Ŋúnuyi 59 - Cebaara Bible 2010

Ŋúnuyi 59 Mii Kolocɔlɔɔ, mii syɔɔ bele má be nyɛ mii kurugo lè

¹ Ŋúnuŋùúbèle kùndigi wóʔo. Ki joo lè: «Mɔ a kɔ́ wi kpóo í.» Davidi tára-nyɔ́ɔ-na ŋúnugi. Lǎli ni Sawuli pèle tórigo lè pe sa ra wi kpáagi kɔ̀rɔsíi si wi kpóo.

² Mii Kolocɔlɔw, mii syɔɔ mii nigoobèle ma, mii làriga mii caafɔbèle na.

³ Mii yirige kakolobyebèle kɔ́yɔ ni, mii syɔɔ syɛɛnkpoobèle ma!

⁴ Wéle, pe n làra bele ni mii sige, syɛɛnpeebèle i peyɛɛ gbóʔoro mii kánmi na. Ee Yawe, mii kolomɔ kéele na ban í, mii kapeebyere kéele si wɔ́ɔ ban í.

⁵ Pe i fé ni syée n sa ni peyɛɛ zámagi, bi gi taa mii ga kolo í. Yìri nya ŋúnɔmi na mi ba mii dɛ̀ɛmɛ, mí gi wéle!

⁶ Ee Yawe, Kolocɔlɔɔ mɔ wi lè Nyɛ̀ʔɛni Sùlasiibéle Kafɔlɔ, Isirayɛli Kolocɔlɔw, yìri mi keele tɛ́ʔɛ syɛɛnfeleyi myɛ na! Mɔ a kɔ́ nyinimɛ taa námarafɔ-beebèle bee wàa faala na í! Ŋɔ́ndaala

⁷ Pe i lúrugu ni maa cângwɔɔgi nyɔ́ɔ na, pe i nyàʔá àmɛɛ pɔ̀ɔnnɔ nyɛ lè ni kěgi máari.

⁸ Wéle, pe nyɔɔyi n nyìn kpárigi na, ŋɔséebéle i nyɛ pe nyɔɔwari na. Pe n jo: «Wìí wi di lúro?»

⁹ Kàjáa mɔ Yawe i be tɛ́ʔɛ. Mɔ i kataanra wáa syɛɛnfeleyi myɛ na.

¹⁰ Mɔ séenɛʔɛw kéele na mii a mii sɔ̀ngumi taʔa mɔ na, níì cán Kolocɔlɔɔ wi nyɛ mii Kènirigi.

¹¹ Mii Kolocɔlɔw wi lè funjànga fɔ́lɔ, wi i mii fàrá, wi a ba mii kaan mii í da fundaanra kpéʔele gee na ki a ba mii nigoobèle taa lè.

¹² Mɔ a kɔ́ be kpóo í, koro ga pye mii syɛ́ɛnbèle a kɔ́ fɛ̀ʔɛ í. Pe cariga ní mɔ séew ní mi be tìrige mi cáan, ee Kàfɔw, mɔ wi lè wolo tunmɔzige-yárigi.

¹³ Pe nyɔ́ɔgi kapeele li nyɛ pe nyɔ́ɔgi syɛ́ɛnrɛ. Ki n yɛlɛ pe cò be tiimaa kpɔ́ɔmi karinyanga na pe dánga syɛ́ɛnri, ní be jànvaaw kéele na.

¹⁴ Ki n yɛlɛ mɔ fundanʔaratɔw í be kálagi, pe kálagi, koro ga pye pe a ní kɔ́ pye yaà í, jàngó pe gi cán Kolocɔlɔɔ wi nyɛ fǎngi na Zyakɔbi nyúngi na, fwɔɔ bi taa sa nan tári láʔala na. Ŋɔ́ndaala

¹⁵ Pe i lúrugu ni maa cângwɔɔgi nyɔ́ɔ na, pe i nyàʔá àmɛɛ pɔ̀ɔnnɔ nyɛ lè ni kěgi máari.

¹⁶ Pe i nyaari ni máari pe yaliiri kurugo, kapye pe ga tín í, pe n ni kaana ni syɔ̀ɔ́n.

¹⁷ Mii si na, mii a ra mɔ séekpɔɔw kéele ŋúu ŋúnugo. Nyǐngi nyɔ́ɔ na, mii a ra mɔ funjǎngi kéele ŋúu yákpogbɔɔlɔ ni, níì cán mɔ wi nyɛ mii Kènirigi, ní mii tɛɛlaragi, wɔʔɔli canʔa na.

¹⁸ Ee mɔ wee wi lè mii fǎngi! Mii a ra mɔ kpɔʔɔrɔli ŋúnuyo ŋúu, níì cán Kolocɔlɔɔ wi nyɛ mii Kènirigi, mii Kolocɔlɔw, wi lè funjànga fɔlɔ.