Ŋúnuyi 78 - Cebaara Bible 2010

Ŋúnuyi 78 Gee gi pye Isirayɛli ye na lè ki i nyɛ tamana, lee na lè syɔɔn ga yɛlɛ bi fɛ̀ʔɛ í

1 Tamani ŋúnugo Azafi ŋùu lè.

¹ Tamani ŋúnugo Azafi ŋùu lè. Mii syɛ́ɛnbèle, ye líiyi cáan ye mii tamani sámaga ye lóʔo! Ye líiyi cáan ye mii nyɔ́ɔgi syɛ́ɛnrɛ lóʔo!

² Mii a nyɔ́ɔgi múgu bi kàseele wáa, mii a kalaragēle joo, ke lè booma lali wòʔolo.

³ Gee wolo lóʔo lè ní wɔ́ɔ̀ gi cán, gee wolo tóolɛɛbèle joo n tɛ̀ɛn wolo na lè,

⁴ wolo a gi làriga be pìíbèle na í, wolo a ra Yawe kpɔ̀ʔɔrɔli kèlē nyuu bele ma be yìrigí wolo kàdoʔo ma lè, bi wɔ́ɔ ra wi séew ní wi kakpoloyi kéele nyuu, yee wi kpéʔele lè.

⁵ Wi n séera yaʔa Zyakɔbi ma, wi n làlwa tɛ́ʔɛ Isirayɛli ni, wee kéele wi joo n gbàn wolo tóolɛɛbèle ma níì jo pe wi tɛ̀ɛn be pìíbèle na lè.

⁶ Koro ga pye bele pe a ba yìri lè, poro í ge cán, pìíbèle bele pe a see lè, poro a ba yìri si gi joo poro pìíbèle ma

⁷ koro ga pye pe be sɔ̀ngumi taʔa Kolocɔlɔɔ na. Pe a tée fɛ̀ʔɛ Kolocɔlɔɔ kapyegèle na í, pe a wi kajoodɛ̀ɛngèle sámaga cò.

⁸ Jàngó pe a kɔ́ pye be toolɛɛbèle félege í, lǎli bee syɛ̀ɛnnɛ pe da pye lè be toolɛɛbèle, be pye lè líiweepɛɛnnɛ syɛɛnnɛ ní niceebéle, pe fúnyi da pye kàbanga nibin na í, pe pìígèle da fílige Kolocɔlɔɔ kàbangi na í.

⁹ Kapɛɛnkpumɔn-yáriri ní sedeyi maa pye Efirayimi narigbaagi wòolo kɔ́yɔ ni, pe si maa kàdoʔo wáa kapɛɛnni canʔa na.

¹⁰ Pe ga Kolocɔlɔɔ joogaanni cò í, pe ga fɔ̀lɔ ni táanri wi làlwaw na í.

¹¹ Pe n fɛ̀ʔɛ wi kakpoloyi na, ní bìngaari kèlē na wi da kpéʔele a be nyaa lè.

¹² Wi maa kakpɔʔɔ kpéʔele pe toolɛɛbèle nyɛ́nɛ na Ezyipiti tári ni, Sowan sìnbirigi ni.

¹³ Wi maa sólomi lɔ̀ʔɔ tíla níì be yaʔa a be tánʔa n sɔ̀lɔ, wi maa lǒgi yérige n kpoʔolo.

¹⁴ Wi maa ni pe yɛ́ɛgi kínigi cángi làla ni ní fàfaantɔnɔgɔ ní, ní i syée pe yɛ́ɛgi na ní naàgbɛɛnmɛ ní, yébiligi myɛ ni.

¹⁵ Wi n fálaya yabala fìími tára ni, níì lònɛʔɛgɛ kaan be ma pe gbaa, a lǒgi bee pye mɔ a jo ki n yiri lòkpɔɔ-cùrugo ni.

¹⁶ Wi n lɔ̀ʔɔ yirige fálaga ni a gi i fóo, a gi i fóo ni tíri àmɛɛ cábiya nyɛ lè.

