyɛ̀ʔɛni Sùlasiibéle Kafɔlɔ, lúru maa maa! Bi mɔ yaʔa nyɛ̀ʔɛni na, mɔ yɛ́ɛgi jùngu mi wéle naa! Ɛrɛzɛn tírigi naa wéle, mí ba gi dɛ̀ɛmɛ!

¹⁶ Gee mɔ cɔ́rɔ ní mɔ kaliigi ní lè, ní jaafɔwee mɔ kpɔ́ʔɔ n yaʔa miyɛɛ ma lè, da wi kpáaw wéle!

¹⁷ Naà n ɛrɛzɛn tírigi bee sórigo, pe n gi ceri! Pe i kálagi mɔ yɛ́ʔɛ ma, mɔ kafulogi báriga ni.

¹⁸ Ki n yɛlɛ mɔ kɔ́gi í pye nǎnw na wi nyɛ lè mɔ kaliige ma, syɔɔn pya na, woro wee má mɔ fànʔa kaan lè!

¹⁹ Wolo a tée ní wàli bi láʔa mɔ na í, ní mi sìi le wolo ni, wolo a ra mɔ mɛ́ɛgi yiri.

²⁰ Yawe Kolocɔlɔɔ, mɔ wi lè Nyɛ̀ʔɛni Sùlasiibéle Kafɔlɔ, ki n yɛlɛ mi wolo lúrugo mi télege! Mɔ yɛ́ɛgi gbɛ̀ɛnmɛ yirige koro ga pye wolo a syɔɔ.