Ŋúnuyi 64 - Cebaara Bible 2010

Ŋúnuyi 64 Kolocɔlɔɔ fàndaari kéele nyíngèle na ge pee lè

¹ Ŋúnuŋùúbèle kùndigi wóʔo. Davidi ŋúnugi.

² Ee Kolocɔlɔɔ, mii yákpoli lóʔo, lǎli ni mii ga ni cɛ́ɛn lè! Da mii sìíw syoo mii nigoow ma, wee na mii fɛ̀ɛgí lè.

³ Mii syɔɔ syɛɛnpeebèle kpóʔorojoolo ma, ní syɛɛnnaa-sìnzinbèle tìngbɔɔmɔ ma.

⁴ Pe i be nyíngèle jɔɔgi àmɛɛ ŋɔsée nyɛ lè, pe i be syɛɛnsorodi wábagi àmɛɛ ŋaaya nyɛ lè,

⁵ bi tɛɛlɛ fun syɔɔnw wáa cáan làrama ni. Pe i wi foo ni wábagi fyáara fun.

⁶ Pe i lòmaana nii peyɛɛ ni kapeeyi pyele na, ní wɔ́ɔ i nyuu ní peyɛɛ ní karinyanyi leganma na. Pe i gi nyuu níì jo: «Wìí wi a yi nyaa?»

⁷ Pe i sìnzinmi kafɔngèlē sélegi, ní i gi nyuu níì jo: «Wolo katimanani n tɔ̀nɔ n foro!» Pe myɛ nibin nibin fúnyo kasɔngugēle n tɔ̀nɔ n cùru.

⁸ Kàjáa Kolocɔlɔɔ i be pàlá ni wábagi ní ŋáayi ní, poro be too bele.

⁹ Wi n be kaan a be too pe nyíngèle kéele na. Pe nyaafɔbèle myɛ i nyǔnyi kólo be kéeli na.

¹⁰ Fyáara n syɛ́ɛnbèle myɛ cò, pe i Kolocɔlɔɔ kapyegèle jáari, pe a ra wi kapyegèle kɔ́rɔ cángi.

¹¹ Syɛɛnsinw i fundaanra kpéʔele Yawe kéeli na, níì wiyɛɛ kàlifáa wi ma, bele fúnyo yi sín lè, poro a ba ra fundaanra kpéʔele.