Ŋúnuyi 60 - Cebaara Bible 2010

Ŋúnuyi 60 Kolocɔlɔɔ i lúro wi syɛ́ɛnbèle ma, poro bele be jáa lè

¹ Ŋúnuŋùúbèle kùndigi wóʔo. «Séeraw nyàáfyɛɛnrɛ na.» Davidi tára-nyɔ́ɔ-na ŋúnugi, tamana kéele na.

² Lǎli ni wi da ni kapɛɛnni kpúmɔn ní Mezopotamii Sirii syɛ́ɛnbèle, ní Soba Sirii syɛ́ɛnbèle ní lè, á Zyowabi si lúru n pan n baa Edɔmi syɛ́ɛnbèle pèle selebingéle kɔrɔni kpóo Sólomi jǐnlɔgɔ ni.

³ Ee Kolocɔlɔɔ! Mɔ n wolo cée, mɔ n wolo kpúmɔn n cariga, mɔ fúngi n tanʔa, koro ní ki myɛ ní ki n yɛlɛ mi ní mi fɔ̀lɔ wolo na!

⁴ Mɔ n tári cúngo, mɔ n di sulugu, ní mi di tɛɛsuluguyi sámaga, níì cán ti i kpírigi!

⁵ Mɔ n kagbanya tɛ̀ɛn mɔ syɛ́ɛnbèle na, mɔ n yɛɛwɔɔ̀ dùvɛɛn kaan wolo ma a wo gbaa.

⁶ Mɔ n dìrapo kaan mɔ yɛ́ɛgi fyáafɔɔlɔ ma jàngó paa fé sedeŋɔɔw yɛ́ʔɛ ma. Ŋɔ́ndaala

⁷ Mɔ kaliigi tɛ́ʔɛ mi syɔɔlɔ kpéʔele, mí lóʔo wolo ma, koro ga pye mɔ syɛɛn-nidaanmabèle í syɔɔ!

⁸ Kolocɔlɔɔ n gi joo wi tɛɛcǎngi ni níì jo: «Mii má fàndaari nyɛ, mii a Sisyɛmi lɛɛ lɛɛ, mii a Sukɔti jǐnlɔgi tímana.

⁹ Galaadi i nyɛ mii wóo, a Manase i nyɛ mii wóo. Efirayimi i nyɛ mii túnmɔri nyùndɔngɔ, Zyuda si i nyɛ mii fǎngi kàgbeele.

¹⁰ Mowabi i nyɛ lǒgi yalege, gee ni mii wíri lè. Mii n mii taʔalagi wáa Edɔmi na, mii i fàndaara yákpolo wáa Filisitini ye tári kánma na!»

¹¹ Wìí syɔ́ɔn wi a mii tórigo bi sa lége kènirigi ni? Wìí syɔ́ɔn wi a mii yɛ́ɛgi kíni bi sa nan Edɔmi na?

¹² Ee Kolocɔlɔɔ, mɔ ban wi wolo cée ì? Ee Kolocɔlɔɔ, mɔ ban wi nyɛ wi ní o syée ní wolo kapɛɛnkpumɔnbèle ní í ì?

¹³ Wolo dɛ̀ɛmɛ, mi wo syɔɔ nigoow ma, níì cán syɔɔn dɛɛmɛni o nyɛ yafyɛn í.

¹⁴ Wolo a ra kakpoloyi kpéʔele Kolocɔlɔɔ bárigaw ni, woro wi a wolo kàsiitun-nyɛ́nbèle tɔ́nʔɔnɔ.