Ŋúnuyi 77 - Cebaara Bible 2010

Ŋúnuyi 77 N mii yaʔa wɔʔɔgi ni mii i mɔ booma kakpoloyi kéele nyuu

¹ Ŋúnuŋùúbèle kùndigi wóʔo. N yɛlɛ ní Yedutun kánmi ní. Azafi ŋúnugi. Kpɔ̀ʔɔrɔli ŋúnugo.

² Mii yákpoli i yìrigí ǹjogi ni Kolocɔlɔɔ ma, mii i yákpoli wáa. Mii yákpoli i yìrigí ǹjogi ni Kolocɔlɔɔ ma, wi i líiyi cáan mii ma.

³ Mii i Kàfɔw caa mii wɔʔɔli canʔa na. Mii kɔ́gi n kòro wozánʔaga ní yébiligi ni, sìnvɔrɔ ni. Mii fúngi ga fɔ̀lɔ wàa í koro kpɛʔɛlɛ í.

⁴ Mii ga sɔ̀ngi n taa Kolocɔlɔɔ na, mii n ni cɛ́ɛn. Mii i sɔ̀ngí, a mii pǐli fànʔa kwɔ́ɔ. Ŋɔ́ndaala

⁵ Mɔ i ŋúnɔmi pée mii nyapiigèle na. Mii fúngi n curugo. Mii ga níì gi cán gee mii a joo lè í.

⁶ Mii i sɔ̀ngí booma cányi kéele na, yee yi sɔ̀lɔ lè, ní yɛɛdɔɔngèle kéele na ge sɔ̀lɔ lè.

⁷ Mii i sɔ̀ngí ni taagi mii tamani ŋúnugo na yébiligi ni, mii i sɔ̀ngí mii fúngi ni, mii pǐli i sɛʔɛwelele kpéʔele.

⁸ «Kàfɔw a syɔɔn wáa lé bi yaʔa gi kòro nya làla o làla? Wi a ní ba fɔ̀lɔ lé wi na í?

⁹ A wi funjǎngi kwɔ́ɔ lé wii nya ki a ní pye í? A wi syɛɛnjóori sàa lé wii nya làrigèle myɛ syɛ̀ɛnnɛ ma?

¹⁰ A Kolocɔlɔɔ fɛ̀ʔɛ lé, wi a tée ní nyinimɛ taa í? A wi fúngi tanʔa lé fwɔɔ a wi nyínimi myɛ kwɔ́ɔ?» Ŋɔ́ndaala

¹¹ Mii n jo: «Gee gi nyɛ lè mii fɔ̀rɔgi kéele, koro gi nyɛ ncan wee wi nyɛ lè Pe Myɛ Nyúngo na, wi kàliigi ní o nyɛ gi kanlɛɛmi na í.»

¹² Mii i sɔ̀ngí ni taagi, Yawe, mɔ kapyegèle kéele na, mii tɔ̀nɔ́ i sɔ̀ngí ni taagi kakpoloyi na mɔ kpéʔele lè booma ni.

¹³ Mii a ra mɔ kapyegèle myɛ kéele sɔ̀ngí sáā sɔ̀ngí mɔ kakpoloyi kéele na.

¹⁴ Ee Kolocɔlɔɔ, mɔ kólogi n tɔ̀nɔ n nyɔɔ. Kolocɔlɔwìí wi kpɔ́ʔɔ n pye mɔ félege, Kolocɔlɔɔ?

¹⁵ Mɔ wi nyɛ Kolocɔlɔɔ, wee wi kakpoloyo kpéʔele lè. Mɔ n mɔ séew tɛ̀ɛn syɛɛnfeleyi nínge ni.

¹⁶ Mɔ n mɔ syɛ́ɛnbèle nyúnyo syɔɔ ní mɔ kɔ́gi ní, pe lè Zyakɔbi pìíbèle, ní Zyozɛfu pìíbèle. Ŋɔ́ndaala

¹⁷ Lǒyi n mɔ nyaa, ee Kolocɔlɔɔ! Lǒyi n mɔ nyaa a yi i cɛ̀lɛ́. Alí weecuruyi n cúngo.

¹⁸ Fàfaanyi n lònɛʔɛgɛ wo, nyɛ̀ʔɛwɔɔli n tìn, a mɔ ŋáayi wɔ́ɔ̀ kári kàbanyi myɛ na.

¹⁹ Mɔ nyɛʔɛvololi maa pye káfala-sìnjinni ni, nyɛ̀ʔɛni nyɛ́ʔɛnɛmɛ n gbɛ̀ɛnmɛ yirige dulunyanw ma. Tári n cúngo níì cɛ̀lɛ.

²⁰ Mɔ kólogi n pye sólomi lɔ̀ʔɔ ni, mɔ tɛɛsɔ̀lɔgi n pye lòkpoloyi fúngo ni, syɔɔn faala ga mɔ túluyi nyaa í.

²¹ Mɔ n Mowizi ní Aarɔn tɛ́ʔɛ n mɔ syɛ́ɛnbèle yɛ́ʔɛ kíni àmɛɛ be bàtogo yɛ́ʔɛ kínigi lè.