Ŋúnuyi 73 - Cebaara Bible 2010

SƐBƐTAANRI WOW ( 73—89 ) Ŋúnuyi 73 Lǎli ni syɛɛnpeebèle kèlē keyɛɛ daa lè

1 Azafi ŋúnugi.

¹ Azafi ŋúnugi. Kányɛʔɛ na, Kolocɔlɔɔ n tɔ̀nɔ n nyɔɔ Isirayɛli ye ma, bele fúnyo yi fíligi lè, wi n nyɔɔ poro ma.

² Mii si na, ki maa kòro cɛɛri mii tɔ́lɔyi si yiri mii láari ni, yafyɛn da níì pye yaà í fwɔɔ mii nyɔ̌ngèle í tàra.

³ Níì cán nɛ̀ɛnyɛnɛgi fɔ̀ɔlɔ nyábɛɛnnɛ maa pye mii na, àmɛɛ mii syɛɛnpeebèle nyaagi ŋɔ́ndaali ni lè.

⁴ Yafyɛn o be wɔʔɔ í fwɔɔ bi taa sa nan kùúw na, pe n nyɔɔ céri na níì kpólo.

⁵ Wɔʔɔyee yi tuun syɛ́ɛnbèle na lè, yi o nangi be na í, pe o pìnɛ́ ni wɔʔɔ ní syɔɔn ye ní í.

⁶ Koro na kpɔ́ɔmi i nyɛ be na àmɛɛ kɔ́nɔtirige nyɛ lè, á be péemi le burogo a pi be tɔ́n.

⁷ Pe yɛ́ɛyi n nyìn n pínɛ sǐnmi na, pe i kpɔ́ɔmi kèlē tímana be fúnyi ni n sɔ̀lɔ ki dǎnw na.

⁸ Pe i peyɛɛ nyɛ́nɛ, ní i syɛɛngbanri nyuu. Pe i wɔʔɔgi taʔala syɛ́ɛnrɛ nyuu ní kpɔɔmɔ ní.

⁹ Pe i pe nyɔ́ɔyi nii nyɛ̀ʔɛni kèlē ni, pe nyíngèle i tári nyaari ni sɔ̀lɔ́.

¹⁰ Koro na wi syɛ́ɛnbèle fíige be kàbangi na, pe i lǒgi kùunú ni gbo.

¹¹ Pe i gi nyuu níì jo: «Kanmìí na Kolocɔlɔɔ a gi cán? Wee wi nyɛ lè Pe Myɛ Nyúngo na, a wi keele cán lé?»

¹² Kánmi bee na syɛɛnpeebèle nyɛ, pe i nyɛ yɛɛ̀nyinge na canʔa o canʔa, ní i kàa fàrá be lɔ́ri na.

¹³ Koro na, a mii mii fúngi fílige wii gbanzan, níì mii kɔ́yi jée tɛɛlɛ-fǔnmi ni gbanzan.

¹⁴ Pe i mii kpúmɔn canʔa o canʔa, nyɛ̀ʔɛ nyɔ́ɔ o nyɛ̀ʔɛ nyɔ́ɔ na wɔʔɔyi nangi mii na.

¹⁵ Mii ga maa ni gi nyuu níì jo: «Mii a ra nyuu pe jooganmi na,» wéle, mii mǎà dée mɔ lali naa pìibēle jànváa.

¹⁶ Mii maa ni caa bi sɔ̀ngi kéeli bee na bi li kɔ́rɔw cán. A koro si pye mii ma fɔ̀rɔgbɔʔɔ.

¹⁷ Fwɔɔ n taa cángee na mii sáà jée Kolocɔlɔɔ kpɔ̀ʔɔrɔli tɛɛcànga ni lè, a mii náà syɛɛnpeebèle kwɔ́ɔganma kɔ́rɔ cán.

¹⁸ Kányɛʔɛ na, mɔ i be téeri tɛɛtàraga ni, mɔ i be wáa kálagili ni.

¹⁹ Ee! Cɛɛri na pe a kálagi bi kwɔ́ɔ, pe n nan kwɔ́ɔmi na, fyáakpɔɔri n be kálagi péw.

²⁰ Ee Kàfɔw, àmɛɛ ŋúnɔgɔ nyɛ lè lǎli ni syɔɔn yìri lè, kánmi bee na mɔ ga yìri lǎli ni lè, mɔ a be niwirigi núngo miyɛɛ daana.

²¹ Lǎli ni mii pye funbɛɛnrɛ na lè, á gi pye mii ma mɔ a jo pe n mii fùru sárigèle ni,

²² mii fúngi maa tɔ́n, a mii pye kanaa-sìnjáɔn, mii maa pye mɔ taana àmɛɛ yaweʔe nyɛ lè.

²³ Koro ní ki myɛ ní mii sèʔé i nyɛ ní mɔ ní làla o làla, mɔ n mii cò kàliige kɔ́gi na.

²⁴ Mɔ i mii yɛ́ɛgi kínigi mɔ lálii syɛ́ɛnri báriga ni, koro kàdoʔo ma mɔ a mii láa lége mɔ nijangbɔɔri ni.

²⁵ Wìí wi ní i yaà mii ma nyɛ̀ʔɛni na kapye mɔ ban í? Yafyɛn kéele ga níì mii dɛ́nɛ tári na í, kapye mɔ ban í.

²⁶ Mii céri ní mii fúngi báriga a gbǎn kwɔ́ɔ, kàjáa Kolocɔlɔɔ si wi a pye mii Fálagi ní mii lɛɛli làrigèle myɛ ni.

²⁷ Wéle, syɛ́ɛnbèle bele be peyɛɛ léeli mɔ na lè, pe i kúu. Bele myɛ si be lè pe o nyɛ tágala syɛɛnnɛ mɔ ma í, mɔ i bele bee kwóo.

²⁸ Mii si na, bi nùuni Kolocɔlɔɔ na, koro gi mii kanidaanni, mii n Kàfɔw Yawe pye mii tɛɛlaragi, koro ga pye mii í da mɔ kapyegèle myɛ kéele nyuu.