Ŋúnuyi 71 - Cebaara Bible 2010

Ŋúnuyi 71 Amɛɛ mii leegi lè tɔ́ɔliw ni mɔ a kɔ́ mii yaʔa í

¹ Ee Yawe, mɔ láari ni mii fàn n làra, fɛ̀ɛrɛ ga yɛlɛ di mii taa nyáana í!

² Mii syɔɔ be ma mɔ sínni báriga ni, mii yirige be kɔ́yi ni! Mɔ líiyi cáan mii kàbangi na, mí mii syɔɔ!

³ Ki n yɛlɛ mɔ í pye mii ma fálaga, gee taana mii a làra lè, ní kènirige, gee ni mii a syɔɔli taa lè, níì cán mɔ wi nyɛ mii Fálagi ní mii Tɛɛnirigi.

⁴ Mii Kolocɔlɔw, mii syɔɔ mi yirige syɛɛnpeew kɔ́lɔ ni, ní syɛɛnnaa-sìnzinw kɔ́lɔ ni wi lè nyinimɛ fun!

⁵ Níì cán mɔ wi nyɛ mii sɔ̀ngumi tɛɛtaʔaga, Kàfɔw Yawe! Mɔ na mii mii sɔ̀ngumi taʔa nlaa yaà mii cárimi làla ni.

⁶ N séli yaà mii nɔ́ɔw láʔa ni, mɔ na mii niyɛɛ zígi. Mɔ wi mii yirige mii nɔ́ɔw láʔa ni. Mɔ wi nyɛ mii yasoologi làrigèle myɛ ni.

⁷ Mii n pye saʔa nyɛ́nɛ na bìngaataa-yariga, bi gi taa mɔ wi nyɛ mii má bárigaw tɛɛlaraga.

⁸ Mii nyɔ́ɔgi n yɛlɛ bi nyìn mɔ soololi, ní mɔ kpɔ́ʔɔri na canʔa o canʔa!

⁹ Mɔ a kɔ́ mii wáa mii lɛ́ɛri làla ni í, mii fǎngi ga kwɔ́ɔ lǎli ni lè, mɔ a kɔ́ mii cée í.

¹⁰ Níì cán mii nigoobèle i mii wóri nyuu, bele be mii sìíw pala lè, poro i peyɛɛ nyaagi ni nyuu.

¹¹ Pe i gi nyuu níì jo: «Kolocɔlɔɔ n wi cée. Ye taʔa wi na, ye wi cò. Syɔɔn faala o nyɛ wi na bi wi syɔɔ í.»

¹² Ee Kolocɔlɔɔ, mɔ a kɔ́ léeli mii na í! Mii Kolocɔlɔw, da maa kelekele mi ba mii syɔɔ.

¹³ Bele be kolomɔ kaangi mii ma lè, ki n yɛlɛ fɛ̀ɛrɛ í be taa be kálagi péw! Bele be mii wɔʔɔli kéele caa lè, ki n yɛlɛ faʔara, ní nyáʔamina í be taa.

¹⁴ Mii si na, mii a kòro sigeli na làla o làla, mii a ra mɔ kpɔ̀ʔɔrɔ́ bàā syée yɛʔɛ̀ ma.

¹⁵ Mii nyɔ́ɔgi a ra mɔ sínni kéele nyuu, syɔɔli mɔ kpéʔele lè, si wɔ́ɔ ra loro kéeli jáari canʔa o canʔa, níì cán mɔ kacǎnyi nyɔ́ɔ a gbǎn cán í.

¹⁶ Mii a ra maa mɔ tɛ́ɛgi ma, Kàfɔw Yawe, mɔ séew kapyegèlē báriga ni! Mii a ra mɔ sínni kéele nyuu, mɔ nibin wóli.

¹⁷ Ee Kolocɔlɔɔ! Mɔ n mii tama, nlaa yaà mii cárimi làla ni, mii i mɔ bingaari kèlē nyuu fwɔɔ n baa nan níjanʔa na.

¹⁸ Ee Kolocɔlɔɔ, àlí mii ga baa lɛɛ, a mii ǹjoori fílige, mɔ a kɔ́ mii cée í, koro ga pye mii í da mɔ fangi kéele nyuu lǎli naa syɛ̀ɛnnɛ ma, mii í ba ra mɔ séew kéele nyuu bele myɛ ma pe a ba yìri lè kàdoʔo ma.

¹⁹ Ee Kolocɔlɔɔ, mɔ sínni kéele n yìri fwɔɔ n nan nyɛ̀ʔɛni na, mɔ n kakpoloyo kpéʔele, ee Kolocɔlɔɔ, wìí wi nyɛ mɔ félege?

²⁰ Mɔ n wo yaʔa a wo wɔʔɔyɔ, ní kálagila nyaa saʔa. Kàjáa mɔ a ní sìi kaan wolo ma, mɔ a mii cò bi yirige tári weecuruyo ni.

²¹ Da kàa fàrá mii kpɔ́ʔɔri na, ní mi mii kpɛʔɛlɛ!

²² Mii na, mii a ra mɔ sòoló ní dǎngboli mɛ́ɛngéle ní, mɔ funjǎngi kéele na, mii Kolocɔlɔw. Mii a ra mɔ kpɔʔɔrɔli ŋúnuyo ŋúu ní kɔ̀ríw ní, Isirayɛli Wojanw!

²³ Mii ga ni ŋúu mɔ kpɔʔɔrɔli kéele na, mii nyɔɔwari a ra fundaanra yákpolo wáa n fàra mii pǐli na mɔ syɔɔ lè.

²⁴ Mii nyínni a wɔ́ɔ ra mɔ sínni kéele nyuu canʔa o canʔa, níì cán bele be mii wɔʔɔli kéele caa lè, fɛ̀ɛrɛ n be taa a be curugo.