¹⁷ Kàjáa a be sèʔê kòro ni kapeegèle kpéʔele wi na, wee wi nyɛ lè Pe Myɛ Nyúngo na, pe n yìri wee bee kánma na fìími tára ni.

¹⁸ Pe n Kolocɔlɔɔ pye n wéle be fúnyi ni, níì yaliire nyɛ́ɛri wi ma n yɛlɛ ní be ki laànitaagi ní.

¹⁹ Pe n syɛɛnpeere joo n wáa Kolocɔlɔɔ na níì jo: «A Kolocɔlɔɔ a gbǎn yaliire tɛ́ʔɛ lé syɛ́ɛnbèle taana fìími tára ni?

²⁰ Wéle, wi n fálagi kpúmɔn, a lɔ̀ʔɔ yiri gi ni ni fóo, a lòcooloyo kabi ni fóo. A wi si a wɔ́ɔ gbǎn búru kaan lé si wɔ́ɔ kaara kaan wi syɛ́ɛnbèle ma?»

²¹ A Yawe fúngi tanʔa àmɛɛ wi syɛ́ɛnri bee lóʔo lè, a naà cò Zyakɔbi kánmi na, a fundanʔari yìri Isirayɛli kurugo,

²² àmɛɛ gi nyɛ lè pe da tága Kolocɔlɔɔ na í, ncan pe da be sɔ̀ngumi taʔa wi syɔɔli na í.

²³ Wi si n tundunro joo fàfaanyi ma ǹjogi ni, wi n nyɛ̀ʔɛni kpaaweegéle múgu.

²⁴ Wi n mánɛw cáan be ma àmɛɛ zàʔá nyɛ lè, a wi pye be yaliiri, wi n nyɛ̀ʔɛni yaliire kaan be ma.

²⁵ Pe myɛ nibin nibin n nyɛ̀ʔɛni tundunbéle liile lìi, wi n yaliiri kaan be ma fwɔɔ a be tín.

²⁶ Wi n canʔafolomɔ káfalagi yìrige yaà nyɛ̀ʔɛni na ki i funu, níì wòrogulo kàbangi káfalaga yìrige wi séew báriga ni ki i funu.

²⁷ Wi n wɔ́ɔ̀ káari tìrige be ma àmɛɛ zàʔá nyɛ lè, ní àmɛɛ támiige nyɛ lè, féjɛɛnrɛ di pye. Ti maa nɛʔɛ àmɛɛ sólomi lɔ̀ʔɔ nyɔ́ɔ táminyɔɔ nyɛ lè,

²⁸ toro dee wi cáan cáan be níngi ni, be tɛɛkòrogi ni n be fànikpaayi màʔa lè.

²⁹ Pe n tɔ̀nɔ n lìi n tín páan, wi n be ki laànitaagi yáriga kaan be ma.

³⁰ Pe ki laànitaagi sɔ̀ngurɔ da kɔ́ɔ̀ kwɔ́ɔ í, pe lìíli maa sèʔê pye be nyɔ́ɔyi ni,

³¹ á Kolocɔlɔɔ fundanʔari yìri be kurugo. Wi n be nànniribèle kpóo, wi n Isirayɛli nìgɔcaribèle kpúmɔn n cáan.

³² Koro ní ki myɛ ní a be sèʔê kòro ni kapeegèle kpéʔele, pe ga tága wi kakpoloyi na í.

³³ Wi n be sìíw canya yaʔa a yi sɔ̀lɔ káfalaga, n be sìíw yɛ̀ʔɛlɛ kwɔ́ɔ zɔ̀nviikɔniri ni.

³⁴ Lǎli ni wi baa nan bi be kpóo lè, a be náa i wi caa, a be lúru ni Kolocɔlɔɔ caa.

