Ŋúnuyi 6 - Cebaara Bible 2010

Ŋúnuyi 6 Yawe, mɔ a kɔ́ kútiiw cáan mii na í

¹ Ŋúnuŋùúbèle kùndigi wóʔo, gee be ŋúu mɛ́ɛngèle kɔrɔtaanri kɔ̀rí ni lè. Davidi ŋúnugi.

² Ee Yawe, mɔ a kɔ́ mii wɔʔɔ mɔ fundanʔari làla ni í, mɔ a kɔ́ mii kpúmɔn mɔ fundanʔagbɔɔri làla ni í.

³ Yawe, nyinimɛ taa mii na, níì cán mii bárigaw n kwɔ́ɔ. Ee Yawe, yáami láʔa mii na, níì cán mii kaceleyi i cɛ̀lɛ́.

⁴ Mii zɔ̌nw myɛ i cɛ̀lɛ́. A mɔ, Yawe, làlìí mɔ sige?

⁵ Ee Yawe, lúru maa maa mi ba mii syɔɔ. Mii syɔɔ mɔ nyínimi báriga ni.

⁶ Níì cán syɔɔn ga kùu n kwɔ́ɔ, wi a ní sɔ̀ngi mɔ kéeli na í. Wìí wi a ní gbǎn ra mɔ mɛ́ɛgi kpɔ̀ʔɔrɔ́ kúbèle tɛɛkòrogo ni?

⁷ Mii bárigaw n kwɔ́ɔ mii cɛ́ɛnmi fànʔa báriga ni. Yébilige o yébilige, mii i nyaan ni mii tɛ̀ɛsinɛgi nyíngi mii nyatinmi i mii yasinɛgi fɔɔnri.

⁸ Mii nyapiigèle n fɔ̀rɔ fúngi nyáʔamina báriga ni. Lɛ́ɛri n ge cò mii kàsiitun-nyɛ́nbèle myɛ kéele na.

⁹ Ye núngo mii taana yele kakolobyebèle myɛ, níì cán Yawe n mii nyɛnimi sùpile lóʔo.

¹⁰ Yawe n mii nyɛ́ɛrigbɔɔgi lóʔo, Yawe n fɔ̀lɔ mii nyɛ́ɛrigi na.

¹¹ Ki n yɛlɛ fɛ̀ɛrɛ í mii nígoobèle myɛ taa paa cɛ̀lɛ́. Ki n yɛlɛ be tàra lúru kàdoʔo ma, fɛ̀ɛ́ri si be cíbele terire.