Ŋúnuyi 65 - Cebaara Bible 2010

Ŋúnuyi 65 Kolocɔlɔɔ, mɔ n tɔ̀nɔ n yɛlɛ ní sòololo ní

¹ Ŋúnuŋùúbèle kùndigi wóʔo. Davidi ŋúnugi. Ŋúnugo.

² Ee Kolocɔlɔɔ, mɔ na sòololi yɛlɛ Siyɔn ni, pé wɔ́ɔ ra nyɔɔfaliyi forogi mɔ ma.

³ Mɔ wee wi nyɛ́ɛrigi lúro lè, syɛ́ɛnbèle myɛ a ra maa mɔ ma.

⁴ Kolomi kapyere n fànʔa taa mii na. Kàjáa mɔ a wolo kapeeyi kùsulugo syɔɔ.

⁵ Syɔ́ɔnwee mɔ ga nyɛ́nɛ n wòlo lè níì wi yaʔa wi nùuni mɔ na, koro ga pye wi tɛ́ɛn mɔ kacooli ni, syɔ́ɔnw bee i nyɛ dùba pyà! Mɔ kpáagi yacanra a tɔ̀nɔ́ wolo tín, mɔ kpɔʔɔrɔli kpaacanga ni.

⁶ Mɔ i syɛɛnlurugori kaangi wolo ma ní bìngaara kele, ní sínnɛ ní, Kolocɔlɔɔ, mɔ wee wi nyɛ lè wolo syɔɔli, mɔ wi nyɛ tári ní sólomi lɔ̀ʔɔ léelige tɛɛ̀laʔagéle sɔngumɔ tɛɛtaʔaga.

⁷ Wi n nyanbeleyi sámaga n yérige wi séew báriga ni, níì miyɛɛ bwɔɔ ní fǎngi ní.

⁸ Wi i sólomi lòyo tìngbɔɔmɔ, ní yi kùnguruyi tìngbɔɔmɔ, ní syɛɛnfeleyi kàfulogo yéregi.

⁹ Bele be nyɛ lè yaà wodɛ́ɛnbéle ní tári láʔala na, mɔ kakpoloyi nyáana i nyɛ be na fyáara. Mɔ n gi yaʔa canʔafolomɔ ní canʔajeemɛ wóbèle í da fundaanra kpéʔele.

¹⁰ Mɔ i tári saanri ni wéle ní i zěgi kaangi di ma, mɔ i di nyìngí lɔnɛʔɛri na. Kolocɔlɔɔ lókologi n nyìn lǒgi na. Amɛɛ mɔ tári sámagi ti i tàán lè, yaliiri mɔ sámagi be ma nya.

¹¹ Mɔ i di sɔ̀nlɛɛyi nyìngí lǒgi na ni tímana ní sɔ̀nboliyi ní, mɔ i zěgi téeri ni di pegi, ní i dùba taari di yaluguri na.

¹² Mɔ i yɛɛboli nyìngí ni forogi mɔ yacannɛʔɛri na, sìnnɛʔɛgɛ i fóo mɔ tɛɛsɔ̀lɔyi ni.

¹³ Fìími tára nyaapungo n gbaa n tín, á fundaanri si dǎndamayi màʔa n kpàra.

¹⁴ Yaweeyiligèle n nyàápungi tɛ́ɛyɛ myɛ tɔ́n, á jǐnlɔyi myɛ si nyìn yaliiri na. Yi i fundaanra yákpogéle wáa ní i ŋúu.