Ŋúnuyi 79 - Cebaara Bible 2010

Ŋúnuyi 79 Ba wolo dɛ̀ɛmɛ, wolo n tɔ̀nɔ n too n sínɛ

1 Azafi ŋúnugi.

¹ Azafi ŋúnugi. Ee Kolocɔlɔɔ! Syɛɛnfeleyi n mɔ kɔ́rigi kálagi, pe n mɔ kpɔʔɔrɔli kpaacanga nɔ́nʔɔ, pe n Zyerusalɛmi kàriga gurubɛɛtooro.

² Pe n mɔ falipyebèle kúcere kaan nyɛ̀ʔɛni féjɛɛnrɛ ma a di pye di yaliire, pe n mɔ syɛɛncanbèle cére kaan tári yaweere ma.

³ Pe n be sìsyaanw wo àmɛɛ lɔ̀ʔɔ nyɛ lè n Zyerusalɛmi màʔa, syɔɔn faala ga taa bi be tɔ́n í.

⁴ Wolo n baa pye yafaʔagéle wolo tɛ́ɛnnyɛnbèle ma, bele be wolo màʔa lè, pe i wolo tɛ́ʔɛ ní i wolo kpàná.

⁵ Làlìí ni mɔ fundanʔari a kwɔ́ɔ, ee Yawe? Mɔ a kòro lé fundanʔari na bàā syée nya làla o làla? Mɔ káyaagi si wɔ́ɔ kòro lé bàā nyín àmɛɛ naà nyɛ lè?

⁶ Mɔ fundanʔari cáan syɛɛnfeleyi na yi lè yi ga mɔ cán í, ní fǎnyee na, yi lè yi o mɔ mɛ́ɛgi yeri í!

⁷ Níì cán pe n Zyakɔbi káa, níì wi tɛɛkòrogi kálagi.

⁸ Mɔ a ní kɔ́ sɔ̀ngí taa wolo kolozelimi na í! Mɔ nyínimi yaʔa bi nan wolo na kelekele bi wolo fàra, níì cán wolo bárigaw n cɛ́rɛ n baa sɔ̀lɔ.

⁹ Ee Kolocɔlɔɔ, mɔ wi lè wolo Syɔɔfɔw, wolo dɛ̀ɛmɛ mɔ mɛ́ɛgi nìjangbɔɔrɔ kéele na! Wolo syɔɔ mí wolo kapeegèle kùsulugo syɔɔ mɔ mɛ́ɛgi kéele na!

¹⁰ Nyàʔá na syɛɛnfeleyi yɛlɛ bi kɔ́ ra gi nyuu si jo: «Sán be Kolocɔlɔw nyɛ?» Mɔ falipyebèle sìsyaan wolo gɔlɔ́-wòloro yaʔa di kpéʔele wolo nyɛ́nɛ na, syɛɛnfeleyi nínge ni.

¹¹ Ki n yɛlɛ kàsolebèle cɛ́ɛnmɛ í nan mɔ na! Bele be tɛ́ʔɛ kùúw mɛ́ʔɛ na lè, ki n yɛlɛ mɔ í be syɔɔ mɔ séekpɔɔw báriga ni!

¹² Ee Kàfɔw, faʔaree na wolo tɛ́ɛnnyɛnbèle mɔ faʔa lè, ki n yɛlɛ mi di tɛɛyɛ kɔrɔsiin lúrugo be ma.

¹³ Wolo si na, wo nyɛ lè mɔ syɛ́ɛnbèle, ní i nyɛ mɔ babéle, bele mɔ náari lè, wolo a ra mɔ kpɔ̀ʔɔrɔ́ làla o làla. Wolo a ra mɔ soololi kéele jáari làrigèle myɛ syɛ̀ɛnnɛ nínge ni.