Ŋúnuyi 74 - Cebaara Bible 2010

Ŋúnuyi 74 Pe i Kolocɔlɔɔ yiri àmɛɛ kpɔ̀ʔɔrɔli kpaʔa kálagi lè

1 Tamani ŋúnugo Azafi ŋùu lè.

¹ Tamani ŋúnugo Azafi ŋùu lè. Ee Kolocɔlɔɔ, nyàʔá na mɔ wolo wáa n yaʔa nya làla o làla? Nyàʔá na mɔ fundanʔari có naà bǎbèle kánma na bele mɔ náari lè?

² Sɔ̀ngi mi taa mɔ syɛ́ɛnbèle kéele na, bele mɔ taa lè booma ni, poro bele nyùnzyɔɔrɔ mɔ kpéʔele lè, pe i nyɛ mɔ kɔ́rigi syɛɛnfelege! Sɔ̀ngi mi taa Siyɔn nyanbelegi na, gee na mɔ da mɔ tɛɛkòrogi sámaga lè.

³ Yìri mi ba bàngwɔɔ kálagili tɛ́ɛyɛ wéle yee! Nigoow n yáriri myɛ kálagi tɛɛcǎngi ni.

⁴ Mɔ kasiitun-nyɛnbèle n cóʔoro gbanʔama mɔ syɛ́ɛnmi tɛɛ̀kpoʔorogo fanikpaʔa ni, àlí pe n be dìrapobèle pwɔɔ yaà n pye fɛ̀ɛ.

⁵ Pe n peyɛɛ bye àmɛɛ tiikpumɔnbéle nyɛ lè, bele pe be kpánayi láa n jée kákpoʔo ni, ni jee lè.

⁶ Tɔ́ɔliw ni pe n yatanri myɛ jabagi ní kpánayi, ní màritobèle ní.

⁷ Pe n naà le mɔ tɛɛcǎngi na. Tɛ́ɛgee na mɔ mɛ́ɛgi nyɛ lè, pe n gi nɔ́nʔɔ níì gi cáan tári na.

⁸ Pe maa ni gi nyuu peyɛɛ fúnyi ni níì jo: «Wo be myɛ pínɛ wo tɔ́n wo kálagi làla nibin ni!» Pe n Kolocɔlɔɔ kpɔ̀ʔɔrɔli tɛɛcànya myɛ sórigo tári ni.

⁹ Wolo ní o wolo fɛ̀ɛ́bèle nyaagi í. Kanyaajooo ní o beè í, syɔɔnwaa o nyɛ wolo níngi ni wee wi gi cán lǎlee myɛ kánma gee bee a kwɔ́ɔ lè í.

¹⁰ Ɔnhɔ́n, ee Kolocɔlɔɔ! Làlìí ni wolo kàsiitun-nyɛ́nw a láʔa nya mɔ faʔali na? A wolo nigoow a kòro lé bàā mɔ mɛ́ɛgi kálagi bàā syée nya làla o làla?

¹¹ Nyàʔá na mɔ mɔ kɔ́gi tìrige, mɔ kaliige kɔ́gi? Ki sánʔa! Pe kálagi!

¹² Ee Kolocɔlɔɔ, mɔ wi nyɛ mii fànʔafɔw nlaa yaà làridɔɔnnɔ ni, mɔ wi syɔɔli kapyegèlē kpéʔele tári ni.

¹³ Mɔ wi sólomi lɔ̀ʔɔ tíla ní mɔ séekpɔɔw ní, níì yacobeeyi nyúnyo jabagi lǒyi ni.

¹⁴ Mɔ wi Levyatan nyúnyi jabagi. Mɔ n wi kaan fìími tára woolo ma, wi pye be ma kaara.

¹⁵ Mɔ wi púloweegèle ní lòcoologi pye ki i fóo. Cábiyi yi lè yi o waari í, mɔ i yi waari.

¹⁶ Cángi i nyɛ mɔ wóʔo, a yébiligi wɔ́ɔ i nyɛ mɔ wóʔo, mɔ wi yégi ní cángi sámaga.

¹⁷ Mɔ wi tári láʔagéle myɛ kúun. Mɔ wi wɔ̀ɔ́gi ní gbɛ̀ɛ́ngi kpéʔele.

¹⁸ Sɔ̀ngi mi taa gee naa na: Yawe, nigoow i mɔ faari, syɛɛnfele-nilabalaga i mɔ mɛ́ɛgi kálagi!

¹⁹ Mɔ a kɔ́ mɔ katoli sìi kaan yaweeri ma í, mɔ a kɔ́ fɛ̀ʔɛ mɔ fɔrɔgɔfɔbèle sìi na bi kòro nya làla o làla í!

²⁰ Yákirii yaʔa joogaanni na! Níì cán tári yébilimɛ tɛ́ɛyɛ n nyìn gàlagíw tɛɛlaraya na.

²¹ Bele na fǎngi gbàn lè, mɔ a tɔ́ɔ kɔ́ gi yaʔa fɛ̀ɛrɛ í be taa be lúru í! Fɔ̀ngɔfɔw ní foomɔfɔw n yɛlɛ bàā mɔ mɛ́ɛgi sòoló!

²² Ee Kolocɔlɔɔ, ki n yɛlɛ mi yìri, miyɛɛ kánmi joo mi tɛ̀ɛn! Sɔ̀ngi mi taa faʔari na, dee na nilabalaw mɔ faari lè canʔa o canʔa!

²³ Mɔ a kɔ́ fɛ̀ʔɛ mɔ kasiitun-nyɛ́nbèle yákpowáara na í, bele be yìri mɔ kurugo lè, bele bee kàfulogo i kpɔ́ʔɔgi ni syée yɛʔɛ̀ ma làla o làla!