Ŋúnuyi 69 - Cebaara Bible 2010

Ŋúnuyi 69 Tàmagi gi nyɛ mii ma mɔ kpɔʔɔrɔli kpaʔa kéele na lè

¹ Ŋúnuŋùúbèle kùndigi wóʔo. Nyàáfyɛɛnri na. Davidi ŋúnugi.

² Ee Kolocɔlɔɔ, mii syɔɔ! Níì cán lǒyi i mii có yákpoli ni.

³ Mii i cɔ̀ɔnrí fárigi fúngo ni, mii ga tɛɛwaala taa bi mii tɔ́lɔyi taʔa í, mii n jée lòkpɔɔ-cùrugi ni, lǒgi i fóo ni mii tɔ́ngi.

⁴ Mii bárigaw i kwóo sùpiiwáari báriga ni, mii yákpodirigi i waari, mii nyapiigèle n fɔ̀rɔ mii Kolocɔlɔw sigele na.

⁵ Bele mii kéeli bɛɛn lè nyùngo fun ni, pe n nɛʔɛ n sɔ̀lɔ mii nyúngi ǹjooro na. Bele be mii caa bi kálagi lè, pe fǎngi n nɛʔɛ, pe n baa kàri mii nígoobéle, jànvaa ni. Yárigee gi lè mii ga gi láa í, wéle, fwɔɔ mii í gi caa kaan.

⁶ Ee Kolocɔlɔɔ! Mɔ n mii labalami kéele cán, mii kapeegèle ga làra mɔ na í.

⁷ Bele pe be sɔ̀ngumi taʔa mɔ na lè, mii kéeli ga yɛlɛ li kɔ fɛ̀ɛrɛ wáa be na í, Kàfɔw Yawe, mɔ wi lè Nyɛ̀ʔɛni Sùlasiibéle Kafɔlɔ! Bele be mɔ caa lè, mii kéeli ga yɛlɛ li kɔ be curugo í, ee Isirayɛli Kolocɔlɔw!

⁸ Níì cán mɔ kéeli na mii tɛʔɛlɛyi kpàracó, a fɛ̀ɛ́ri mii nyúngi kpɔ́ʔɔ.

⁹ Mii n baa kàri nibɔɔn mii senyɛnbèle ma, mii laayirinyɛnbèle i mii córo táraa nikwɔɔ syɔ́ɔn.

¹⁰ Níì cán mɔ kpáagi tàmaga kéele n mii lìi, á mɔ faʔafɔbèle faʔara too mii na.

¹¹ Mii n súnw le, ní i nyaan ní mii fúngi myɛ ní, a koro pye mii faʔari nyúngaa.

¹² Mii i gɔ̀nvaʔaga nii burogo, a mii pye be ma kàseewáa-yáriga.

¹³ Bele be tɛ̀ɛ́n kěgi kpàánweele na lè, mii kéeli li kòro be syɛɛnjóori, a mii mɛ́ɛgi kòro singbaadinbèle má ŋúnugo.

¹⁴ Kàjáa ee Yawe, mɔ má mii nyɛ́ɛri! A gi náà pye làrijǎnni ni yoo, ee Kolocɔlɔɔ, mɔ nyínimi n nɛʔɛ! Lóʔo mii ma ní mɔ syɔɔli ní, li lè kányɛɛgi wólo!

¹⁵ Mii kíle mi yirige fárigi ni koro ga pye mii a ní kɔ́ cɔ̀ɔnri gi ni í! Mii si syɔɔ bele má be mii para lè bi wɔ́ɔ syɔɔ lòkpɔɔ-cùrugi ma!

¹⁶ Lòfóozɔ̀lɔgi a kɔ́ mii tɔ́n í, lòkpɔɔ-cùrugi a kɔ́ mii wáa í, weekpɔɔ-cùrugi si a wɔ́ɔ kɔ́ lúru tɔ́n mii na í!

¹⁷ Syɛɛnlurugoro kaan mii ma, ee Yawe, níì cán mɔ nyínimi i nyɛ yacanga. Mɔ yɛ́ɛgi wáa mii kàbangi na bi yɛlɛ ní mɔ nyininɛʔɛmi ní,

¹⁸ mɔ a kɔ́ mɔ yɛ́ɛgi làriga mɔ falipyew na í! Níì cán mii i nyɛ wɔʔɔli ni, lóʔo mii ma kelekele, mɔ a kɔ́ mɔn í!