³⁵ A be sɔ̀ngi n taa gi na ncan Kolocɔlɔɔ wi nyɛ poro fálagi, Kolocɔlɔɔ wi lè Pe Myɛ Nyúngo na, woro wi nyɛ poro nyùnzyɔɔw.

³⁶ Kàjáa pe maa ni caa bi wi lɛ́ɛlɛ ní be syɛɛntaanri ní, ní i finɛ be nyɔ́ɔyi ni wi ma.

³⁷ Pe fúnyi da sámaga n yére wi kàbangi na í, pe da pye tágala syɛɛnnɛ wi joogaanni kéele na í.

³⁸ Kàjáa woro wee wi lè nyinidaaw, wi maa ni be kùsulugi syoo, wi ga be kálagi í. Wi fúngi ga yìri, wi i gi tìrigí tɔlɔyɔ saʔa, wi da ni wi fundanʔari myɛ yìrigí í.

³⁹ Wi maa sɔ̀ngi n taa gi na n jo pe i nyɛ cere yagana, káfalaga, gee gi sɔ̀lɔ́ lè, ki si a ní lúru pan í.

⁴⁰ Pe n wi cée fìími tára ni tɔlɔyɔ saʔa! Pe n wi fúngi tanʔa n be yaʔa táwaari ni!

⁴¹ A be níì séli ni Kolocɔlɔɔ pingi ni wéle, ni Isirayɛli Wojanw ŋɔ́ngi.

⁴² Pe ga níì sɔ̀ngi n taa wi séew na í, ní cángi na, gee ni wi be syɔɔ be kàsiitun-nyɛ́nw ma lè í.

⁴³ Pe ga wɔ́ɔ̀ sɔ̀ngi n taa fɛ̀ɛ́bèle na wi kpéʔele Ezyipiti tári ni lè í, ní wi kakpoloyi na wi kpéʔele Sowan sìnbiriyi ni lè í.

⁴⁴ Wi n be Niiliw lókɔyɔ kàriga sìsyaan, àlí pe ga gbàn ni yi lǒyi gbo í.

⁴⁵ Wi n sísyɔɔnpeere tórigo be kurugo fwɔɔ a di i be káa, ní jàwalinɛʔɛrɛ ní, a di i be kálagi.

⁴⁶ Wi n be yaliifálari kaan kábàrari ma, wi n be fɔ̀rɔgi tɔ̀nɔ kaan kúdow ma.

⁴⁷ Wi n be ɛrɛzɛn tíriri kálagi ní zěsolomi ní, níì be děsyaantiiri kálagi ní weegbanri ní.

⁴⁸ Wi n gi yaʔa a zěsolomi be nǐyi kpóo, a nyɛ̀ʔɛvōloli wɔ́ɔ̀ be bàtoyi kpóo.

⁴⁹ Wi n wi fundanʔagbɔɔri cáan be na, ti lè fúngi yìrile, ní fundanʔaw, ní kálagili, àmɛɛ nyɛ̀ʔɛni tundunbéle gboolo galagí nyɛ lè.

⁵⁰ Wi n kologo yaʔa wi fundanʔari ma, wi ga be syɔɔ kùu ma í, wi n be sìíw yaʔa káfalagi yáama ma.

⁵¹ Wi n Ezyipiti ye pìiselibèle myɛ kpóo pe lè pe bárigaw yaselige, pe nyɛ lè Kami fànikpaayi fúngo woolo.

⁵² Níì wi syɛ́ɛnbèle kɔ́ri n yirige àmɛɛ bàala yirigi lè bàkpaʔa ni, n be kɔ́ri n kári fìími tára ni àmɛɛ bàtogo nyɛ lè.

⁵³ Wi n kári ní be ní cerenyinmɛ na, pe ga téè fyáa í, á sólomi lɔ̀ʔɔ lúru n be nigoobèle tɔ́n.

⁵⁴ Wi n sáà nan ní be ní wi tɛɛcǎngi láʔagologo na, nyanbelegi na, gee wi kàliigi taa lè.

