Ŋúnuyi 76 - Cebaara Bible 2010

Ŋúnuyi 76 Kolocɔlɔɔ n kapɛɛnni sàa Siyɔn ni

¹ Ŋúnuŋùúbèle kùndigi wóʔo. Ní kɔ̀ríw ní. Azafi ŋúnugi. Kpɔ̀ʔɔrɔli ŋúnugo.

² Kolocɔlɔɔ kéeli n cán Zyuda ni, wi mɛ́ɛgi n kpɔ́ʔɔ Isirayɛli tári ni.

³ Wi fànikpaagi i nyɛ Salɛmi ni, wi tɛɛkòrogi i nyɛ Siyɔn ni.

⁴ Tɛ́ɛgi bee ni wi sedeyi ŋáaya kabagi, n fàra tunmɔzige-yáriyi, ní ŋɔséebèle na, níì kapɛɛnni sàa. Ŋɔ́ndaala

⁵ Nìjangbɔɔrɔ ní kpɔʔɔrɔ i nyɛ mɔ na n sɔ̀lɔ kapɛɛnnɛ yakoli-gboʔoloro na, ti nyɛ lè nyanbeleye.

⁶ Pe n nànniribèle bee fuguri, pe n too be ŋúnɔzanmi na, kapɛɛnkpumɔn-sànbalibèle bee myɛ kɔ́yɔ n fɔlɔ.

⁷ Ee Zyakɔbi Kolocɔlɔw, ŋúnɔgbɔɔmɔ n syɔɔnfǎnbèle ní syɔ́ɔnyi cò mɔ syɛɛngbanri joolo báriga ni.

⁸ Mɔ tɔ̀nɔ́ wi nyɛ fyáakpɔɔri yáriga! Wìí syɔ́ɔn wi a gbǎn yére mɔ yɛ́ʔɛ ma mɔ fundanʔari làla ni?

⁹ N mɔ yaʔa yaà nyɛ̀ʔɛni na, mɔ n kútiisinw ceri. Fyáari n tári cò a di yére sági,

¹⁰ lǎli ni Kolocɔlɔɔ yìri bi kútiisinw ceri lè, si tári màabyebèlē myɛ syɔɔ. Ŋɔ́ndaala

¹¹ Alí syɔɔn ye fundanʔari a ra mɔ mɛ́ɛgi kpɔ̀ʔɔrɔ́. Mɔ a fundanʔari wogorobéle tɛ́ʔɛ bi miyɛɛ bwɔɔ.

¹² Yaa nyɔɔfaliyi kpéʔele Yawe yele Kolocɔlɔw ma, yáā yi forogi! Syɛɛnfeleyi myɛ yi tɛ́ɛn n wi màʔa lè, ki n yɛlɛ yaa maa ní kpɔ́ʔɔri yárira ní wee má wi nyɛ lè fyáakpɔɔrɔ Kolocɔlɔw!

¹³ Wi i kùndigibèle ŋɔ́ngara cɛnɛ, wi i nyɛ fyáakpɔɔrɔ wóo ní, tári fànʔafɔɔlɔ ma.