¹⁹ Nùuni mii pǐli na, mi li syɔɔ! Mii nyúngi syɔɔ mii nigoobèle ma!

²⁰ Mɔ n gi cán kánmee na pe mii teeri lè, ní wɔ́ɔ i fɛ̀ɛ́ri wáa mii na lè, ní i mii cɛ́rɛgi lè. Mɔ nyɛ́nɛ i nyɛ mii kàsiitun-nyɛ́nbèle myɛ na.

²¹ Faʔari n tɔ̀nɔ n mii fúngi kálagi, fwɔɔ n yaama cáan mii na. Mii màko maa pye nyinimɛ na, yafyɛn ga taa í! A mii i kpɛʔɛlɛfɔɔlɔ caa, wàa ga taa í.

²² Pe n yasorogo le mii yaliiri ni, lògbaʔa maa pye mii na, a be vinɛgiri kaan mii ma mii í gbaa.

²³ Ki n yɛlɛ be tàbaliw í pye karinyanga pe yɛʔɛ̀ ma, pe ŋɔ́ndaali làla ni gee bee í pye pe mɛɛncolo!

²⁴ Ki n yɛlɛ yébilimɛ í jée pe nyapiigèle ni, pe a ní kɔ́ ra nyaagi í, pe yaʔa paa kòoló be sárigèle na làrigèle myɛ ni!

²⁵ Ki n yɛlɛ mi mɔ fundanʔari cáan be na, ki n yɛlɛ mɔ fundanʔagbɔɔri í be nɛnɛ taa!

²⁶ Ki n yɛlɛ be tɛɛkòrogi í kòro wowaʔa ní, syɔɔn faala a ní kɔ́ pye be fànikpaayi ni í!

²⁷ Níì cán wee mɔ tiimaa kpúmɔn lè, pe i nyɛ wi kurugo ni wɔʔɔ, bele mɔ kpàli lè, pe i kàa fàrá poro wɔʔɔgi na.

²⁸ Kolomi bee taʔa be kolomi na, pe a kɔ́ lɛɛlɛ taa mɔ sínni ni í!

²⁹ Ki n yɛlɛ pe mɛ́ɛyi í kurugo yirige yaà sìíw sɛ́bɛ ni, pe a kɔ́ sɛ́bɛ syɛɛnsinbèle nínge ni í!

³⁰ Mii i nyɛ foomɔfɔlɔ ní wɔʔɔgɔ syɔ́ɔn, ee Kolocɔlɔɔ, syɔɔli mɔ kaangi lè ki n yɛlɛ li mii yìrige bi yérige.

³¹ Mii a ra Kolocɔlɔɔ mɛ́ɛgi sòoló ní ŋúnugo ní, mii a ra wi kpɔ́ʔɔgi ní bariga kaanna ní.

³² Gee bee n Yawe dɛ́nɛ n sɔ̀lɔ nɔ̀ɔ na, gee bee n jo náapɛɛlɛ na, ní li nyɛ́ngèle, ní li fèriyi ní.

³³ Màabyebèle i gee bee nyaagi, a be i fundaanra kpéʔele. Yele bele ye Kolocɔlɔɔ caa lè, ki n yɛlɛ yele í sìinɛʔɛɔ taa!

³⁴ Níì cán Kolocɔlɔɔ i lúro foomɔfɔbèle ma, wi wóbèle be nyɛ lè kàsolebéle, wi o be faari í.

³⁵ Nyɛ̀ʔɛni ní tári, ní sólomi lòyo n yɛlɛ bàā wi sòoló, n fàra yáriri myɛ na di fíigi ni máari lè yi ni!

³⁶ Níì cán Kolocɔlɔɔ a Siyɔn syɔɔ, si ní Zyuda kěyi faan. Pe a tɛ́ɛn yi ni bi yi fáligi taa.

³⁷ Wi falipyebèle yòdaʔaya a ba gi taa kɔrigɔ, bele wi mɛ́ɛgi kéele dɛ́nɛ lè, poro pe a gi taa be tɛɛ̀tɛ́ɛnnɛ.