Ŋúnuyi 75 - Cebaara Bible 2010

Ŋúnuyi 75 Kolocɔlɔɔ wi nyɛ kútiiceriw

¹ Ŋúnuŋùúbèle kùndigi wóʔo. Ki joo lè «Mɔ a kɔ́ wi kpóo í.» Azafi ŋúnugi. Kpɔ̀ʔɔrɔli ŋúnugo.

² Wolo i bariga kaangi mɔ ma, Kolocɔlɔɔ! Wolo i bariga kaangi mɔ ma. Mɔ mɛ́ɛgi n nùuni wolo na, pe i mɔ kakpoloyi kéele jáari.

³ Lǎlee mii ga tɛ́ʔɛ lè, mii a ba kútiiw joo ní sínnɛ ní.

⁴ Tári i cúngu n fàra bele myɛ na be nyɛ di na lè, mii si wi di gàángèle yéregi. Ŋɔ́ndaala

⁵ Mii n gi joo bele ma pe peyɛɛ gbɔ́ʔɔgi lè níì jo: «Ye a kɔ́ ra yeyɛɛ gbɔ́ʔɔgi í.» Ní syɛɛnpeebèle ma níì jo: «Yele a kɔ́ yele nyɛ́ngèle yìrige í!

⁶ Yele a kɔ́ yele nyɛ́ngèle yìrige ǹjoʔo ma í, yele a kɔ́ ra nyuu nyùngbowaaya ni í.»

⁷ Níì cán canʔafolomɔ, ní canʔajeemɛ ní fìími tára nyanbeleye kabaan má ban kpɔ́ʔɔri yìrigí í.

⁸ Kàjáa kútiijoow wi nyɛ Kolocɔlɔɔ, woro wi wàa tìrigí táàma, ní wɔ́ɔ i wàa yìrigí ǹjogi ni.

⁹ Yagbaala i nyɛ Yawe kɔ́gi ni, lee ni dùvɛɛn nyɛ ni kángi, wee be nyáʔami lè, wi i wi sòʔó, syɛɛnpeebèle myɛ be nyɛ lè tári na, pe a wi gbaa bi wi sindɛɛgi myɛ gbaa.

¹⁰ Mii si na, mii a ra gee bee jáari làrigèle myɛ ni. Mii a ra Zyakɔbi Kolocɔlɔw kpɔ̀ʔɔrɔlɔ ŋúnuyo ŋúu.

¹¹ Mii a syɛɛnpeebèle myɛ nyɛ́ngéle cɛnɛ bi láʔa yaà. Syɛɛnsinbèle nyɛ́ngéle si a yìri ǹjoʔo ma.