Ŋúnuyi 68 - Cebaara Bible 2010

Ŋúnuyi 68 Fàndaari Kolocɔlɔɔ fàrala ŋúnugo

¹ Ŋúnuŋùúbèle kùndigi wóʔo. Davidi ŋúnugi. Kpɔ̀ʔɔrɔli ŋúnugo.

² Kolocɔlɔɔ i yìrigí wi nigoobèle si i caragi, bele wi kéeli bɛɛn lè poro i fé wi yɛʔɛ̀ ma.

³ Amɛɛ wírige caragi bi kwɔ́ɔ lè, ànbée mɔ be caragi. Amɛɛ naà sékuro nyangi lè, ànbée syɛɛnpeebèle kálagi Kolocɔlɔɔ yɛ́ʔɛ ma.

⁴ Kàjáa syɛɛnsinbèle i muguri, pe i fundaanra kpéʔele Kolocɔlɔɔ yɛ́ʔɛ ma, pe fundaanratɔw i muguri.

⁵ Yaa ŋúu Kolocɔlɔɔ yɛ́ʔɛ ma, yaa ŋúu wi mɛ́ɛgi kpɔ̀ʔɔrɔlɔ kéele na! Yaa kólogi sámagi wee má wi maa fàfaanyi ni, syɔnʔɔ na lè! Woro mɛ́ɛgi gi nyɛ Yawe, yaa fundaanra kpéʔele wi yɛʔɛ̀ ma!

⁶ Kolocɔlɔɔ wi lè wi tɛɛkòrojǎngi ni, woro wi nyɛ círibèle tóo, ní lɔgucebèle kútiicerio.

⁷ Syɛ́ɛnbèle bele be kwɔ́ɔ n kòro pe nibin nibin lè, Kolocɔlɔɔ i bele bee légi nariga ni, wi i kàsolebèle yirigi ni yaari be pye fundaanra na. Kàjáa niceebèle yagana pe a kòro táfuuw tára ni.

⁸ Ee Kolocɔlɔɔ, lǎli ni mɔ yiri n kíni mɔ syɛ́ɛnbèle yɛ́ʔɛ na lè, lǎli ni mɔ da ni táanri fìími tára ni lè, Ŋɔ́ndaala

⁹ tári maa cɛ̀lɛ, a nyɛ̀ʔɛni lɔ̀ʔɔ yirige Kolocɔlɔɔ yɛ́ʔɛ ma, àmɛɛ Sinayii nyanbelegi da cɛ̀lɛ lè Kolocɔlɔɔ yɛ́ʔɛ ma, wi lè Isirayɛli Kolocɔlɔw.

¹⁰ Ee Kolocɔlɔɔ, mɔ n taala zàʔá cáan! Mɔ tári báriga maa kwɔ́ɔ, a mɔ níì di sámaga n télege.

¹¹ Mɔ syɛ́ɛnbèle n tɛ́ɛn tɛ́ɛgee ni mɔ be télege lè, mɔ i foomɔfɔlɔ màko nyɔɔgi ní mɔ funjǎngi ní, ee Kolocɔlɔɔ.

¹² Kàfɔw n syɛɛnrɛ joo n kaan, cébèle be syɛ́ɛnri bee jáari lè, pe i nyɛ kabikpɔʔɔ.

¹³ Kapɛɛnkpumɔnbèle fànʔafɔɔlɔ i fé ni fé, céwee wi kòro naa ni kpáagi kɔ̀rɔsíi lè, woro i yáriri lee, dee be koli lè.

¹⁴ Lǎli ni yele kòro wozinɛbéle ní bàkpaayi ni lè, wálifiiw n kàtoli fókaanya tɔ́n, tɛɛcàndelew i nyɛ li síiri na ni daragi.

¹⁵ Lǎli ni Séew Myɛ Kàfɔlɔ fànʔafɔbèle cariga beè lè, lànɛɛzyiw maa ni tíri Salimɔn nyanbelegi na.

¹⁶ Basyan nyanbeleyi i nyɛ Kolocɔlɔɔ nyanbeleye. Nyanbeleyi bee ǹjoyo n nɛʔɛ.

¹⁷ Kàjáa nyanbeleye, yele bele ǹjoyo yi nɛʔɛ lè, nyàʔá na yele nyabɛɛnnɛ kpéʔele nyanbelegee na, gee Kolocɔlɔɔ nyɛ́nɛ n wòlo lè n pye wi tɛɛ̀tɛ́ɛnni bi kòro yaà làla o làla?

¹⁸ Kolocɔlɔɔ wòtorobèle i córo sirakamayɛ selebingéle kagunɔ kagunɔbèlē tɛ́ɛyɛ saʔa. Kàfɔw i nyɛ be níngi ni, Sinayii nyanbelegi i nyɛ tɛɛcǎngi ni.