⁵⁵ Wi n syɛɛnfeleyaa nɛnɛ pe yɛ́ɛgi na n yirige yaà, níì mɛɛnnɛ tɛ́ʔɛ n yi tári tímana n lɛɛ be na a di pye be kɔrigɔ, wi n Isirayɛli syɛɛnfeleyi télege be fànikpaayi ni.

⁵⁶ Koro ní ki myɛ ní Kolocɔlɔɔ wi nyɛ lè Pe Myɛ Nyúngo na, pe n wi pye n wéle, pe n wi cée, pe ga wi làlwaw kèlē cò í.

⁵⁷ Pe n lúru kàdoʔo ma n jànvaa kpéʔele àmɛɛ be toolɛɛbèle da pye lè, pe n kólogi yaʔa àmɛɛ sedege nyɛ, gee mɛ́ɛnnɛ li yɔ̀rɔ lè.

⁵⁸ Pe n syɛɛnfeleyi sáriga-wòlo-tɛ́ɛyɛ kéele tɛ́ʔɛ n wi fúngi tanʔa, níì be ǹdedanyi kéele tɛ́ʔɛ n kayaʔa wáa wi na.

⁵⁹ Amɛɛ Kolocɔlɔɔ gee bee kɔ̀rɔsíi lè, a wi fúngi tanʔa. A Isirayɛli ye láaw kwɔ́ɔ wi ni péw.

⁶⁰ Wi n Silo kpáagi yaʔa, fànikpaagi bee wi da yérige syɔɔn ye níngi ni lè.

⁶¹ Wi n wi séew fɛ̀ɛ le púlori ni, n wi nìjanri le wi kàsiitun-nyɛ́nw kɔ́yɔ ni.

⁶² Wi n wi syɛ́ɛnbèle kaan ŋɔséew ma, wi fúngi n tanʔa wi kɔ́rigi kurugo.

⁶³ Naà n be nìgɔcaribèle sórigo mɛ́nɛ mɛ́nɛ, cèpɔrigɔ ŋúnugo ga níì lóʔo be pìcaabèle kéele na í.

⁶⁴ Ŋɔsée n be sáriga-wòlobèle kpóo n cáan, pe lɔgucebèle si ga be kùúgi nyɛni í.

⁶⁵ Lǎli bee ni a Kàfɔw nyán, mɔ a jo wi da ni ŋúnɔ wii, àmɛɛ nànnirio nyɛ, wee dùvɛɛn cò a wi i yákpogi wáa lè,

⁶⁶ wi n taʔa wi nigoobèle na ni kpúmɔn ni syée, wi n be kàriga yafaʔagéle, pe kòro nya làla o làla.

⁶⁷ Wi si n Zyozɛfu fànikpaagi cée, wi ga Efirayimi narigi nyɛ́nɛ n wòlo í.

⁶⁸ Kàjáa wi n Zyuda narigi nyɛ́nɛ n wòlo, ki lè Siyɔn nyanbelegi, koro gee kéele li wi dɛ́nɛ lè.

⁶⁹ Wi n wi tɛɛcǎngi faan a gi pye àmɛɛ ǹjoʔo ma tɛ́ɛyi nyɛ lè, mɔ a jo àmɛɛ tári nyɛ, dee kàpɔɔn wi sámaga n le n yaʔa lè nya làla o làla.

⁷⁰ Wi n wi falipyew Davidi nyɛ́nɛ n wòlo. Wi n wi yirige yaà bàkpaayi ni.

⁷¹ Wi n wi yeri n lúrugo bànɔɔbèle kurugo, bele má bàpiigèle ŋɔri lè, koro ga pye wi pye woro syɛ́ɛnbèle nàʔafɔlɔ, pe lè Zyakɔbi ye, pe lè woro kɔ́rigi Isirayɛli ye.

⁷² A Davidi i be náari ní funviire ní, ní i be yɛ́ɛgi kínigi ní sícilimɛ kɔ́yɔ ní.