Ŋúnuyi 7 - Cebaara Bible 2010

Ŋúnuyi 7 Tànʔa kaan mii ma, Yawe

¹ Davidi funbɛɛnri ŋúnugo. Wi n ŋúnugi bee ŋùu Yawe ma Bɛnzyamɛ ye nǎnw Kusyi kéeli na.

² Ee Yawe, mɔ wi lè mii Kolocɔlɔw, mɔ wi nyɛ mii tɛɛlàragi. Mii syɔɔ mii wɔʔɔfɔbèle myɛ ma, mii syɔɔ be ma,

³ koro ga pye pe a kɔ́ mii sulugu sulugu í, àmɛɛ càaraɔ nyɛ lè, wee wi yariga cò ni sulugu lè, syɔɔfɔlɔ si a taa gi na í.

⁴ Ee Yawe, mii Kolocɔlɔw, kapye mii n koro kpéʔele, kapye mii kɔ́yi n kapeele kpéʔele,

⁵ mii ní syɔ́ɔnwee wo da pínɛ n pye lè yɛɛ̀nyinge na, kapye mii n wi sàra ní kapeele ní, kapye mii n mii kàsiitun-nyɛ́nw yárira koli nyùngo fun,

⁶ ki n yɛlɛ nigoow í mii sìíw nɛnɛ taa, ki n yɛlɛ wi mii sìíw tánʔana tári na, wi mii nìjanri tánʔana lége támiigi ni. Ŋɔ́ndaala

⁷ Ee Yawe, ki n yɛlɛ mɔ fundanʔaratɔw í yìri. Ki n yɛlɛ mi yìri mii kàsiitun-nyɛ́nbèle fundanʔagbɔɔrɔ kánma na, yìri ŋúnɔmi na mi mii dɛ̀ɛmɛ, mɔ wee wi kútiisinw kéele télege lè!

⁸ Ki n yɛlɛ syɛɛnfeleye syɛ́ɛnmɛ í mɔ màʔa! Lúgu mi kári ǹjoʔo ma cama ni, mi sa tɛ́ɛn yaà pi ǹjoʔo ma.

⁹ Yawe, mɔ wee wi syɛɛnfeleyi kútii cɛnɛ lè, ee Yawe, ki n yɛlɛ mi mii kútiiw joo bi yɛlɛ ní mii sínni, ní mii tɛɛlɛ-fǔnmi ní!

¹⁰ Syɛɛnpeebèle kapeeye kwɔ́ɔ nya, máā nìrimɛ nii syɛɛnsinw ni, mɔ wee wi fúngi ní sɔ̀ngumi kèlē sɛʔɛ lè, ee Kolocɔlɔɔ, mɔ wi lè Wozinw.

¹¹ Kolocɔlɔɔ wi nyɛ mii tunmɔzige-yárigi, woro wee wi fûnzinyi fɔ̀ɔlɔ syoo lè.

¹² Kolocɔlɔɔ wi nyɛ kútiijoo-sínw, wi si sèʔé i nyɛ Kolocɔlɔɔ, wee fúngo gi taanri lè canʔa o canʔa.

¹³ Syɛɛnpeeo ga pye wi ga wi kánmi fàli í, wi n wi ŋɔséew jɔɔgɔ, wi n wi sedegi pwɔɔ, níì gi tímana n yaʔa.

¹⁴ Syɛɛnkpoo-yáriri wi sámagi lè, wiyɛɛ kéeli na wi di sámagi, wi n wi ŋaasɔɔnyi kpéʔele naà wóyo.

¹⁵ Wéle, wi i péemi sámagi ni yaari, wi n sìnzinmi fícɛnnɛ taa, níì námaraw see.

¹⁶ Wi i weʔe kúunri, wi i gi túru. Wéegi wi túgu lè, wi i tuun gi ni.

¹⁷ Wi péemi i lúrugu ni kòró wi tiimaa nyúngi ni. Wi tanʔari i lúrugu ni tuun wi tiimaa nyùnjɛɛli na.

¹⁸ Mii a ra Yawe kpɔ̀ʔɔrɔ́ wi sínni kéele na, mii a ra ŋúu Yawe mɛ́ɛgi kpɔ̀ʔɔrɔlɔ kéele na, wi lè Pe Myɛ Nyúngo na.