Ŋúnuyi 72 - Cebaara Bible 2010

Ŋúnuyi 72 Nyɛ́ɛrigɛ, jàngó Kolocɔlɔɔ í dùbaw taʔa fànʔafɔw na

1 Salomɔn wógi.

¹ Salomɔn wógi. Ee Kolocɔlɔɔ, ki n yɛlɛ mi mɔ kútiiw kèlē cɔɔnriganma kaan fànʔafɔw ma, mɔ sínni kaan fànʔafɔw jáa ma!

² Wi a ra mɔ syɛ́ɛnbèle kútii nyuu ní sínnɛ ní, mɔ syɛ́ɛnbèle be lè foomɔfɔbèle, bàā bele bee kèlē cɔɔnri kányɛɛgi na.

³ Nyanbeleyi a ra yɛɛ̀nyinge kaangi syɛ́ɛnbèle ma, ní dǎndamayi ní wɔ́ɔgēle, sínni báriga ni.

⁴ Wi a ra tànʔa kaangi foomɔfɔbèle ma, syɛ́ɛnbèle ni, si wɔ́ɔ ra funnyɛniyi fɔ̀ɔlɔ piibéle syoo. Wi a be wɔʔɔfɔw tɔ́nʔɔnɔ.

⁵ Pe a ra fɛ̀ɛgí mɔ na bi tɛ́nɛ cángi yaʔa nyɛ̀ʔɛni na, bi wɔ́ɔ yégi yaʔa nyɛ̀ʔɛni na, koro a pye yìrigèle myɛ syɛ̀ɛnnɛ ni.

⁶ Wi a ra tíri àmɛɛ zàʔá tuun lè nyàákɔnigɔ tɛ́ʔɛ na, àmɛɛ zàʔá tára fɔɔnri lè.

⁷ Syɛɛnsiɔn a báriga wi cányi ni, yɛɛ̀nyingi a tɔ̀nɔ́ cariga bi nɛʔɛ fwɔɔ yégi a ní da nyaagi í.

⁸ Wi a tɛ́ɛn yáriri myɛ nyúngo na fwɔɔ bi taa sa nan sólomi lɔ̀ʔɔ láʔalee na, bi séli Ufurati na fwɔɔ bi taa sa nan tári láʔala na.

⁹ Fìími tára syɛɛnnɛ a ba ra yégunri cáan wi yɛʔɛ̀ ma, wi nigoobèle a ba ra támiigi laala.

¹⁰ Tarisiisi fànʔafɔbèle, ní lǒgi nínge tátɛɛgéle fanʔafɔɔlɔ a ba ra kpɔ́ʔɔri kaangi wi ma. Saba ní Seba fànʔafɔbèle a ba ra yakaanri kaangi wi ma.

¹¹ Fànʔafɔbèle myɛ a ba ra tíri da tuun wi yɛʔɛ̀ ma, syɛɛnfeleyi myɛ a ba ra báara wi ma.

¹² Níì cán wi a foomɔfɔw syɔɔ, wee wi yákpoli wáa lè, ní fɔ̀ngɔfɔwee wi nyɛ lè dɛ̀ɛmɛfɔlɔ fun.

¹³ Wi a nyinimɛ taa foomɔfɔw ní fɔ̀ngɔfɔw na, wi a fɔ̀ngɔfɔbèle sìi syɔɔ.

¹⁴ Wi a be nyúnyi syɔɔ námaraw, ní tanʔari ma, wi a be sìsyaanw córo yakpɔʔɔ.

¹⁵ Ki n yɛlɛ wi kòro sìi na, pé ba ra Saba tɛ́ɛw kaangi wi ma. Pe a ra nyɛ́ɛri wi kéeli na làla o làla. Pe a ra wi kpɔ̀ʔɔrɔ́ canʔa o canʔa.

¹⁶ Bilew a tɔ̀nɔ́ nɛʔɛ tári ni. Wi a see bàā fíigi da máari nyanbeleyi na àmɛɛ Liban tíiri nyɛ lè. Syɛ́ɛnbèle a nɛʔɛ kěgi ni bi pye àmɛɛ tári nyàā nyɛ lè.

¹⁷ Wi mɛ́ɛgi a kòro yaà làla o làla, wi mɛ́ɛgi a mɔn beè àmɛɛ cángi nyɛ lè. Woro bárigaw ni tári syɛ̀ɛnnɛ a ba ra dùbaw kpéʔele peyɛɛ ma, syɛɛnfeleyi a ba ra wi yiri dùba pyà.

¹⁸ Yawe Kolocɔlɔɔ, wi lè Isirayɛli Kolocɔlɔw, wi n yɛlɛ waa wi kpɔ̀ʔɔrɔ́, woro nibin wi kakpoloyi kpéʔele!

¹⁹ Wi nìjangbɔɔri mɛ́ʔɛ n yɛlɛ ní kpɔ̀ʔɔrɔlɔ ní làla o làla! Tári myɛ n yɛlɛ bi nyìn wi nìjangbɔɔri na! Amiina! Amiina!

²⁰ Izayi jáaw Davidi nyɛ́ɛriyi kwɔ́ɔmɔ.