Ŋúnuyi 66 - Cebaara Bible 2010

Ŋúnuyi 66 Kolocɔlɔɔ sòololi wi lè syɔɔn Syɔɔfɔw

1 Ŋúnuŋùúbèle kùndigi wóʔo. Ŋúnugi. Kpɔ̀ʔɔrɔli ŋúnugo.

¹ Ŋúnuŋùúbèle kùndigi wóʔo. Ŋúnugi. Kpɔ̀ʔɔrɔli ŋúnugo. Tári syɛ̀ɛnnɛ myɛ, yaa fundaanra yákpogéle wáa Kolocɔlɔɔ ma!

² Yaa wi mɛ́ɛgi kpɔ́ʔɔlɔ kéele ŋúu, yaa nìjangbɔɔri taari wi na ní sòololo ní!

³ Yaa gi nyuu Kolocɔlɔɔ ma ye wi pye: «Mɔ kapyegèle i nyɛ bìngaara kele! Mɔ nigoobèle i peyɛɛ gaangi mɔ ma pe nyɔ́ɔyi ni, mɔ séekpɔɔw kapyegèlē báriga ni.

⁴ Tári syɛ̀ɛnnɛ myɛ a ra tíri bàā tuun tári na mɔ yɛ́ʔɛ ma, sáā ŋúu mɔ kpɔʔɔrɔli kéele na. Pe a ra ŋúu mɔ mɛ́ɛgi kpɔ̀ʔɔrɔlɔ kéele na.» Ŋɔ́ndaala

⁵ Yaa maa ye ba Kolocɔlɔɔ kapyegèle wéle! Wi i nyɛ bìngaara wi kérigèle ni, gele wi kpéʔele syɔɔn ye kéeli na lè.

⁶ Wi n sólomi lɔ̀ʔɔ kàriga n pye táwaara, pe n cábigi jeli tɔ́lɔyi na, tɛ́ɛgi bee ni, a wolo fundaanra kpéʔele wi ni.

⁷ Wi i nyɛ yáriri myɛ nyúngo na làrigèle myɛ ni wi séew báriga ni, wi nyɛnɛ i nyɛ syɛɛnfeleyi na, niceebèle a kɔ́ ra peyɛɛ gbɔ́ʔɔgi í! Ŋɔ́ndaala

⁸ Syɛɛnfeleyi, yaa wolo Kolocɔlɔw kaangi bariga na, ye yele yákpogèle yaʔa kaa lúro wi soololi kéele na!

⁹ Woro wi wolo pìígèle lége sìíw ni, wi ga gi yaʔa wolo tɔ́lɔyi í kpírige í.

¹⁰ Níì cán mɔ n wolo sɛʔɛ n wéle, ee Kolocɔlɔɔ, mɔ n fɔ́ɔnri yirige wolo ni àmɛɛ pe gáà wálifiio gbàla lè n fɔ́ɔnri yirige wi ni.

¹¹ Mɔ n wolo kɔ́ri n cáan cɔ̀ɔ ni, mɔ n tugolibere taʔa wolo sárigèle na.

¹² Mɔ n gi yaʔa a syɛ́ɛnbèle lúgu n sɔ̀lɔ wolo nyúnyi na ní be syɔ́ɔnyi ní, wolo n jée náagi, ní lǒgi ni, kàjáa mɔ n wolo yirige yaà níì wolo kaan yarira saʔa na.

¹³ Mii a sa jée mɔ kpáagi ni ní sáriga-sórigoo ní, mii a mii nyɔɔfaliyi foro mɔ ma,

¹⁴ yoro yee mii da kpéʔele lè, yee yi da yiri mii nyɔ́ɔgi ni lè wɔʔɔgi làla ni.

¹⁵ Mii a sìnmɛ yaweere sáriga-sórigoo wòlo mɔ ma, bi fàra bàpɔbèle nùndaanna yasorigogo, ní náapegèle, ní sikepɔbèle sáriga na. Ŋɔ́ndaala

¹⁶ Yaa maa ye ba lóʔo, yele bele myɛ ye fɛ̀ɛgí Kolocɔlɔɔ na lè, gee wi kpéʔele mii sìíw kéele na lè, mii a gi joo tɛ̀ɛn.

¹⁷ Mii n yákpoli wáa wi kurugo ní mii nyɔ́ɔgi ní, wi kpɔ̀ʔɔrɔli maa pye n kwɔ́ɔ mii nyɔ́ɔgi na.

¹⁸ Mii ga maa sìnzinmɛ yaʔa mii fúngi ni, Kàfɔw mǎà dée lóʔo mii ma í.

¹⁹ Kolocɔlɔɔ si n lóʔo mii ma, wi maa yákirii yaʔa mii nyɛ́ɛrigi sùpile na.

²⁰ Kolocɔlɔɔ n yɛlɛ waa wi kpɔ̀ʔɔrɔ́ wi ga mii nyɛ́ɛrigi cée í, wi ga mii kún wi funjǎngi na í!