¹⁹ Mɔ n lúgu ǹjogi ni, mɔ n pulobèlē kɔ́ri n kári, mɔ n yakaanra wòlo syɛ́ɛnbèle ni, àlí niceebèle ni, koro ga pye mɔ Yawe Kolocɔlɔɔ í tɛ́ɛn ní be ní.

²⁰ Kàfɔw n yɛlɛ waa wi kpɔ̀ʔɔrɔ́ canʔa o canʔa! Wi i wolo túgori lée. Kolocɔlɔw bee wi nyɛ wolo syɔɔli. Ŋɔ́ndaala

²¹ Kolocɔlɔw bee wi nyɛ wolo má Kolocɔlɔɔ, wee wi syɔɔli kaangi lè, bi syɔɔn syɔɔ kùúw ma, Kàfɔw Yawe kɔ́yi ni koro nyɛ.

²² Kàjáa Kolocɔlɔɔ i wi nigoobèle nyúnyo tɔ́nʔɔnɔ. Wee wi syée yɛ́ʔɛ ma wi kapeegèle ni lè, wi a wee bee nyúngo tɔ́nʔɔnɔ ní gi ǹjoori ní.

²³ Kàfɔw n jo: «Mii a be yirige yaà Basyan ma pe lúru pan, mii a be yirige yaà sólomi lɔ̀ʔɔ fúngo ni pe lúru pan,

²⁴ koro ga pye mɔ í mɔ tɔ́lɔyi cùrɔ sìsyaanw ni, koro ga pye mɔ pɔ́nbèle nyíngéle í taa mɔ nigoobèle na.»

²⁵ Ee Kolocɔlɔɔ, pe i mɔ tánʔaganmi nyaagi! Mii Kolocɔlɔw, mii Fànʔafɔw, pe i mɔ tánʔaganmi nyaagi tɛɛcǎngi ni.

²⁶ Ŋùuvɔbèle n kíni yɛ́ɛgi na, yatingbumɔnri fɔ̀ɔlɔ si i nyɛ kàdoʔo ma, á pìcaabèle si i nyɛ níngi ni ni tàmábèle kpúmɔn.

²⁷ Yaa Yawe kpɔ̀ʔɔrɔ́ syɛɛnkpoʔolomi ni, yaa Kàfɔw kpɔ̀ʔɔrɔ́ yele bele ye yiri Isirayɛli púloweeli ni lè!

²⁸ Bɛnzyamɛ wi wee, pe wobili, woro wi kíni pe yɛ́ɛgi na, á Zyuda kùndigibèle ní wi syɛ́ɛnmi, ní Zabulɔn kùndigibèle, ní Nɛfitalii kùndigibèle taʔa.

²⁹ Mɔ Kolocɔlɔw n gi joo n gbàn, níì jo mɔ í fànʔa taa, kéelee mɔ séli wolo ma lè, ee Kolocɔlɔɔ, ki n yɛlɛ mi li yaʔa li báriga!

³⁰ Mɔ kpɔʔɔrɔli kpaʔa gi nyɛ lè Zyerusalɛmi nyúngi na, fànʔafɔbèle a ra maa beè mɔ ma ní be kpɔ́ʔɔri ní.

³¹ Fúlo nyɛnɛgɔligi yaweʔe na, ní náapegèle gboolo, ní syɛɛnfeleyi náapiiye na, pe tìgí too mɔ taana ní wálifiiw támabéle ní! Syɛɛnfeleyi kapɛɛnni dɛ́nɛ lè, ki n yɛlɛ mi yi cariga!

³² Syɛɛnkpolobèle i yìrigí Ezyipiti ma ni maa. Etyopii a wi kɔ́yi sánʔa kelekele Kolocɔlɔɔ ma.

³³ Tári fànya, ki n yɛlɛ yaa ŋúu Kolocɔlɔɔ ma, yaa Kàfɔw kpɔ̀ʔɔrɔlɔ ŋúnuyo ŋúu. Ŋɔ́ndaala

³⁴ Woro wee wi lúgu syɔnʔɔ na ni syée bàngwɔɔ nyɛ̀ʔɛgèle ǹjoʔo ni lè! Wéle, wi i yákpoli wáa, li lè wi séew yákpolo.

³⁵ Yaa gi jáari yé jo fǎngi i nyɛ Kolocɔlɔɔ wóʔo! Wi fǎngi i nyɛ Isirayɛli ye nyúngi na, wi séew si i nyɛ fàfaanyi ǹjoʔo ni.

³⁶ Ee Kolocɔlɔɔ, n mɔ yaʔa mɔ tɛɛcǎngi ni, mɔ i nyɛ fyáara yáriga! Isirayɛli Kolocɔlɔw wi séew, ní fǎngi kaangi wi syɛ́ɛnbèle ma. Kolocɔlɔɔ n yɛlɛ waa wi kpɔ̀ʔɔrɔ́!